ՄԱՐԶՊԵՏ ՄԱՐԿՈՍԵԱՆ
Կանխելու համար որեւէ դիտողութիւն` հեղինակին անաչառութիւնը կասկածի տակ առնող, ահա իմ բացայայտումը. Վաչէն Յովակիմեան-Մանուկեանի ընկերներէս է եւ իր գրքին, «Դիմաքանդակներ»-ուն մէջ կայ նաեւ… իմ դիմաքանդակը: Բացատրութիւն մը եւս. պիտի անդրադառնամ գրքին մէջ ներկայացուած այն անհատներուն, որոնք մեր երկուքին ուսուցիչները եղան Յովակիմեան-Մանուկեանի աշակերտական մեր տարիներուն: Նոյն դասարանը չէինք, ինք ինձմէ երեք տարի առաջ շրջանաւարտ եղաւ, սակայն բախտը այնպէս բերաւ, որ իր վերջին տարուան ընթացքին մաս կազմէի վարժարանի ուսանողական պարբերաթերթին` «Նուիրում»-ի խմբագրական կազմին: Ինք խմբագիրն էր: Վաչէն «Նուիրում»-ին անդրադարձած է, երբ կը խօսի մեր հայերէնի ուսուցչին` Օննիկ Սարգիսեանի մասին եւ կը յիշէ, թէ ինչպէ՛ս Օննիկ Սարգիսեանը օր մը… պատգամած էր.
– Սեմերճեա՛ն, «Նուիրում»-ի խմբագիրը դուն պիտի ըլլաս:
Վաչէին շրջանաւարտութենէն երեք տարի ետք իմ կարգս էր խմբագիր ըլլալու: Չեմ յիշեր, թէ ո՛վ զիս նշանակեց խմբագրութեան անդամ եւ ապա` խմբագիր, բան մը, որ չնուազեցուց ուրախութիւնս: Ես ալ, ինչպէս Վաչէն, տպագրական փորձերը սրբագրելու համար «Սեւան» տպարան կ՛երթայի եւ հոն կը տեսնէի, կը զրուցէի մեր ուսուցչին` Սիմոն Սիմոնեանի հետ: Իր անմոռանալի դիտողութիւնները սրամտութեամբ յագեցուած վայելքներ էին: Ահա անոնցմէ մին` ուղղուած մեր դասընկերներէն մէկուն.
– Վարդա՛ն (աշակերտին անունը չէ), տղա՛ս, մտքովդ աղաւնի կը թռցնես կոր:
Աշակերտը կարգի եկաւ, բայց թէ դասէն բան մը մնա՞ց իր մտքին մէջ, կը կասկածիմ:
Զարմանալիօրէն, ատկէ շաբաթ մը առաջ կամ շաբաթ մը ետք, Օննիկ Սարգիսեանը եւս դիտողութիւն ըրաւ նոյն աշակերտին: Այս անգամ զգալիօրէն ջղայնացած էր ուսուցիչը, որովհետեւ աշակերտը կ՛ընդմիջէր դասը:
– Ծօ՛, Վարդա՛ն, դուն նոյնիսկ տանիքի քիւէն մերկ կը քալես, որպէսզի մարդոց ուշադրութիւնը գրաւես: Վե՛րջ տուր զեւզեկութիւններուդ եւ ձայնդ կտրէ:
Հոս` Ամերիկայի մէջ, Օննիկ Սարգիսեանը մտքէն պիտի չանցընէր նման բան մը ըսելու, որովհետեւ ծնողներէ բաղկացած զեւզեկ շաղակրատներու… վաշտ մը պիտի արշաւէր` պահանջելով, ոչ աւելի ոչ պակաս, պրն. Սարգիսեանին… գլուխը սկուտեղի վրայ դրուած, ճի՛շդ Յովհաննէս Մկրտիչի գլխուն նման, անկախ այն իրողութենէն, որ դիտողութիւնը հաստատապէս տեղին ըլլար:
Պրն. Օննիկի դասերուն` հայերէնի ու հայոց պատմութեան, կը սպասէի ակնդէտ: Կարելի չէր չսիրել իր դասն ու զինք, ինչպէս Վաչէն բաւականին յստակ ու անվարան կը հաստատէ: Տաք էր, անմիջական ու հաղորդական: Վճիտ աղբիւրի մը նման` անվերջանալիօրէն կը խօսէր, կը պատմէր, կ՛ունկնդրէր մեր պատասխաններուն` բծախնդիր ուշադրութեամբ: Ուղղագրութեան պահու մը գլուխս յենած էի ձախ ձեռքիս վրայ եւ ուշի ուշով կը գրէի կարդացուած կտորը: Շատ չանցած… հրահանգեց.
– Ձեռքդ վա՛ր առ: Գլուխդ այնքան ծանր չէ, որպէսզի յենակ գործածես: Ձախ ձեռքով տետրակը բռնէ, որպէսզի շնորհքով գրես:
Ատկէ ետք, ամէն անգամ որ բան մը պէտք էր գրէի, կը յիշեմ դրուագը ու պահ մը կը տատամսիմ` բռնա՞ծ եմ թուղթը, թէ՞ ոչ:
Վաչէն սխալած չէ, երբ կ՛եզրակացնէ` «…յստակօրէն կրնամ… հաստատել, որ հայերէն լեզուն, եթէ սիրեցի եւ անոր հետ մեծցայ, եթէ անով ապրեցայ, ուր որ գացի այս աշխարհի վրայ, անով մտածեցի, եթէ պէտք ունէի օտար լեզուով ալ խօսելու, կը պարտիմ Օննիկ Սարգիսեանին», եւ անոր` Վաչէին ըրած հաստատումին հետ համաձայն պիտի ըլլային ու չեմ կարծեր, որ չափազանցած կ՛ըլլամ, եթէ ներառեմ իր աշակերտները բոլոր: Վաչէն ըսած է այն, ինչ որ միւս աշակերտները պիտի ուզէին ըսած ըլլալ:
Օննիկ Սարգիսեանին դասաւանդած հայոց պատմութեան դասի մասին կարծիքները տարբեր չեն կրնար ըլլալ: Այդ դասին համար կը գործածէինք Սիմոն Սիմոնեանին եւ Օննիկ Սարգիսեանին հեղինակած դասագիրքը: Այդ օրերուն մենք դժուարութիւն չունեցանք կարդալու ու մանաւանդ հասկնալու համար թէ՛ հայերէնը եւ թէ՛ հայոց պատմութիւնը, ինչպէս մեզմէ տարիներ ետք եկող աշակերտները ունեցած կը թուին ըլլալ` հետեւցնելով ՀԲԸՄ-ի պաշտօնաթերթին, «Յուշարար»-ի մէջ լոյս տեսած տեղեկագրէ մը: Տեղեկագրի մէջ ըսուած էր, որ աշակերտները… դժուարութիւն կ՛ունենային դասագրքին հայերէնը հասկնալու ու կը գանգատէին գրքին անհասկնալիութենէն:
Կը մէջբերեմ Վաչէին բացատրութիւնը իբրեւ պատասխան մեր` հիներուս բոլորէն, հայերէնի, հայոց պատմութեան ու Օննիկ Սարգիսեանի մասին.
– Չեմ կարծեր, որ հայերէնի ու գրականութեան այդ շռայլանքը վայելէր այսօրուան ուսանողը, դժուար է մէկ տեղ գտնել ա՛յդ որակով հայերէնի ուսուցիչներու առատ հոյլը` հայկական վարժարանի մը մէջ (Ճեմարանի մէջ Լեւոն Շանթը, Աղբալեանը, Կարօ Սասունին, Մուշեղ Իշխանը` իրենց կարգին ու իրենց ժամանակներուն… շատ բախտաւոր ուսանողներ էինք մինչեւ 1960 թուականը` Յովակիմեան-Մանուկեան աւարտած ուսանողներս: Կը կրկնեմ, իրա՛ւ բախտաւորութիւն մըն էր, որմէ կրցանք օգտուիլ: Իսկ այս բոլորէն զրկուածները գիտակի՞ց են իրենց զրկանքին:
Դիտողութիւն մը անհրաժեշտ է հոս` վերջին հարցումին հետ աղերսուող: Եթէ այդ աշակերտները տեսած չեն այն, ինչ որ մենք բախտն ունեցանք տեսնելու ու անյագուրդ ըմբոշխնելու, ինչպէ՞ս կրնան գիտակից ըլլալ իրենց չտեսածի կորուստին:
Վաչէին տուած տեղեկութիւնները Օննիկ Սարգիսեանի մասին` իբրեւ «Շիրակ»-ի խմբագրի եւ գրականագէտի ու գրողի («Օննիկ Սարգիսեանի… Հետքերով»), Լիւսի Սիւլահեանի խմբագրութեամբ, ինչպէս նաեւ` Արամ Սեփեթճեանի խմբագրած հատորներով, կը կերպագրեն գրականագէտը, վաստակաւոր քննադատն ու գրողը:
Այն օրերուն, երբ այս բոլորը տեղի կ՛ունենային, Պէյրութի մէջ կային ելեկտրական հանրակառքեր, որոնք սքանչելի փոխադրամիջոցներ էին` առանց յառաջացնելու ներկայի երթեւեկային քաոսը ու մթնոլորտը ապականող ինքնաշարժներու ծուխը: Օննիկ Սարգիսեան կը բնակէր Պուրճ Համուտի Տորա թաղամասին մէջ, մեր տունէն երկու-երեք հարիւր մեթր անդին: Երբեմն միասին կ՛ըլլայինք հանրակառքին մէջ: Ինք կ՛իջնէր վերջին կայանը, ես կայան մը առաջ: Յաճախ միասին կ՛իջնէինք, որպէսզի չընդմիջէինք մեր խօսակցութիւնները: Հանրակառքերու զրոյցներէն անկախ, ամրան ընթացքին կ՛այցելէի իրեն` միասին սուրճ մը առնելու: Վաչէին ակնարկած հիւմըրով դրուագ մը պատմեց.
– Մեր գրողները տարօրինակ են: Եթէ գիրք մը հրատարակեն, ու բան մը չըսես, կը գանգատին, որ կ՛անտեսուին: Իսկ եթէ գրախօսես, կրկին կը գանգատին, թէ ինչո՛ւ չես ըսած, որ տուեալ գրողը իր սերունդին «ամէնէն տիրական» դէմքն է, «լաւագոյն» գրողը: Թերեւս ալ օր մը զիս պիտի ամբաստանեն, թէ ինչո՛ւ զիրենք… Նոպէլեան մրցանակի յարմար չեմ նկատած: Թուհաֆ մարդիկ են, երբեմն մեր զեւզեկ կիները փնտռել կու տան:
Վերջաւորութեան Վաչէն կ՛անդրադառնայ Օննիկ Սարգիսեանի դժուարութիւններուն: Այդ բոլորը տեղի ունեցան եւ պիտի շարունակեն տեղի ունենալ, որովհետեւ կարգ մը մարդոց զլացուած է ստեղծագործական հրայրքը եւ ուրեմն զայն պէտք է փոխարինեն նենգամտութեամբ: Այդ իրականութիւնը չի փոխուիր: Կ՛անտեսուի միայն:
* * *
Կեանքի վերջին տարիներու դառնութիւնը բաժին է ինկած նաեւ Գերսամ Ահարոնեանին, ինչպէս կ՛իմանանք անոր նուիրուած դիմաքանդակէն: Կ՛երեւի, որ մեր գործիչներէն, գրողներէն շատերու ճակտի գիրն է` դէպի յուսախաբութիւն տանող դառնութիւնը: Բայց այնքան ատեն որ չեն ընկճեր անհատը, այդ դառնութիւնը պէտք է նկատել կնիքը` բացառիկ տաղանդի ու խիզախութեան, որոնք կը պատուաստեն տուեալ անհատը անխուսափելի վատութեանց դէմ:
Վաչէի այս գրքին քանդակները կը յիշեցնեն Անդրանիկ Ծառուկեանի «Մեծերը եւ միւսները» գործը` տարբերութեամբ մը, գրքին մէջ կը հանդիպինք ու կը ծանօթանանք «Մեծեր»-ուն հետ, առանց որ «Միւսներ»-ը յայտնաբերուած ըլլան: Վստահաբար Գերսամ Ահարոնեանը կը դասուի «Մեծեր»-ու շարքին` թէ՛ իր հեղինակութեամբ եւ թէ՛ իբրեւ դաստիարակ` մատղաշ պատանիներու ազգային անհատականութիւնը դարբնող եւ որպէս հաւատաւոր գաղափարախօս` ազգային մեր ստուգութիւնը ճարտարապետող: Գերսամ Ահարոնեանին ես ալ աշակերտած եմ երկրորդական Բ. դասարանէն մինչեւ աւարտական` երկրորդական Ե. դասարան: Երկրորդական Բ. դասարանէն սկսանք իրեն հետ ընդհանուր ազգաց պատմութեան դասին, հետագային նաեւ` Անգլիոյ պատմութեան եւ հայոց պատմութեան դասերուն: Անգլիոյ պատմութիւնն ու անոր նուիրուած խրթին դասագիրքը ինծի համար կը մնան առեղծուածային եւ անվերծանելիօրէն անհասկնալի: Բայց այնքան մը հասկցած պէտք էր ըլլայի, որպէսզի յաջողէի այդ դասի քննութեան Օքսֆորտ ու Քեմպրիճ General Certificate Examination-ին:
Պրն. Ահարոնեանին չորս տարուան աշակերտութեան ընթացքին ան ո՛չ մէկ ատեն ոտքի է կանգնած դասապահերուն: Ներս կը մտնէր, կ՛երթար ուսուցչի սեղանին ու կը նստէր աթոռին: Իր ամպիոնէն վար կ՛իջնէր դասի վերջաւորութեան միայն: Բացի` միակ առիթէ մը: Սխալ չհասկցուիմ, այդ ոտքի չկենալը իր… ծուլութեան չէ, որ կը վերագրեմ, պարզապէս որովհետեւ խելք ունենալը անհրաժեշտ չէր գիտնալու, թէ որքա՜ն բազմազբաղ պէտք էր ըլլար ան եւ որքա՛ն յոգնած: Զարմանալի էր ուրեմն, որ ժամանակ կը գտնէր նաեւ ուսուցչութեամբ զբաղելու: Թերեւս լաւ է, որ այդպէս եղաւ. եսասէր ըլլալու գնով պէտք է ըսեմ, որ բախտաւորներ էինք իրեն աշակերտած ըլլալնուս համար: Այլապէս շատ բան կորսնցուցած պիտի ըլլայինք:
Ահա այն միակ պահը, չորս տարուան մէջ մէկ անգամուան համար` մեր վերջին տարուան առաջին պահուն, վաւերական գործիչի մը վայել ամբողջական վեհութեամբ կանգնած էր… գրատախտակին առջեւ եւ կը գծէր Հայաստանի սահմաններու ուրուագիծը` երկար դէպի արեւմուտք գացող կոր անկիւններով ուղղանկիւն մը` թրքական հրուանդանը: Աջ կողմը, կրկին կոր անկիւններով ուղղանկիւնի վերջաւորութիւնը` մատնանշելով Սեւ ծովն ու Միջերկրական ծովը: Քարտէսին վրայ ճշդեց Արեւմտեան Հայաստանի ու Կիլիկիոյ… քոորտինաթները, ինչպէս երեւանցիք պիտի ըսէին, որպէսզի յստակ ու ճշգրիտ պատկերը ունենայինք` մեր մտքերուն մէջ դրոշմուած, մեր ժողովրդի ողբերգութեան տեղագրութեան մասին: Քանի մը մանրամասնութիւններ շեշտեց ու իր աթոռին վերադարձաւ: Նստաւ տեղը ու սկսաւ յօրինել ամէնէն առինքնող, ամէնէն սրտառուչ, գրեթէ առասպելական ու եղերականօրէն անհաւատալի դիւցազներգական պատմութիւնը` 1895-էն մինչեւ 1921-ի ժամանակահատուածին: Կարծէք` ամբողջ կեանք մը ուսումնասիրած էր (հաւանաբար այդպէս ալ էր) այդ պատմութիւնը ու անձնապէս կը ճանչնար դերակատարները այդ պատմութեան ու մասնակից էր եղած հերոսական, ինչպէս եւ մեր պատմութեան ահռելիօրէն անփառունակ պարտութեան` Կարսի անկումով վերջացած: Պատմեց մէկ կտոր` առանց շունչ առնելու, բացառելով բնախօսական շնչառութիւնը, որ իրմէ կախում չունէր, խօսեցաւ, պատմեց երկարօրէն, անձանձրոյթ` միջնադարեան յանկարծաբան աշուղներու նման, որոնք յանպատրաստից դիւցազնապատումներ կը հիւսէին: Մեզ` աշակերտներս իրեն կապուած կը պահէր եւ առանց որեւէ ճիգի` սքանչելիօրէն յաջողած էր… հմայել մեզ իր հեքիաթային պատմութեամբ` միեւնոյն ատեն վերջ տալով աշակերտական մեր աղմուկին: Խօսեցաւ ամբողջ տարին եւ չեմ յիշեր, թէ մեզմէ ոեւէ մէկը դասի հանե՞ց, թէ՞ ոչ: Ես գոնէ չեմ յիշեր այդ դասապահերուն հարցաքննուած ըլլալ եւ ուրախ էի այդպէս ըլլալուն, ոչ թէ որովհետեւ դասի չէի ելած, այդ օրերուն կրնայի գրեթէ տառացիօրէն վերարտադրել այն, ինչ որ բացատրած ու ինչպէս որ մեկնաբանած էր պատմութիւնը` արժեւորելով զայն կերտողներու իրագործումները: Ինչ որ կ՛ըսէր հեքիաթ չէր, այլ` մեր ժողովրդի արիւնով թաթախուած դաժանօրէն իրաւ պատմութիւնը: Կարելի չէր անուշադիր ըլլալ այդ պահերուն, ապացոյց` ոչ մէկ դիտողութիւն ըրաւ աշակերտները կարգի հրաւիրելու համար: Կարծէք` այդ տարիքին կ՛անդրադառնայինք, որ կարեւոր երեւոյթի մը վկաները կ՛ըլլայինք: Երբ վերջապէս կարգը հասաւ ստուգելու մեր հասկացումն ու ըմբռնումը այդ պատմութեան` աւարտական քննութիւններով, պատրաստ էինք բոլորս: Տարեվերջի բոլոր քննութիւնները կը տեւէին 90 վայրկեան: Հայոց պատմութեան քննութեան համար երբ նստանք, հարցումները, այս պարագային, միակ հարցում մը տրուեցաւ: Հարցումը այնպէս կառուցուած էր, որ աշակերտը պէտք էր գիտնար այն, ինչ որ ըսած էր նախորդ ուսումնական ամբողջ տարեշրջանին: Հարցումը կարդալէս ետք սկսայ գրել` մէկ շունչով, առանց կանգ առնելու, մինչեւ վերջ: Երեսուն էջ էի գրեր: Յանձնեցի, ու ելանք դուրս: Հոս պէտք է շեշտեմ նաեւ այն երեւոյթը, որ պրն. Ահարոնեան այդ ամբողջ տարուան դասընթացքը տուաւ առանց որեւէ նոթի: Ձեռքին ոչ մէկ թուղթի կտոր կար` իբրեւ նոթ, իրականութիւն մը, որ աւելի կը շեշտէր գիտելիքներու իր տարողութիւնը եւ ինքնավստահութիւնը, չվրիպեցնող յիշողութիւնը, որպէսզի իւրաքանչիւր դասապահ սկսէր ճիշդ այն տեղէն, ուր նախորդ պահը աւարտած էր:
Այդ դասերը ձեւով մը իր սեւագրական աշխատանքներն էին «Մեծ երազի ճամբուն վրայ» գործին, որուն կարեւորութիւնը շեշտած է Վաչէն իր «Դիմաքանդակ»-ին մէջ` «…գործը Հայկական հարցի 19-րդ դարու սկիզբէն մինչեւ 20-րդ դարու 60-ական թուականները հասնող Հայ դատի պատմութեան ընդարձակ մեկնաբանութիւններով հարուստ գիրք մըն է»: Իրմէ մնացած գործերուն մաս կը կազմեն նաեւ` «Յուշամատեան Մեծ եղեռնի» գործը, որ «իր տեսակին մէջ իւրայատուկ է եւ անկրկնելի», կ՛արժեւորէ Վաչէն, իսկ «Յուշամատեան»-ը իր գիրքը չէ, այլ յղացած ու խմբագրած է զայն ի մի բերելով «մտաւորականներու փաղանգ մը»` Հայաստանէն ու սփիւռքէն, որոնք իրենց յօդուածներով նպաստած են հազարէ աւելի էջերով հատորին: Տարի մը ետք «Խոհեր յիսնամեակի աւարտին» հատորով Գերսամ Ահարոնեան գնահատականը կու տար յիսնամեակի առիթով տարուած աշխատանքներուն:
Հիմնական նուաճում մը տեղի ունեցաւ յիսնամեակին. մեր ժողովուրդը, առաջնորդուած` իր կաթողիկոսով, մտաւորականներով եւ շնորհիւ համայնական հաւատաւոր ուսանողներու աննկուն ու հետեւողական պայքարին, յաջողեցաւ ի մի գալ` միասնականօրէն նշելու Ցեղասպանութեան յիսնամեակը եւ ազգային-քաղաքացիական նոր զարթօնքի յառաջացումը իրականացնելով: Ինչպէս այդ օրերուն եւ աւելի շեշտակիօրէն լիբանանեան քաղաքացիական կռիւներու շրջանին, մեր ժողովուրդի համատեղումը, համախմբումը` իրապէս ըլլալու մէկ ժողովուրդ կրկին ու կրկին անգամ հաստատեց, թէ գաղափարական ի՛նչ երանգ որ գոյութիւն ունի մարդոց մօտ, ժամանակը ցոյց տուաւ այդ գաղափարական տարակարծութեանց եթերային ու կեղծ բնոյթը, որովհետեւ համայնական վերահաս վտանգին առջեւ ժողովուրդը իր բնազդով մէկտեղուեցաւ` իր գոյութենական վտանգը դիմագրաւելու:
Գերսամ Ահարոնեանը ըլլալով զտարիւն հայ ու հեռահայեաց առաջնորդ, յիսնամեակին եւ անոր յաջորդող տարիներուն գոյութիւն առած միասնականութեան կերտողներէն մին եղաւ` միշտ հաւատալով ու հաւատարիմ մնալով այն մեր հոգիներուն ու մտքերուն մէջ ամրագրուած անվիճելի սկզբունքին, թէ «Մեծ երազի» իրագործումը կը պահանջէր, կը հրահանգէր միասնական, հաւաքական ու մանաւանդ հետեւողական աշխատանք: Այն ուսուցիչը, որ կողմնակի նստած` դասարանի իր ամպիոնին, եւ որուն դէմքէն հեգնական ժպիտը կարծէք վերջնականօրէն անհետացած էր, երբ կը խօսէր, կը բացատրէր, կ՛ուսուցանէր, մէկ խօսքով, կը կռանէր մեզ` իր աշակերտները: Այս էր Գերսամը` զրահուած բացառապէս ազգային գաղափարախօսութեան ամրաշապիկով, մոռցած` անցողիկ ու ժամանակաւոր կուսակցական նկատումները: Կը հաւատար գործածուած ամէն մէկ բառին յառաջացուցած ազդեցութեան: Այդ ելոյթներու շարքը հիւսած ուսուցիչը չէր կրնար մասնակցած չըլլալ իր ժողովուրդի միասնականութեան կերտման:
Վաչէն կ՛ակնարկէ ներկուսակցական ստերջ պայքարներու, որոնք խլած են իր սուղ ժամանակէն` ձեւով մը արգիլելով ստեղծագործական խոյանքին թափը իր լրումին հասցնելու: Այդ անհարկի շեղումը գերագոյն գինն էր, որ Գերսամ Ահարոնեանը կրնար վճարած ըլլալ իր կեանքի վերջին տարիներուն: Միակ մխիթարական իրողութիւնը այն է, որ ըլլալով խորապէս յանձնառու ու գաղափարական մարդ` չէր կրնար… լիլիփութներու նախանձը չշարժել:
Օննիկն ու Գերսամը, ինչպէս նաեւ Վահէ-Վահեանը Յովակիմեանը վերածեցին այն ինչին, որ եղաւ` ժրաջան մեղուափեթակի մը, ուրկէ դուրս եկան մեր կեանքին մէջ գործող հասարակական գործիչներու յանձնառու խումբը: Այդ բոլորը յաջողեցան, որովհետեւ անհատը, որ նշանակուած էր վարժարանը ղեկավարելու, տնօրէնը` Արա Թոփճեան, ժամանակի մարդն էր, տնօրէն մը, որ գիտէր, թէ ի՛նչ պէտք էր ըլլար վարժարանին առաքելութիւնը եւ ի՛նչպէս հունաւորել աշակերտներու հսկայական կարողականութիւնը: Իր խստութեամբ, երբեմն նաեւ իր զարտուղութեամբ եւ մանաւանդ տաղանդով վերածուեցաւ Յովակիմեան-Մանուկեանը բնորոշող դէմքին: Բախտաւորուեցաւ ինք, ինչպէս` պրն. Օննիկն ու պրն. Գերսամը, տեսնելով, վկայելով յաջողութիւնը իրենց աշակերտներուն եւ անոնց բերած նպաստով` մեր ազգային կեանքին:
Վաչէն ճիշդ է, երբ կ՛ըսէ, որ Թոփճեանը միայն տնօրէն չէր, այլ նաեւ` անգլերէնի ուսուցիչ ու կը յիշէ անոր տուած դասը, որ մղած է զինք եզրակացնելու, թէ` «Թոփճեանին ըրածը պարզ ժամավաճառութիւն էր, որմէ ո՛չ մէկ բան ունէինք սորվելու եւ արդէն չէինք ալ հասկցած դասաւանդածը» բնորոշում մը, որ կը թակէ անհարկի ու խստապահանջութեան դռները` առանց ամբողջութեամբ ճիշդ ըլլալու: Հետեւաբար բացատրութիւն մը անհրաժեշտ է հոս: Մեզի ալ անգլերէն դասաւանդեց: Ունէինք ընթերցանութեան դասագիրք մը` ափէ մը ոչ շատ մեծ, հաստկեկ, որմէ կտորներ կը նշանակէր ու դասաւանդութեան պահերուն մեզ կարդալ կու տար: Կը հարցաքննէր եւ ընդհանրապէս ինք կը պատասխանէր իր հարցումներուն: Այդ հարցումները կը միտէին վերլուծել տուեալ կտորը: Այդ պահերուն էր, որ սորվեցանք` ինչպէ՛ս գիրք մը պէտք էր կարդալ ու ջանալ վերլուծել կարդացուածը, ճիշդ այնպէս, ինչպէս Վահէ-Վահեանը կ՛ընէր հայ գրականութեան պահերուն:
Թոփճեանը միայն տնօրէն չեղաւ, այլ նաեւ բնօրինակ` դաստիարակին, թերեւս նաեւ` գրողի, կրթական մշակի, որուն կարելի էր փորձել հասնիլ` չմոռնալով բնաւ ժողովրդին հանդէպ ծառայական պատրաստակամութիւնը` կրթութեան ճամբով, մնալու մեր կեանքի պատնէշին վրայ եւ ընտրել պայքարները ճիշդ ձեւով ու պայքարիլ գաղափարներու պաշտպանութեան համար, չմոռնալով բնաւ այն հիմնարար սկզբունքը, թէ որեւէ գաղափար, որքան ալ` գրաւիչ ու վեհ, չի կրնար փոխարինել ժողովուրդն ու անոր ակնկալիքները` ինքզինք նորոգելու եւ գոյատեւելու: Այդ բոլորը մեզի սորվեցուցին անոնք, որոնց այստեղ անդրադարձայ, եւ անոնք, որոնք Յովակիմեան-Մանուկեանը վերածեցին մեր ազգային մշակութային մեհեանին: Վաչէին «Դիմաքանդակներ»-ու շարքը կը մէկտեղէ սիրելի անուններ, դէմքեր, որոնցմէ իւրաքանչիւրը բերած է իր ուրոյն նպաստը` մեր կեանքը քիչ մը աւելի շքեղացնելու: Հատորը ցուցասրահն է, ուր Վաչէն բծախնդրօրէն կը ծանօթացնէ իւրաքանչիւր դիմաքանդակը` մարդոց, որոնք գրքին էջերէն կը բարբառին այս անգամ ոչ անպայմանօրէն իրենց ուզած ձեւով, այլ ինչպէս Վաչէն ուզած է, որ անոնք խօսին: Այցելուները, այս պարագային` ընթերցողները, կը հաղորդուին անոնց շունչով, անոնց պատգամներով եւ, ինչո՞ւ չէ, նաեւ առիթ տալով աշակերտին, աշակերտներուն` յիշելու զիրենք, հաստատելու այն անխառն ու անմնացորդ յարգանքն ու սէրը, որ իրենցն է, որ չի նուազիր տարիներու անցումով, ու մակարդուելով, վերածուելով մշտանորոգ սիրոյ ու երախտիքի` ճիշդ Վաչէին պատկերած յուշերու գրաւիչ տեսերիզին նման:
smargossian@sbcglobal.net
16 յուլիս, 2017
Լոս Անճելըս