Image may be NSFW.
Clik here to view.
«Պի.Պի.Սի.» Լոնտոն.- Տեսական ու կիրառական տարրաբանութեան եւ բնագիտութեան միջազգային միութիւնները յունիս 8-ին միասնաբար յայտարարեցին, թէ անցեալ յունուարին հաստատուած քիմիական չորս նոր տարրերուն անունները որոշուած են արդէն, եւ թէ` անոնցմէ մէկը պիտի կոչուի հայ տարրաբան Եուրի Յովհաննիսեանի անունով:
Եուրի Յովհաննիսեան համաշխարհային համբաւի տէր հիւլէական բնագիտութեան մասնագէտ մըն է, որ մեծ ներդրում ունի գերծանր քիմիական տարրերը յայտնաբերելու եւ ուսումնասիրելու գործին մէջ: Ան կը հանդիսանայ երկրորդ գիտնականը, որուն կենդանութեան իր անունով կը մկրտուի քիմիական նոր տարր մը` թիւ 118-ը, որ Օկանեսոն (Og) պիտի կոչուի:
Օկանեսոն ցարդ յայտնաբերուած ամենածանր տարրը կը հանդիսանայ:
Յայտնաբերուած քիմիական միւս նոր տարրերն են` Նիհոնիում (ի պատիւ Ճափոնի), Մոսկովիում (ի պատիւ Մոսկուայի) եւ Թենոսին (ի պատիւ Միացեալ Նահանգներու Թենըսի նահանգին): Նշեալ երեք տարրերը այդ վայրերուն անունով անուանակոչուած են, որովհետեւ հոն կատարուած են տարրերը յայտնաբերելու փորձերը:
Եուրի Յովհաննիսեան ծնած է 1933-ին, Տոնի Ռոսթով:
