Ն. ԲԱՐՍԵՂԵԱՆ
Այլ Նախաձեռնութիւններ
![]()
Լիբանան կատարած աշխատանքային այցելութեան ծիրին մէջ Հայաստանի վարչապետի պաշտօնակատար Նիկոլ Փաշինեանը 20 հոկտեմբերին հանդիպում ունեցաւ լիբանանահայ օրաթերթերու եւ ձայնասփիւռի կայաններու ղեկավարներուն հետ, որոնց մէջ էր «Ազդակ» օրաթերթի գլխաւոր խմբագիր Շահան Գանտահարեանը:
Ներկաները գոհունակութիւն յայտնեցին այն առումով, որ նման հանդիպումի մը նախաձեռնութիւնը վարչապետի պաշտօնակատարին կողմէ յատուկ կարեւորութեամբ ընդգծել է ընդհանրապէս հայկական լրատուամիջոցներուն ունեցած դերակատարութիւնը:
Շահեկան խորհրդակցութիւն տեղի ունեցաւ յատկապէս սփիւռքի ներուժը պետականակերտման աշխատանքներուն մէջ ներգրաւելու առաջադրանքին եւ լրատուամիջոցներուն ունեցած դերին մասին` համահայկական օրակարգ ձեւաւորելու առաջադրանքով տարուելիք աշխատանքներուն:
![]()
– 20 օգոստոսին «Ազդակ»-ի խմբագրատուն այցելեց ՀՄԸՄ-ի Կեդրոնական վարչութեան պատուիրակութիւնը` բաղկացած Կեդրոնական վարչութեան ատենապետ Գառնիկ Մկրտիչեանէ եւ Կեդրոնական վարչութեան անդամներ Վաչէ Նաճարեանէ ու տոքթ. Իշխան Եղիայեանէ:
Հանդիպման ընթացքին Կեդրոնական վարչութեան ատենապետ Գառնիկ Մկրտիչեանը ըսաւ, որ այցելութեան նպատակն է գնահատել «Ազդակ»-ի կատարած աշխատանքը` ՀՄԸՄ-ի 100-ամեակի ձեռնարկներուն պատշաճ լուսաբանութիւնը կատարելու առումով:
Ան յատուկ կերպով խօսեցաւ ՀՄԸՄ-ի 100-ամեակին նուիրուած «Ազդակ»-ի յաւելուածին մասին, որ բառին իսկական առումով ձեռքէ ձեռք խլուած է Երեւանի մէջ:
Այնուհետեւ, իբրեւ գնահատանք տարուած աշխատանքին, ՀՄԸՄ-ի Կեդրոնական վարչութեան ատենապետ Գառնիկ Մկրտիչեանը ՀՄԸՄ-ի հիմնադրութեան 100-ամեակի յուշանուէր յանձնեց «Ազդակ»-ի տնօրէն Շահան Գանտահարեանին:
– Պատմական դէմքերու յատկացուած «Ազդակ»-ի լուսանկարներու ելեկտրոնային բաժինը այս տարի հարստացաւ կարեւոր նոր խմբաքանակով: Հայաստանի Ա. Հանրապետութեան պետական դէմքեր ներառած լուսանկարներու հարուստ հաւաքածոյ «Ազդակ»-ին յանձնեց Տասնապետեան ընտանիքը: Արխիւային նշանակութիւն ունեցող լուսանկարներուն մէջ կ՛երեւին Ռուբէն Տէր Մինասեանը, Լեւոն Շանթը, Նիկոլ Աղբալեանը, Սիմոն Վրացեանը եւ Կարօ Սասունին:
Հաւաքածոյի թուայնացումով կ՛արխիւայնանան նաեւ Հրաչ Տասնապետեանի եւ իրեն ժամանակակից պատասխանատու պաշտօններ ստանձնած անձնաւորութիւններու լուսանկարներ (ժողովներ, աշխատանքային հանդիպումներ, ընկերային պահեր):
«Պզտիկ-Մզտիկ»-ի աշխատանքներ
15 ապրիլ 2018-ին «Ազդակ»-ի «Փիւնիկ» սրահին մէջ, երկրորդ տարին ըլլալով, տեղի ունեցաւ «Ազդակ»-ի մանկապատանեկան յաւելուած «Պզտիկ-Մզտիկ»-ի խմբագրական կազմին կազմակերպած «Փոքրիկ լրագրողներու աշխատանոց»-ը:
12 հայկական վարժարաններէ` Հայ աւետարանական քոլեճէն, Հայ աւետարանական երկրորդական բարձրագոյն վարժարանէն, Հայ աւետարանական Շամլեան-Թաթիկեան վարժարանէն, Հայ աւետարանական Փ. եւ Է. Թորոսեան վարժարանէն, Ազգային Միացեալ վարժարանէն, Ազգային Յառաջ-Գ. Կիւլպէնկեան վարժարանէն, Ազգային Եղիշէ Մանուկեան քոլեճէն, Հայ կաթողիկէ Մեսրոպեան վարժարանէն, Հայ կաթողիկէ Հռիփսիմեանց վարժարանէն, Հայ կաթողիկէ պատրիարքարանի Ս. Խաչ-Հարպոյեան բարձրագոյն վարժարանէն, Թէքէեան վարժարանէն եւ Համազգայինի Մ. եւ Հ. Արսլանեան Ճեմարանէն եկած էին 71 աշակերտներ` 4-րդ, 5-րդ եւ 6-րդ դասարաններէն: Անոնք բաժնուած էին խումբերու, եւ իւրաքանչիւր խումբ կը կրէր 1918 մայիս 28-ի իրադարձութիւններուն դերակատարութիւն ունեցած հայ անձնաւորութեան մը անունը` նկատի առնելով, որ այս տարուան աշխատանոցը նուիրուած էր Հայաստանի Ա. Հանրապետութեան հիմնադրութեան 100-ամեակին:
Բացման խօսքով Սրբուկ Ճենանեանը աշակերտներուն բարի գալուստ մաղթեց, ապա անդրադարձաւ ձեռնարկի բնոյթին եւ կատարուելիք աշխատանքներուն: Այսպէս, առաջին փուլով աշակերտները լսեցին զեկուցում մը «Ազդակ» օրաթերթի խմբագիրներէն Արշօ Պալեանէն` հարցազրոյց պատրաստելու ու վարելու մասին, ապա գործնական աշխատանքով փոքրիկ լրագրողները առաջին հարցազրոյցը պատրաստեցին ու կատարեցին խմբագիրին հետ: Անկէ ետք աշակերտները պատրաստեցին իրենց ներկայացուած նիւթերը, որոնք առնչուած էին Հայաստանի զոյգ անկախ հանրապետութիւններուն: Այս պարագային փոքրիկները կը կարդան իրենց տրուած նիւթերը եւ իրենց դիտանկիւնէն կը ներկայացնեն զանոնք. անշուշտ աշխատանքը կը կատարուի խումբերով:
Հիւրասիրութեան կարճ դադարէ մը ետք անոնք հարցազրոյց մը վարեցին Լիբանանի զբօսաշրջութեան նախարար Աւետիս Կիտանեանին հետ: Փոքրիկները նախ լսեցին նախարարին ինքնակենսագրութիւնը, ապա անկէ մեկնած` պատրաստեցին հարցումներն ու ուղղեցին նախարարին: Պէտք է ըսել, որ անոնք շատ համարձակ ու շատ հետաքրքրական հարցումներ ուղղեցին նախարարին` ստեղծելով հետաքրքրական ու հաճելի մթնոլորտ մը:
Ճաշի դադարէն ետք փոքրիկները դիտեցին փաուըր փոյնթով ցուցադրութիւն մը` մանուկներու իրաւունքներուն մասին, որոնք ընդունուած են ու կը գործադրուին Հայաստանի Հանրապետութեան կողմէ: Անկէ ետք անոնց բաժնուեցաւ խեղճ պայմաններու մէջ ապրող մանուկներու պատկերներ, իսկ անոնք գրեցին իրենց կարծիքները այդ մասին:
Ապա Վանայ Ճենանեանը փոքրիկներուն ներկայացուց պանտ տեսինէի օրէնքներուն մասին տեղեկութիւններ, որմէ ետք փոքրիկները աշխատեցան պատրաստել իրենց պանտ տեսինէն` Հայաստանի անկախութեան լուրը կամ Սարդարապատի, Բաշ Ապարանի ու Ղարաքիլիսէի ճակատամարտերը ներկայացնող դրուագներով:
Այս միջոցին էր, որ ներկայացաւ ՀՄԸՄ-ի պասքեթպոլի մարզիկ Սեւակ Քեթենճեանը: Անսահման էր փոքրիկներուն ուրախութիւնը, անոնք լսեցին Սեւակը, ապա հարցումներու տարափ մը սկսաւ: Փոքրիկները շատ խանդավառ էին: Անոնք նկարուեցան ու «հրամայեցին», որ ՀՄԸՄ-ը չպարտուի եւ ախոյեան ըլլայ:
![]()
Աշակերտները գոհունակ եւ ուրախ տրամադրութեամբ հեռացան սրահէն` իրենց հետ տանելով յիշատակի նուէր մը` տրամադրուած «Ազդակ»-ի կողմէ:
25 նոյեմբեր 2018-ին «Ազդակ»-ի «Փիւնիկ» սրահը դարձեալ ժամադրավայրը եղաւ «Ազդակ»-ի մանկապատանեկան «Պզտիկ-Մզտիկ» յաւելուածի խմբագրական կազմին կազմակերպած «Անսխալ գրենք» մրցումին, որուն մասնակցեցան հայկական վարժարաններու Դ. Ե. եւ Զ. դասարաններու աշակերտները: Այսպէս, «Ազդակ»-ի «Փիւնիկ» սրահը յաջորդաբար ընդունեց նախակրթարանի վերջին երեք կարգերու աշակերտները` աւելի քան 200 հոգի, որոնք եկած էին հայկական հետեւեալ վարժարաններէն. Հայ կաթողիկէ Մեսրոպեան բարձրագոյն վարժարան, Հայ կաթողիկէ Ս. Հռիփսիմեանց բարձրագոյն վարժարան, Հայ կաթողիկէ Մխիթարեան (Ռաուտա) վարժարան, Հայ կաթողիկէ Սրբուհի Ագնէս վարժարան, Հայ աւետարանական Շամլեան-Թաթիկեան վարժարան, Հայ աւետարանական Թորոսեան վարժարան, Հայ աւետարանական Կեդրոնական բարձրագոյն վարժարան, Հայ աւետարանական քոլեճ, Վահան Թէքէեան վարժարան, Ազգային Յառաջ – Գալուստ Կիւլպէնկեան վարժարան, Ազգային Եղիշէ Մանուկեան քոլեճ, Ազգային Միացեալ վարժարան եւ Համազգայինի Մելանքթոն եւ Հայկ Արսլանեան ճեմարան:
Մրցումի աւարտին իւրաքանչիւր դասարանի մասնակիցներուն բաժնուեցաւ յիշատակի երկու նուէր, մէկը տրամադրուած «Ազդակ»-ի կողմէ, իսկ միւսը` «Արամ Մանուկեան» մատենաշարի հրատարակիչին:
Կը շարունակենք աշխատիլ, գրել, տպել, քննադատուիլ, գնահատուիլ, գիշերներ լուսցնել, մեր սխալներուն անդրադառնալ եւ ուղղելու փորձ կատարել, շարունակել ամէն օր մեր թերթը լոյս աշխարհ բերել` հաւատարիմ մեր նախնիներուն ուղիին եւ քայլ պահելով նորօրեայ պահանջներուն հետ:
———————————————
«Ապագայ Լրագրողներ»-ու
Պատրաստութեան Վարժողական Ծրագիր
![]()
«Ազդակ»-ի խմբագրութիւնը 2017-ին կազմակերպեց կարեւոր նախաձեռնութիւն մը` լրագրութեան վարժողական ծրագիրը, որ ընթացք առաւ 24 օգոստոսին եւ տակաւին կը շարունակուի: Անոր կը մասնակցին հայկական վարժարաններու միջնակարգ եւ երկրորդական բաժիններու աշակերտներ Կալի Աւագեան, Ռուբէն Խաչատուրեան, Հուրի Հալէպլեան, Նանար Մինասեան, Նարեկ Քէշիշեան, Գոհար Եագուպեան, Սիլվի Սէրայտարեան, Ալիսիա Իշխանեան, Լոռի Գորէսեան, Արենի Խաչատուրեան, Նանի Գալուստեան եւ Քրիստ Իսկենտերեան:
Անոնց հետ կայացած առաջին հանդիպումին «Ազդակ»-ի տնօրէն եւ գլխաւոր խմբագիր Շահան Գանտահարեան վարժողական այս ծրագիրը հեռանկարային նկատեց` մաղթելով, որ այս ծրագիրին անոնց մասնակցութիւնը կ՛ըլլայ հետեւողական: Ան շեշտեց, որ վարժողական ծրագիրը պիտի ընդգրկէ նաեւ հայկական իրականութեան մէջ պատասխանատու անձնաւորութիւններու հետ հանդիպումներու շարք մը, որպէսզի ծրագիրը բաւական համապարփակ ըլլայ:
«Լրագրութեան այս դպրոցը պիտի ծառայէ, որ մենք իրարու օգտակար ըլլանք եւ երիտասարդական այս կարեւոր խաւը ներգրաւուած պահենք մեր թերթին», ըսաւ ան:
Լրագրութեան վարժողական ծրագիրին գործադրութեան հսկող, «Ազդակ»-ի խմբագրակազմի անդամ Արշօ Պալեան առաջին հանդիպումին առիթով նշեց, որ վարժողական ծրագիրը պիտի ունենայ տեսական, դասախօսական եւ գործնական բաժիններ` աւելցնելով, որ մասնակցողները առիթ պիտի ունենան հետեւելու թղթակցութեան, հարցազրոյցի, յօդուածագրութեան եւ ուսումնասիրութեան պատրաստութեան ձեւերուն, արագ լրահոսի դրութեան, ինչպէս նաեւ մօտէն ծանօթանալու գրաշարութեան, էջադրումի աշխատանքներուն եւ ծրագիրի աւարտին ունենալու իրենց յատուկ հրատարակութիւնը:
– 31 օգոստոսին Արշօ Պալեան «Ապագայ լրագրողներ»-ուն ներկայացուց խմբագրատան մէջ կատարուող զանազան աշխատանքները: Ան անդրադարձաւ «Ազդակ»-ի տասը էջերուն դիմագիծին, բովանդակութեան եւ պատրաստութեան հոլովոյթին, ինչպէս նաեւ` «Ազդակ»-ի պաշտօնական կայքին, բջիջայինի յատուկ «Էփ»-ին, արագ լուրերու «Փուշ նոթիֆիքէյշըն»-ի դրութեան եւ «Ազդակ»-ի արխիւները թուայնացնելու աշխատանքին:
Անդրադարձ կատարուեցաւ նաեւ օրաթերթին կողքին ամսական դրութեամբ լոյս տեսնող «Պզտիկ – Մզտիկ» մանկապատանեկան յաւելուածին, Նոր տարուան եւ Ապրիլ 24-ին հրատարակուող երկու բացառիկ թիւերուն, ինչպէս նաեւ տարբեր առիթներով հրատարակուող յաւելուածներուն:
Աշակերտները այցելեցին «Ազդակ»-ի թուայնացումի եւ ուսումնասիրութեան «Ժիրայր Պուտագեան» կեդրոնը, թերթին արխիւը եւ «Ազդակ»-ի տպարանը, ուր ծանօթացան տպարանի աշխատանքներուն:
– 7 սեպտեմբերին ՀՅԴ Եւրոպայի Հայ դատի յանձնախումբի հաղորդակցութեան նախկին պատասխանատու Պետօ Տեմիրճեան «Ապագայ լրագրողներ»-ուն հետ հանդիպումին անդրադարձաւ Եւրոպական Միութեան, Եւրոպական խորհրդարանին, Եւրոպական յանձնաժողովին եւ Եւրոպական խորհուրդին կառուցուածքին ու աշխատանքի հոլովոյթին, հայութեան վերաբերող հարցերով անոնց գործունէութեան, ինչպէս նաեւ` Հայաստանի հետ անոնց գործակցութեան:
Ան անդրադարձաւ նաեւ Հայ դատի յանձնախումբին դիմագրաւած մարտահրաւէրներուն` ազրպէյճանական եւ թրքական լոպիինկին դիմաց, նկատի ունենալով իրականութիւններ խեղաթիւրելու անոնց գործելաոճը: Պ. Տեմիրճեան անդրադարձաւ նաեւ Եւրոպական խորհուրդի Խորհրդարանական վեհաժողովի (ԵԽԽՎ) կառոյցին ու գործունէութեան` յստակօրէն բացատրելով Եւրոպական Միութենէն տարբեր ըլլալու իրականութիւնը:
– 14 սեպտեմբերին «Ազդակ»-ի պատասխանատու խմբագիրներէն Ժագ Յակոբեան հանդիպեցաւ «Ապագայ լրագրողներ»-ուն հետ` անոնց ներկայացնելով ամբողջական տեղեկութիւններ լուրերու տեսակներուն, լուրերու կարեւորութեան, օգտագործուած աղբիւրներուն, ապատեղեկատուութեան ծուղակներուն, էջադրումի դասական ձեւին եւ արտակարգ իրադարձութիւններ ընդգրկող օրերու ընթացքին, խմբագրութեան որդեգրած քայլերուն մասին` էջադրումի իմաստով:
Այս մասին Ժ. Յակոբեան յաւելեալ բացատրութիւններ եւ «Ազդակ»-ի զանազան թիւերու ընդմէջէն շօշափելի օրինակներ ցոյց տուաւ վարժողական ծրագիրի հետեւող աշակերտներուն եւ ուսանողներուն:
– Ուրբաթ, 22 սեպտեմբեր 2017-ին Լիբանանի մէջ Հայաստանի դեսպան Սամուէլ Մկրտչեան ընդունեց «Ապագայ լրագրողներ»-ը, որոնց ներկայացուց դեսպանատան աշխատանքներն ու տարբեր բաժանմունքները: Ան անդրադարձաւ Լիբանան-Հայաստան դիւանագիտական յարաբերութիւններու հաստատումին, երկկողմանի յարաբերութիւններու ծաւալումին, ինչպէս նաեւ այդ յարաբերութիւնները ամրապնդելու նպատակով ներկայիս ի գործ դրուող ջանքերուն:
Լիբանանահայ գաղութին մասին խօսելով` դեսպան Մկրտչեան յայտնեց, որ անիկա բացառիկ լաւ կազմակերպուած եւ աշխուժ գաղութ է իր տարբեր միութիւններով` մշակութային, բարեսիրական, մարմնակրթական եւ այլ կառոյցներով:
Ս. Մկրտչեան լուսարձակի տակ առաւ նաեւ Հայաստանի քաղաքական համակարգն ու անոր գործունէութիւնը, ինչպէս նաեւ անդրադարձաւ տնտեսական մարզին մէջ որդեգրուած նոր քայլերուն, որոնք կը քաջալերեն գործարարները իրենց գործը հաստատելու Հայաստանի մէջ, եւ նպաստելու երկրին տնտեսութեան զարգացումին: Ան ակնարկեց նաեւ լիբանանեան տարբեր շրջաններու քաղաքապետներուն հետ իր ունեցած հանդիպումներուն` Հայաստանի հետ քոյր քաղաքներու յարաբերութիւններ հաստատելու նպատակով:
Նաեւ` դեսպան Մկրտչեանին հրաւէրով, «Ապագայ լրագրողներ»-ու խումբը 23 սեպտեմբեր 2017-ին մասնակցեցաւ «Քեմփինսքի Սամըրլենտ» պանդոկին մէջ Հայաստանի անկախութեան վերականգնման 26-ամեակին առիթով կազմակերպուած ընդունելութեան` փոխանցելով իր շնորհաւորութիւնները:
– 6 հոկտեմբերի հանդիպումին Արշօ Պալեան ներկայացուց լուր գրելու թեքնիքները, լուրի կառոյցին մանրամասնութիւնները, ինչպէս նաեւ առարկայական ու ենթակայական մօտեցումներուն տարբերութիւնները:
– 13 հոկտեմբերին Հայկազեան համալսարանի նախագահ վեր. դոկտ. Փոլ Հայտոսթեան «Ապագայ լրագրողներ»-ուն մատուցեց շահեկան դասախօսութիւն մը: Համաշխարհայնացման ու բոլորին, յատկապէս երիտասարդներուն եւ ուսանողներուն կեանքին մէջ անոր ազդեցութեան մասին լայն տեղեկութիւններ եւ ճշմարտութիւններ յայտնելէ ետք, վեր. դոկտ. Հայտոսթեան կեդրոնացաւ համաշխարհայնացման եւ հայկական կրթակարգի հիմնախնդիրներուն վրայ:
Մտերմիկ մթնոլորտի մէջ ընթացած այս դասախօսութեան ընթացքին վեր. Հայտոսթեան պատմեց, թէ մամուլին հետ իր կապը ինչպէ՛ս սկսած է եւ ապագային ինչպէ՛ս զարգացած: Վեր. Հայտոսթեան նշեց, որ, թէեւ համաշխարհայնացումը սահմանները փլուզած է եւ ստեղծած մեծ դիւրութիւններ, ճկունութիւն ու առատութիւն` տնտեսական մարզին պարագային, տեղեկութիւններու եւ հաղորդակցութեան իմաստով, բայց եւ այնպէս ան ընդգծեց, թէ տեղեկութիւններու առատութեան պարագային ապատեղեկատուութիւնը առաւել եւս կը շեշտուի եւ անոր լարած ծուղակներն ու գործած աւերները կը բազմանան:
Վեր. Հայտոսթեան խրախուսեց «Ապագայ լրագրողներ»-ը` յատուկ խնամքով մօտենալու լեզուի ճշգրտութեան եւ մտքի յստակութեան, պարզութեան ու պայծառութեան:
– 20 հոկտեմբերին ՀՅԴ Լիբանանի տեղեկատուական գրասենեակի պատասխանատու Վիգէն Աւագեան ներկայացուց լրագրութեան տարբեր ժանրերը եւ անոնց ընդմէջէն շեշտը դրաւ տիպար լրագրողի յատկանիշներուն վրայ: Ան շեշտեց, որ լրագրութեան մարզին մէջ գործելու համար պէտք է հետամուտ ըլլալ լուրերուն, ունենալ հետաքրքրութիւն եւ որոնել իրականութիւններ, տեղեկութիւններ ու տուեալներ:
Վիգէն Աւագեան «Ապագայ լրագրողներ»-ուն ներկայացուց լրատուութեան, հարցազրոյցի, թղթածրարի եւ յօդուածագրութեան տեսակները, ինչպէս նաեւ բացատրեց խմբագիրին պարտականութիւնները` ընդգծելով արխիւ պահելու անհրաժեշտութիւնը: Ան անդրադարձաւ նաեւ մամուլի, ձայնասփիւռի, պատկերասփիւռի եւ ընկերային ցանցերու լրագրութեան տարբերութիւններուն:
– 27 հոկտեմբերին «Ապագայ լրագրողներ»-ը կատարեցին լուրերու պատրաստութեան իրենց առաջին գործնական փորձը: Մէկ ժամուան տեւողութեամբ մասնակիցները տարբեր բնոյթի` ընկերային, քաղաքական, մարզական թէ մշակութային լուրեր պատրաստեցին` աղբիւր ունենալով հայկական լրատուական կայքերը:
– 3 նոյեմբերին «Ապագայ լրագրողներ»-ուն հետ հանդիպում ունեցաւ ուսուցիչ, հրապարակախօս եւ հրապարակագիր Կարօ Յովհաննէսեան, որ բացատրեց յօդուածագրութեան կանոնները` անդրադառնալէ ետք յօդուածներուն տարբեր տեսակներուն: Ան նշեց, որ յօդուածի մը ընդհանուր կառոյցը եւ յատկանիշները պէտք է ամբողջացնեն յօդուած մը:
Կ. Յովհաննէսեան բացատրեց, որ յօդուածը պէտք է անպայման նպատակ հետապնդէ, յստակ ուղղուածութիւն պարփակէ, ունենայ գրաւիչ խորագիր: Ան հաստատեց նաեւ կարճ ու յստակ նախադասութիւններով յօդուածներ գրելու անհրաժեշտութիւնը, որպէսզի անիկա դիւրաւ կարդացուի մարդոց կողմէ եւ ըլլայ նպատակաուղղուած:
Այս առիթով Կ. Յովհաննէսեան «Ապագայ լրագրողներ»-ուն յանձնեց յօդուածներու օրինակներ:
– 10 նոյեմբերին «Ապագայ լրագրողներ»-ը հանդիպում ունեցան ՀՅԴ Արցախի Կեդրոնական կոմիտէի ներկայացուցիչ, Արցախի Ազգային ժողովի «Դաշնակցութիւն» խմբակցութեան անդամ Դաւիթ Իշխանեանի հետ: Ան ներկայացուց Արցախի վերջին իրադարձութիւնները` նշելով, որ արտաքին առումով Արցախ միշտ յաջողած է պահպանել միացեալ եւ համախոհական կեցուածք, թէ՛ Արցախի եւ արցախցիին անվտանգութեան, թէ՛ Արցախի միջազգային ճանաչումին նկատմամբ:
Ապա ան լայնօրէն անդրադարձաւ Արցախի պաշտպանութեան համակարգին եւ ընդհանուր արժեւորում մը կատարեց զինուորական ու ռազմավարական փոփոխութիւններուն, որդեգրուած մարտավարութիւններուն, Արցախի բանակը նոր զինատեսակներով օժտելու յառաջընթացին եւ այլն: Ան խօսեցաւ նաեւ արձանագրուած տնտեսական զարգացումներուն մասին, հիմնականին մէջ կեդրոնանալով գիւղատնտեսութեան վրայ` իբրեւ տնտեսութեան յենասիւնը, եւ անոր կողքին վերջին տասը տարիներուն ընթացքին ծաւալած ելեկտրականութեան արտադրութեան եւ հանքերու արդիւնաբերութեան վրայ:
Այս շրջագիծին մէջ Դաւիթ Իշխանեան անդրադարձաւ նաեւ Լիբանանի «Արցախ ֆոնտ»-ի աշխատանքներուն` բարձր գնահատելով լիբանանահայութեան եւ «Արցախ ֆոնտ»-ի դերակատարութիւնը վերաբնակեցման ծրագիրներուն առումով: Ապա տեղի ունեցաւ զրոյց, որուն շրջագիծին մէջ Դ. Իշխանեան պատասխանեց «Ապագայ լրագրող»-ներու հարցումներուն` շեշտելով, որ Արցախի եւ լիբանանահայութեան միջեւ կարելի է շատ աւելի մեծ ծրագիրներ մշակել ու գործադրել, յատկապէս պատանեկան եւ երիտասարդական մակարդակներու վրայ: Ան հաստատեց, որ ՀՅԴ-ն իսկական դերակատարութիւն ունի Արցախի մէջ եւ այդ դերակատարութեան շնորհիւ կրցած է վաստկիլ Արցախի իշխանութիւններուն վստահութիւնը:
– 17 նոյեմբերին «Ապագայ լրագրողներ»-ը հանդիպում ունեցան «Ազդակ»-ի պատասխանատու խմբագիր Նորա Բարսեղեանի հետ, որ ներկայացուց թղթակցութիւն մը պատրաստելու կանոնները: Ան նշեց, որ թղթակցութիւնը պէտք է ըլլայ տուեալ ձեռնարկի մը հայելին` աւելցնելով, որ պէտք է պահել հարազատ մթնոլորտը եւ ճշգրիտ տեղեկութիւններ ներկայացնել որեւէ ձեռնարկի կամ հանդիսութեան մասին:
Ն. Բարսեղեան անդրադարձաւ նաեւ թղթակիցի յատկանիշներուն, որոնց մէջ ան շեշտեց թղթակիցին ճշդապահ, հագուածքով պատշաճ, կազմակերպուած եւ պատրաստ երթալու կարեւորութիւնը: «Թղթակիցը կը ներկայացնէ ո՛չ միայն ինքզինք, այլ նաեւ այն թերթը, որուն անձնակազմին մաս կը կազմէ: Հետեւաբար ամէն իմաստով պէտք է բծախնդիր աշխատանք կատարել թղթակցութեան առաքելութեան ընթացքին», ըսաւ ան:
Նորա Բարսեղեան թղթակցութեան տարբեր օրինակներ ապահովելով փորձեց հարստացնել հանդիպումը «Ապագայ լրագրողներ»-ուն հետ, որոնք իրենց կարգին կարդացին թղթակցութեան տարբեր օրինակներ եւ շօշափելի կերպով ծանօթացան անոնց մանրամասնութիւններուն:
Հանդիպումը ունեցաւ նաեւ աշխատանքային բնոյթ` նկատի ունենալով, որ հանդիպումին աւարտին «Ապագայ լրագրողներ»-ը կատարեցին թղթակցութիւն գրելու փորձ մը:
– 20 նոյեմբեր 2017-ին «Ապագայ լրագրողներ»-ուն հետ հանդիպման հիւրն էր ՀՅԴ Բիւրոյի անդամ, ՀՅԴ Բիւրոյի Հայ դատի եւ քաղաքական հարցերու գրասենեակի պատասխանատու Կիրօ Մանոյեան:
Ներկայացման առաջին բաժինով Կիրօ Մանոյեան ծրագիրին հետեւող «Ապագայ լրագրողներ»-ուն բացատրեց լրագրութեան ձեւերը` անդրադառնալով լրագրութեան, թղթակցութեան եւ խմբագրութեան տարբերութիւններուն, ընդգծելով յատկապէս հայկական իրականութեան մէջ` սփիւռքի հայերէնով արտայայտուող թերթերու դժուարութիւնները եւ մարդուժ պատրաստելու անհրաժեշտութիւնը: Ներկայացման երկրորդ բաժինով ան անդրադարձաւ Հայ դատի յանձնախումբերու կառոյցին, «Ապագայ լրագրողներ»-ուն ներկայացուց աշխարհի զանազան երկիրներուն մէջ գործող Հայ դատի յանձնախումբերու, գրասենեակներու գործելաձեւը, ներկայի մարտահրաւէրները եւ աշխատանքային ոճը: Ան Հայ դատի աշխատանքներու ազդեցութեան կարեւորութիւնը շեշտելով պատմական ներկայացում մը կատարեց գրասենեակներու եւ յանձնախումբերու հիմնադրութեան օրերուն մասին` Միացեալ Նահանգներէն (1940-ական թուականներ) մինչեւ Եւրոպայի Հայ դատի գրասենեակ, Միջին Արեւելքի Հայ դատի գրասենեակ եւ այլ երկիրներու մէջ գործունէութիւն: Ան Հայ դատի գրասենեակներու աշխատանքային օրինակներ ներկայացուց «Ապագայ լրագրողներ»-ուն:
– Լրագրութեան վարժողական ծրագիրին հետեւող «Ապագայ լրագրողներ»-ը 1 դեկտեմբերին «Ազդակ»-ի խմբագրատան մէջ շարունակեցին թղթակցութիւն գրելու իրենց փորձերը: «Ազդակ»-ի պատասխանատու խմբագիր Նորա Բարսեղեան դարձեալ հանդիպեցաւ «Ապագայ լրագրողներ»-ուն եւ լսեց նախորդ հանդիպումին ընթացքին անոնց ստանձնած թղթակցութիւնները: Ն. Բարսեղեան կատարեց որոշ սրբագրութիւններ` ընդհանուր առմամբ դրական գնահատելով անոնց ողջունելի աշխատանքը:
«Ապագայ լրագրողներ»-ուն հետ այս հանդիպումի աւարտին իսկական թղթակցութեան մը երթալու փափաք յայտնուեցաւ, եւ պատասխանատու խմբագիրը խոստացաւ շուտով ընդառաջել այդ փափաքին:
– Անոնց 2018-ի առաջին հանդիպումը` 19 յունուարին եղաւ «Ազդակ»-ի տնօրէն եւ գլխաւոր խմբագիր Շահան Գանտահարեանի հետ, որ հակիրճ կերպով անդրադարձաւ Հայաստանի ներկայ իրավիճակին եւ սահմանադրութեան փոփոխութեան լոյսին տակ հանրապետութեան նախագահի լիազօրութիւններուն նուազումին ու վարչապետի լիազօրութիւններուն յաւելումին` բացատրելու համար, թէ յաջորդ փուլին Արցախի բանակցային հոլովոյթը վարողը պիտի ըլլայ վարչապետը եւ ոչ թէ` նախագահը:
«Ապագայ լրագրողներ»-ը ժամանակագրական դրութեամբ ներկայացուած տեղեկութիւններուն հետեւեցան մեծ հետաքրքրութեամբ, ծանօթանալով նաեւ բանակցային հոլովոյթի շրջագիծին մէջ օգտագործուած թեքնիք եզրերուն եւ անոնց իմաստներուն ու նշանակութիւններուն:
– 26 յունուարին ապագայ լրագրողները առցանց կապով միացաւ ՀՅԴ Բիւրոյի հանրային կապերու գրասենեակի պատասխանատու Արտակ Սարգսեանի հետ, որ Երեւանի իր գրասենեակէն անոնց ներկայացուց նոր տեսակի տեղեկատուութեան մասին իրականութիւններ:
Ա. Սարգսեան ընդարձակ եւ ամբողջական կերպով անդրադարձաւ հանրային կապերուն` լուսարձակի տակ առնելով անոնց երկկողմանի բնոյթը եւ քարոզչութեան փոխանակման դրոյթը:
Ան նշեց, որ համացանցն ու սմարթ հեռախօսներուն ընձեռած կարելիութիւնները փոփոխութեան ենթարկած են տեղեկատուութիւնը` զայն վերածելով ներգործական դաշտի:
– 2 փետրուարին ՀՅԴ արխիւներու պատասխանատու, պատմաբան Երուանդ Փամպուքեան «Ապագայ լրագրողներ»-ուն ներկայացուց ՀՅ Դաշնակցութեան արխիւները գոյացնելու աշխատանքը, այն վայրերը, որոնք եղած են արխիւներու կեդրոններ, անոնց բովանդակութիւնը, ընդգրկած հարուստ տեղեկութիւնները, արխիւի տարբեր ձեւաչափերը, ինչպէս նաեւ` զանոնք դասաւորելու, ցուցակագրելու եւ ապա թուայնացնելու աշխատանքը:
Ե. Փամպուքեան ընդգծեց, որ գանձարանի մը համազօր ՀՅԴ արխիւներու դասաւորման, ցանկագրումի եւ թուայնացման աշխատանքը կը շարունակուի:
– 16 փետրուարին լուսանկարիչ Արա Օշական «Ապագայ լրագրողներ»-ուն ներկայացուց շարք մը լուսանկարներ, որոնց մեկնաբանութեան ընդմէջէն անդրադարձաւ լուսանկարներու զօրութեան եւ լուրերը լուսանկարներու ընդմէջէն կարդալու թեքնիքին:
Ներգործօն այս հանդիպումը վերածուեցաւ առիթի մը, որուն ընթացքին «Ապագայ լրագրողներ»-ը իրենց տեսանկիւնէն դիտելով տարբեր տեսակի լուսանկարներ, փորձեցին պարզապէս նկարագրել լուսանկարները, մեկնաբանել զանոնք, քննադատել, գնահատել եւ մարմնաւորել:
– 23 փետրուարին «Ապագայ լրագրողներ»-ը ծանօթացան օրաթերթի միջազգային եւ շրջանային լուրերու պատրաստութեան մանրամասնութիւններուն:
«Ազդակ»-ի միջազգային լուրերու խմբագիր Վահրամ Էմմիեան ներկայացուց լուրերու ընտրութեան չափանիշները, ինչպէս նաեւ որդեգրուած լրատուամիջոցներն ու լրատու գործակալութիւնները, որոնցմէ պէտք է օգտուիլ:
Ան անդրադարձաւ այն մօտեցումներուն, որ «Ազդակ» նկատի կ՛ունենայ` ճշդելու համար, թէ միջազգային եւ շրջանային առումով ի՛նչ լուրեր պէտք է ամէնօրեայ դրութեամբ ընտրուին օրաթերթին համար:
– 6 ապրիլ 2018-ին «Ապագայ լրագրողներ»-ը սքայփի ընձեռած ուղղակի հաղորդակցութեան ընդմէջէն առիթը ունեցան ծանօթանալու «Սփիւռք» ամառնային դպրոցի լրագրողներու վերապատրաստման դասընթացքի ծրագիրին:
Երեւանէն ուղղակի կապով «Ապագայ լրագրողներ»-ուն միացաւ Երեւանի պետական համալսարանի Հայագիտական հետազօտութիւններու հիմնարկի փոխտնօրէն Մհեր Յովհաննիսեան:
Ան մանրամասնօրէն բացատրեց լրագրողներու վերապատրաստման դասընթացքի ծրագիրն ու նպատակները, ինչպէս նաեւ արձանագրութեան հոլովոյթն ու պայմանները:
– 13 ապրիլ 2018-ին խմբագրատուն այցելեց ՀՅԴ Բիւրոյի հանրային կապերու գրասենեակի նախագահ Արտակ Սարգսեան:
Ան «Ապագայ լրագրողներ»-ուն ներկայացուց Հայաստանի մէջ գործող լրատուական դաշտը` սկսելով պատկերասփիւռի կայաններէն: Ան նշեց, որ պատկերասփիւռի կայանները Հայաստանի լրատուական դաշտին մէջ գերակայ աղբիւր են, որովհետեւ կը ներկայանան իբրեւ ժողովուրդին 70 առ հարիւրէն աւելիին լրատու աղբիւրը:
Ան ակնարկեց նաեւ տպագիր մամուլին` հաստատելով, որ Հայաստանի մէջ անիկա բաւական ետ մնացած է` նկատի ունենալով կայքերու աշխուժութիւնը եւ երկրին մէջ համացանցի գրեթէ 90 առ հարիւր ծածկոյթը:
– 22 յունիս 2018-ին, ՀՅԴ Լիբանանի Հայ դատի մարմինի անդամ Սալբի Պուլղուրճեան – Սիմիթեան «Ապագայ լրագրողներ»-ուն ներկայացուց «Լրագրութեան մէջ բարոյագիտութիւնը» նիւթը:
Ան ըսաւ, որ լրագրութեան մէջ լուրը, անձը, դէպքը, հարցազրոյցը եւ այլ իրականութիւնները պէտք է ներկայացնել իրենց իսկական պատկերով` ճշմարտութեամբ, առանց զանոնք այլակերպելու, նենգափոխելու, դէպի որոշ ուղեգիծ մը առաջնորդելու, ենթադրութիւն կատարելու եւ կամ հարցազրոյց կատարող անձին վերագրելու խօսքեր, որոնք ինք չէ ըսած:
![]()
– 6 յուլիսին ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի «Ապագայ լրագրողներ»-ուն ներկայացուց քարոզչութեան թեւակոխած տարբեր փուլերը:
Երեսփոխան Բագրատունի անդրադարձաւ նաեւ ներկայ քարոզչութեան ձեւերուն, յատկապէս ընկերային ցանցերուն եւ անոնց սանձարձակ գործածութեան` հաստատելով լուրին ճշմարտացիութեան եւ բազմակողմանիութեան հսկելու բծախնդրութեան անհրաժեշտութիւնը:
Նկատի ունենալով պրէօվէի եւ պաքալորէայի պետական քննութիւններուն «Ապագայ լրագրողներ»-էն հինգին արձանագրած յաջողութիւնները` նոյն օրը «Ազդակ»-ի յարկին տակ տեղի ունեցաւ կարկանդակի հատում` շնորհաւորելու համար զանոնք եւ բարեմաղթութիւններ փոխանցելու անոնց:
![]()
– 17 օգոստոս 2018-ին, Մեծի Տանն Կիլիկիոյ Արամ Ա. վեհափառ հայրապետը Պիքֆայայի Ս. Աստուածածին վանքին մէջ ընդունեց «Ապագայ լրագրող»-ները:
Շուրջ մէկ ժամ տեւած հանդիպումին ընթացքին անդրադարձ կատարուեցաւ լրագրութեան աշխատանքի, առարկայական լրատուութեան, վերլուծական յօդուածներու կարեւորութեան, ինչպէս նաեւ լրագրութեան բարոյագիտական արժէքը պահպանելու կարեւորութեան:
Այս նիւթերուն կողքին, «Ապագայ լրագրող»-ները իրենց հարցումները ուղղեցին վեհափառ հայրապետին` հանդիպումը վերածելով զրոյցի:
Արամ Ա. կաթողիկոս ողջունեց «Ազդակ»-ի կողմէ նախաձեռնուած այս ծրագիրը` նշելով, որ հայութեան համար թերթը բառին վաւերական հասկացողութեամբ առաքելութիւն է:
«Երիտասարդութիւնը պիտի գիտնայ, որ ինք մեր կեանքին մէջ կարեւոր տեղ ունի եւ կոչուած է ունենալու առանցքային դերակատարութիւն», շեշտեց Արամ Ա. կաթողիկոս:
![]()
Հանդիպումին աւարտին «Ապագայ լրագրող»-ներէն Քրիստ Իսկէնտէրեան վեհափառ հայրապետին նուիրեց իր գծած Սիսի կաթողիկոսարանի պատկերը:
(Շար. 2)
27 դեկտեմբեր 1940-ին հասարակական, քաղաքական, Հայաստանի Ա. Հանրապետութեան ընթացքին պետական գործիչ եւ դաշնակցական տեսաբան Արշակ Ջամալեանը իր մահկանացուն կնքեց:
