Արամ Ա. կաթողիկոսին հրամանով Մեծի Տանն Կիլիկիոյ կաթողիկոսարանի տպարանէն սեպտեմբեր ամսուան մէջ լոյս տեսաւ Յակոբ Օշականի «Համապատկեր արեւմտահայ գրականութեան հատոր Բ.»-ի վերահրատարակութիւնը:
«Համապատկեր»-ին առաջին հատորը ներկայացուց արեւմտահայ մտքին ճիգը, իսկ երկրորդ հատորը կը ներկայացնէ վաւերական գրագէտները:
«Համապատկեր արեւմտահայ գրականութեան հատոր Բ.»-ին մէջ կան գլխաւոր երեք վիպապաշտ դէմքեր, որոնք իրենց գրականութեան շարքին դասուած մանրամասնութիւններով կերտեցին նոր մտքեր, նոր տեսիլքներ եւ կեանքի նոր ելեւէջներ:
Այդ դէմքերն են` հայր Ղեւոնդ Ալիշան, Մկրտիչ Պէշիկթաշլեան եւ Պետրոս Դուրեան:
Վիպապաշտներէն Ալիշան քիչ չափով կը պատկանի արեւմտահայ գրականութեան հարազատ յղացքին: Անոր քերթողական վաստակը դադրած է արդէն 1860-ին, թուական, ուր լիութիւն է Մկրտիչ Պէշիկթաշլեան եւ ուր կը կազմաւորուի Պետրոս Դուրեան: 1870-ը կը փակէ մեր վիպապաշտներէն անդրանիկ ու հարազատ բխումը:
«Համապատկեր արեւմտահայ գրականութեան հատոր Բ.»-ը Գէորգ Մելիտինեցի գրական մրցանակի հրատարակութիւններու 80-րդ հատորն է:
Սոյն հատորին խմբագրութիւնը կատարեց Մեծի Տանն Կիլիկիոյ կաթողիկոսութեան երէց միաբան Վարուժան արք. Հերկելեանը: