ՍՕՍԻ ՓՕԼԱՏԵԱՆ
Ընտրական պայքարներէ եւ զանազան արշաւներէ ետք, քաղաքապետական եւ թաղապետական ընտրութիւնները վերջ գտան, եւ ներկայիս պատասխանատու բոլոր մարդիկ պարտաւոր են աշխատելու եւ իրագործելու իրենց խոստումները:
Առաջին հերթին կը շնորհաւորենք ներքին գործոց նախարարութիւնը եւ իր վարչամեքենան, որ հեզասահ աշխատանքով աւարտեց այս գործը, որուն պիտի յաջորդեն երեսփոխանական ընտրութիւնները: Հետեւաբար այս աշխատանքին յաջող ընթացքը պիտի օժանդակէ երեսփոխանական ընտրութիւններու կազմակերպման:
Կը շնորհաւորենք քաղաքապետական եւ թաղապետական ընտրութիւններուն յաջողած բոլոր թեկնածուները, յատկապէս` լիբանանահայ թեկնածուներն ու Պուրճ Համուտի եւ Այնճարի քաղաքապետները, քաղաքապետական խորհուրդներն ու թաղապետները, որոնք վստահաբար պիտի աշխատին իրենց շրջանները աշխուժացնելու եւ բարգաւաճեցնելու նպատակով:
Իբրեւ Լիբանանցի կիներու ազգային խորհուրդի պատասխանատու անդամ` անհրաժեշտ կը նկատեմ այս ընտրութիւններուն իգական սեռին մասնակցութեան եւ յաջողութեան համեմատութիւններուն ակնարկել:
Այս տարուան քաղաքապետական եւ թաղապետական ընտրութիւններուն մասնակցող լիբանանցի կիներուն թիւը հասած է 599-ի, ինչ որ 15 առ հարիւրով բարձրացած կը նկատուի, եթէ զայն բաղդատելու ըլլանք 2010-ի ընտրութիւններուն հետ, երբ կին մասնակցողներուն թիւը 520 էր:
Պատկերը հետեւեալն է.
2016
2010
Ընդհանուր յաջողութիւն 599 կիներ 520 կիներ
Ընդհանուր մասնակցութիւն 1342 կիներ 1080 կիներ
ՊԷՅՐՈՒԹ
2016 – Յաջողած են 3 կիներ, մասնակցողներու թիւ` 21
2010 – Յաջողած են 3 կիներ, մասնակցողներու թիւ` 10
ԼԵՌՆԱԼԻԲԱՆԱՆ
2016 – Յաջողած են 227 կիներ, մասնակցողներու թիւ` 478
2010 – Յաջողած են 164 կիներ, մասնակցողներու թիւ` 367
ՀԻՒՍԻՍԱՅԻՆ ԼԻԲԱՆԱՆ
2016 – Յաջողած են 138 կիներ, մասնակցողներու թիւ` 279
2010 – Յաջողած են 229 կիներ, մասնակցողներու թիւ` 449
ՊԵՔԱԱ
2016 – Յաջողած են 49 կիներ, մասնակցողներու թիւ` 124
2010 – Յաջողած են 45 կիներ, մասնակցողներու թիւ` 92
ՆԱՊԱԹԻԷ
2016 – Յաջողած են 29 կիներ, մասնակցողներու թիւ` 87
2010 – Յաջողած են 20 կիներ, մասնակցողներու թիւ` 61
ՀԱՐԱՒԱՅԻՆ ԼԻԲԱՆԱՆ
2016 – Յաջողած են 80 կիներ, մասնակցողներու թիւ` 185
2010 – Յաջողած են 59 կիներ, մասնակցողներու թիւ` 101
ԱՔՔԱՐ
2016 – Յաջողած են 73 կիներ, մասնակցողներու թիւ` 168
Այս թիւերը տեսնելով` կ՛արժէ հարց տալ, թէ արդեօք կիներուն ներկայութիւնը քաղաքապետական գործունէութեան մէջ բաւարա՞ր է, թէ՞ ոչ:
Բնական է, որ մեր պատասխանը ըլլայ «ոչ», որովհետեւ կան զանազան տուեալներ, որոնք բացայայտօրէն ցոյց կու տան այս ժխտական արդիւնքներուն դրդապատճառները:
Պէտք է յիշենք, որ քաղաքապետական աշխատանքին մէջ շրջանները զարգացնելու, բարգաւաճեցնելու, ինչպէս նաեւ կենսոլորտը առողջ միջավայրի մը վերածելու իմաստով կիները մեծ դերակատարութիւն կրնան ունենալ` իրենց շինիչ գաղափարներով եւ վճռական որոշումներով, յատկապէս` ներկայիս տիրող քաղաքական տագնապալից օրերուն, երբ աղբերու լուծումը իր վերջնական լուծման տակաւին չէ հասած: Կիները կրնան քաղաքապետարանները վերածել իրենց երկրորդ տան եւ հոն մեծ աշխատանք տանիլ:
Ուրեմն թուենք այն պատճառները, որոնց համաձայն, ընտրութեան մասնակցած մեծ թիւով իգական սեռի ներկայացուցիչներուն յաջողութեան տոկոսը քիչ եղած է:
– Հաւանաբար, որովհետեւ տակաւին կայ այն մտայնութիւնը, որ կինը ստորադաս կը նկատուի, իսկ այր մարդիկ` գերադաս, ինչպէս նաեւ` այն իրականութիւնը, որ պատասխանատու դիրքերը պէտք է այր մարդու տրամադրուին:
– Ընտրութիւններուն շատ մը քաղաքացիներ թերացան իրենց քաղաքացիական պարտականութեան մէջ եւ, հետեւաբար, չմասնակցեցան ընտրութեան:
Ի՛նչ ալ ըլլան պատճառները, սակայն, այս բոլորը դրական երեւոյթներ չեն կնոջ համար, որովհետեւ լիբանանեան սահմանադրութեան համաձայն, բոլոր մարզերուն մէջ այր եւ կին հաւասար իրաւունքներ ունին: Աւելի՛ն. այս առումով Լիբանան յանձնառու է ՄԱԿ-ի ուխտին եւ Մարդկային իրաւունքներու յայտարարութեան, ինչպէս նաեւ` ՍԻՏԱՈՒ-ի ուխտի գործադրութեան:
Լիբանանցի կիներու ազգային խորհուրդը ասկէ ետք պիտի աշխատի իր նոր ծրագիրներու գործադրութեան ի խնդիր: Նոր ծրագիրներուն մաս կը կազմէ Փոփոխութիւն եւ բարեկարգում համախմբումի երեսփոխան Ղասսան Մխայպերի կողմէ խորհրդարան ներկայացուած օրինագիծը, որուն համաձայն, լիբանանցի կնոջ իրաւունք կը տրուի նոյնիսկ ամուսնութենէ ետք, ըստ անձնաթուղթի, չսահմանափակուիլ միայն իր ամուսնոյն պատկանած շրջանին մէջ գործելու կարելիութեամբ, այլ իրաւունքը ունենալու` իր թեկնածութիւնը առաջադրելու իր ծննդավայրի քաղաքապետական աշխատանքներուն մէջ:
Մարտահրաւէրները շատ են, սակայն պէտք չէ տատամսիլ եւ յուսահատիլ: Յարատեւօրէն շարունակենք մեր աշխատանքը, պայքարինք կնոջ դէմ բանեցուող խտրականութեան դէմ, որովհետեւ ժամանակը հասած է, որ կինը հզօրանայ եւ համարձակութիւնը ունենայ մասնակցելու բոլոր ընտրութիւններուն:
Նաեւ ժամանակն է, որ հանրային կեանքին եւ ընկերային շրջանակներուն մէջ կինը այր մարդուն հետ հաւասարապէս ունենայ իր ամբողջական իրաւունքները, եւ քաղաքական կեանքին մէջ կինը ըլլայ պատասխանատու դիրքերու վրայ: