Մեր թերթը այսօր դարձաւ 92 տարեկան: Տպագիր մամուլի ապրած աննախընթաց ճգնաժամի պայմաններուն մէջ յարատեւելու, առընթեր նոր ծրագիրներ մշակելու «Ազդակ»-ի աշխատակազմի հաւաքական կամքը պարտաւորեցնող է բոլորիս համար` խմբովին թիավարելու գործընթացը շարունակելու եւ փոխօգնութեամբ թին, թիերը չհանգչեցնելու:
Մինչեւ 93-րդ տարին թեկակոխելը ինը ամիս ունինք մեր առջեւ եւ յագեցած ծրագիր մը մեզ կը սպասէ շուրջօրեայ աշխատանքներուն եւ աւանդականացած նախագիծերուն առընթեր գաղափարաբանական յաւելուած լոյսին բերելու, խորհրդաժողով կազմակերպելու, քննարկման աշխատանոցներ նախաձեռնելու, ելեկտրոնային գրադարանը մամուլի այլ հաւաքածոներով համալրելու, երիտասարդ մարդուժի պատրաստութեան հետեւողականութիւնը պահելու, արաբատառ «Ազդակ»-ին զարկ տալու եւ յատկապէս ընկերային ցանցերու բոլոր տիրոյթներուն վրայ տարբեր բովանդակութեամբ ներկայ դառնալու:
Հայ մամուլի տարին բարոյական պարտաւորութիւններ կը դնէ մամուլի իւրաքանչիւր գործիչին վրայ` գործնապէս արժեւորելու մամուլի նորօրեայ առաքելութիւնն ու վերաձեւաւորուող գործառոյթները:
«Ազդակ»-ի նաւը առագաստները լայն բացած որոշած է հովին չյանձնուիլ: Ուղղութիւնը, կշռոյթն ու այսօրուան տեղատուութիւն-մակընթացութիւն գործողութիւնները յաղթահարելու նաւարկումային կատարողականութեան լծուած է մամուլի նաւաստիներու խումբը: Բոլորին անխոնջ թիավարումն է, առանց նաւապետ-նաւաստի ուղղահայեաց յարաբերութիւններու, որ «Ազդակ»-ի նաւուն դրօշը ծածանուած կը շարունակէ պահել դեռ երկար:
Բարի տարեդարձ «Ազդակ»:
«Ա.»