Մարտ 6-ին Եւրոպական խորհրդարանին մէջ տեղի կ՛ունենայ «Հայատեացութիւն. պատմական եւ արդի դրսեւորումները» խորագիրով համաժողովը` ՀՅԴ Եւրոպայի Հայ դատի գրասենեակի եւ «Թուֆենկեան» հիմնադրամի նախաձեռնութեամբ:
ՀՅԴ Հայ դատի Եւրոպայի գրասենեակի հաղորդակցութեան պատասխանատու Յարութ Շիրինեանը «Երկիր» կայքէջին հետ զրոյցի ընթացքին նշեց, որ համաժողովի գլխաւոր զեկուցողներն են` թուրք պատմաբան, Հայոց ցեղասպանութեան իրողութեան պաշտպան Ռակըփ Զարաքոլուն, որ թրքական իշխանութիւններու կողմէ բազմիցս հալածուած է այդ պատճառով, Արցախի մարդու իրաւունքներու պաշտպան Արտակ Բեգլարեանը, Արցախի մարդու իրաւունքներու նախկին պաշտպան Ռուբէն Մելիքեանը, լրագրող, պլոկըր Ալեքսանտր Լափշինը, որ Արցախ այցելելու պատճառով ձերբակալուած էր ազրպէյճանական իշխանութիւններուն կողմէ, եւ լեհ հայագէտ Եակուպ Օշիեցկին:
«Գիտաժողովի ընթացքին կը ներկայացուին հայատեացութեան պատմական եւ արդի դրսեւորումները, կը քննարկուին այս երեւոյթին դէմ պայքարի տարբեր ձեւերն ու միջոցները: Ուշ կամ կանուխ արցախեան հիմնախնդիրին եւ Թուրքիոյ հետ փոխյարաբերութիւններու կարգաւորման քաղաքական լուծում կ՛առաջարկուի, եւ տարածաշրջանի բոլոր հասարակութիւնները իրարու հետ պէտք է ապրին խաղաղ պայմաններու մէջ: Այսօր Ազրպէյճանի ժողովուրդը պատրաստ չէ ատոր, քանի որ հայերու նկատմամբ ատելութիւնը փոքր տարիքէն կը սերմանուի: Մեր նպատակներէն մէկն է նաեւ` ապահովել միջազգային կազմակերպութիւններու մասնակցութիւնը այս երեւոյթի դէմ պայքարին եւ ապագային զայն կասեցնելու համար», նշեց Շիրինեանը:
Շիրինեանը յայտնեց, որ համաժողովի հիմնական զեկուցողներէն են Արցախի մարդու իրաւունքներու պաշտպան Արտակ Բեգլարեանը եւ նախկին պաշտպան Ռուբէն Մելիքեանը: «Անոնք կը ներկայացնեն ամբողջութեամբ փաստերու վրայ հիմնուած տեղեկութիւններ: Ներկաները հնարաւորութիւն կ՛ունենան ծանօթանալու 2018 թուականի սեպտեմբերին Արցախի մարդու իրաւունքներու պաշտպանին կողմէ հրապարակուած` հայատեացութեան վերաբերեալ զեկոյցի բովանդակութեան: Անկէ բացի` պիտի ներկայացուին ապրիլեան պատերազմի ժամանակ արձանագրուած հայատեացութեան դրսեւորումները», աւելցուց ան:
Խօսելով այն մասին, թէ որո՛նք են համաժողով հրաւիրելու գլխաւոր թիրախը եւ նպատակը, Յարութ Շիրինեանը պարզաբանեց. «Ամէն անգամ, երբ Եւրոպական Միութեան ամենաժողովրդավարական բեմ Եւրոխորհրդարանի մէջ հայկական ձեռնարկ տեղի կ՛ունենայ, բնականաբար մենք խօսք կ՛ուղղենք միջազգային հանրութեան, միջազգային հաստատութիւններուն, հեղինակաւոր եւրոպական քաղաքական գործիչներուն, Եւրոխորհրդարանի պատգամաւորներուն, հասարակական կազմակերպութիւններուն եւ եւրոպական լրատուամիջոցներուն: Մեզի համար շատ մեծ կարեւորութիւն ունի հայատեացութեան թեմայի բարձրաձայնումը այսպիսի բեմերէ, որովհետեւ մենք համոզուած ենք, որ մեր ժողովուրդի այսօրուան համահայկական խնդիրներու առաջնային պատճառը թուրք եւ ազրպէյճանական հայատեաց դիրքորոշումն է: Փաստօրէն այդ քաղաքականութիւնը պատմական անցեալի մէջ չէ մնացած, ներկային ալ մենք պարբերաբար կ՛առերեսուինք այդ խնդիրին: Ահա այս համաժողովը շատ լաւ առիթ է, որ եւրոպական կարեւոր այս կառոյցին մէջ բարձրաձայնուին հայատեացութեան վերաբերեալ հարցերը եւ քննարկուին անոնց դէմ պայքարի ուղիները», ընդգծեց ան:
Համաժողովը կը հիւրընկալէ Եւրոխորհրդարանի պատգամաւոր, Եւրոմիութիւն-Հայաստան բարեկամական խումբի ղեկավար Էլենի Թէոխարիուսը: Համաժողովին պիտի մասնակցին Եւրոխորհրդարանի պատգամաւորներ, հասարակական գործիչներ եւ հայ համայնքի ներկայացուցիչներ: Յարութ Շիրինեանը վստահ է, որ Ազրպէյճանի ու Թուրքիոյ հայատեաց քաղաքականութեան մասին պէտք է տեղեկացուած ըլլայ միջազգային հանրութեան աւելի լայն շրջանակ: