Շարլ Ազնաւուրի սիրային նամակները, որոնք հասցէագրուած են Քլոտ Մեսսիա անունով աղջկան, յունիս 28-ին աճուրդի հանուեցան Ֆրանսայի մէջ, կը յայտնէ «ՌԻԱ Նովոսթի»-ն «Le Figaro»-ի վրայ յղումով:
Երգիչը 6 տարի նամակագրական կապի մէջ եղած է 20-ամեայ աղջկան հետ, որուն հանդիպած է 1958-ին եւ` սիրահարած: Ազնաւուրը այն ժամանակ 34 տարեկան էր: Ազնաւուրի նամակները կը յիշեցնեն անոր լաւագոյն սիրային երգերու բառերը:
Պահպանուած է 42 ձեռագիր նամակ, 9 բացիկ և 9 հեռագիր: Նամակագրութեան 118 էջի արժէքը փորձագէտները կը գնահատեն 30-40 հազար եւրօ:
Շարլ Ազնաւուրը մահացած է 2018 հոկտեմբեր 1-ին, 94 տարեկանին: Ազնաւուրը, որ վերջերս վերադարձած էր Ճափոնի համերգային շրջագայութենէն, մահացած է իր տան մէջ, Ֆրանսայի հարաւ-արեւելքը:
Շարլ Ազնաւուրը (իսկական անունը` Շահնուր Վաղինակ Ազնաւուրեան) ծնած է 1924 մայիս 22-ին Փարիզ, հայ գաղթականներ Միշա եւ Քնար Ազնաւուրեաններու ընտանիքին մէջ: Ան ֆրանսահայ նշանաւոր երգիչ, երգահան, գրող, դերասան եւ հասարակական գործիչ է, 1988-ի սպիտակեան աւերիչ երկրաշարժէն անմիջապէս ետք հիմնադրած է «Ազնաւուրը` Հայաստանին» բարեգործական հիմնադրամը: 2009 թուականի մայիսէն Զուիցերոյ մէջ Հայաստանի դեսպանն է, Հայաստանի մնայուն դեսպանն է ԵՈՒՆԵՍՔՕ-ի մէջ:
Ազնաւուրը շուրջ 1000 երգի հեղինակ է (մէկ մասը` երգահան Ժորժ Կառվարենցի հեղինակցութեամբ), որոնց մէջ, բազմաթիւ միջազգային երգեր` «Մաման», «Պոհեմը», «Դեռ երէկ», «Երիտասարդութիւն», «Պէտք է գիտնալ», «Ան», «Երկու կիթառ», «Ինչպէս կ՛ըսեն», «Յաւերժական սէր», «Աւէ Մարիա» եւ այլն: Ցայսօր վաճառուած է Ազնաւուրի շուրջ 100 միլիոն ձայնապնակ: Ամերիկեան «Թայմ» հանդէսին համաձայն, Ազնաւուրը ճանչցուած է «Դարի արուեստագէտ»: Արժանացած է Հայաստանի եւ Ֆրանսայի բարձրագոյն պետական պարգեւներուն եւ «Պատուոյ սեզարի» (1997):