Հովանաւորութեամբ Համազգայինի Պէյրութի «Կոմիտաս» մասնաճիւղին, կազմակերպութեամբ Համազգայինի Լիբանանի Շրջանային վարչութեան,
Լիբանանի մէջ արժանավայել կերպով նշուեցաւ Կոմիտասի ծննդեան 150-ամեակը` Համազգայինի «Գուսան» երգչախումբին համերգով:
Խմբավարութեամբ Գրիգոր Ալոզեանի ու նուագակցութեամբ Յասմիկ Գասպարեանի, կիրակի, 30 յունիս 2019-ի երեկոյեան ժամը 7:30-ին Պէյրութի վարչապետարանին դիմաց գտնուող Ազգային աւետարանական եկեղեցին լեցուած էր Կոմիտասի եւ «Գուսան»-ի արուեստը սիրողներով ու քաջալերողներով, յարգողներով, նաեւ` պաշտօնական անձնաւորութիւններով:
Ներկայ էին` Լիբանանի հայ երեք յարանուանութեանց ներկայացուցիչներ, քրիստոնեայ այլ համայնքներու պետեր, հայ եւ օտար դեսպանատուներու ներկայացուցիչներ, երեսփոխաններ, Համազգայինի Կեդրոնական վարչութենէն, Լիբանանի Շրջանային վարչութենէն, Պէյրութի «Կոմիտաս» մասնաճիւղէն անդամներ: Իսկ եկեղեցին լի էր Համազգայինի հաւատարիմ եւ գործունեայ ընկերներով, տարեց գուսանականներով եւ շատ մը ոչ հայ կառոյցներու ներկայացուցիչներով:
Համերգը սկսաւ Կարէն Արաբկիրլեանի անդրադարձով, ապա երգեհոնի նուագով հնչեց «Սիրտ իմ սասանի»-ն, որուն ընթացքին երիտասարդներ մոմերթով ոգեկոչեցին յիշատակը մեծն Կոմիտասի` անոր պատկերին առջեւ: Այդ պահուն ներկաները կամրջուեցաւ 1935 թուականին` Կոմիտասի մահուան, որուն առիթով երգչախումբը իր յարգանքը արտայայտեց իր հիմնադիրին:
Անկէ ետք «Գուսան» երգչախումբի արական կազմը վերնատունէն երգեց Կոմիտասի ս. պատարագէն «Միայն սուրբ»-էն մինչեւ «Ի սուրբ, ի սուրբ» հատուած` Աւետիս Ագրապեանի մենակատարութեամբ:
Ասիկա պարզ զուգադիպութիւն չէր, արդարեւ, «Գուսան» երգչախումբը, Կոմիտասի ղեկավարութեամբ, առաջին անգամ երգեց հայ եկեղեցական երգը` շարականն ու գանձը, Պոլսոյ մէջ, հայ ժողովուրդի գոհարները հասցնելով ամբողջ աշխարհին:
Լիբանանահայ ծանօթ սոփրանօ Շողիկ Թորոսեանի մենակատարութեամբ, ներկայացուեցաւ Կոմիտասի կողմէ գրառուած «Տէ՛ր ողորմեա՛»-ն, որ առաջին անգամ կը կատարուէր Լիբանանի մէջ:
Հոս, հետաքրքրական էր պահը եւ առանձնայատուկ` ներկայացումը: «Գուսան»-ի իգական խումբը բեմին էր, արական կազմը` վերնատան մէջ. անոնք կատարեցին յատուկ կերպով ընծայագրուած եւ Կոմիտասի 150-ամեակին նուիրուած, Կոմիտասի կողմէ գրի առնուած երկու սիրերգներ` «Գութանը վարափոսին» եւ «Արի սիրուն»: Ասոնք բազմաձայնեց երկսեռ խումբին համար հայրենի երաժիշտ Վահէ Պեկոյեանը եւ առաջին անգամ ըլլալով կատարուեցաւ: Մենակատար` Շողիկ Թորոսեան:
Ապա հնչեց Կոմիտասի եւ Կոմիտաս կաթողիկոս Աղցեցիի «Անձինք նուիրեալք» շարականը` իգական խումբի համար դաշնաւորուած:
Անկէ ետք երգչախումբը յաջորդաբար կատարեց փունջ մը տարբեր խմբերգներ, որոնք հայ հարազատ երգի եւ բիւրեղ ոճի դասական բարձրորակ մատուցում կը հանդիսանային: Յաջորդաբար ներկայացուեցան Կոմիտասի տարբեր տեսակներու եւ ժամանակներու խմբերգները`«Լուսնակը լոս», «Ելայ տանիս», «Ինչո՞ւ Պինկէօլը մտար»:
Անկէ ետք մատուցուեցաւ «Երազ»-ը, որ խոր ազդեցութիւն ունեցաւ ներկաներուն վրայ, եւ որ կրկնուեցաւ համերգի աւարտին` հանրութեան փափաքով:
Անկէ ետք երգուեցան` «Ալագեազ»-«Խնկի ծառ», հայ գեղջուկ երգերու ու պարերգերու հատորէն շարքեր, «Օրօր, Ադինօ՛-Սարը սարին նման չ է», տղոց խումբով «Մայր Արաքսի ափերով», «Գութան» երգը, «Ա՛յ տղայ, մեր գեղեցի-Սեւ ա չոպանի շունը», «Էս գիշեր, լուսնակ գիշեր», «Հաբրբան»:
Ցուցադրուեցաւ նաեւ այս առիթով նկարուած պատրաստուած « Իմ չինարի եարը», որ պատրաստուած է Համազգայինի «Գուսան» երգչախումբին կողմէ: Ան կը ներկայացնէ հինի ու նորի միացումը` իր մէջ ունենալով ուրախ տրամադրութիւն: Տեսերիզի ընթացքին կ՛երեւին Կոմիտասի եւ «Գուսան» երգչախումբին առաջին նկարները, որոնց կեդրոնն է վարդապետը:
Նշենք, որ համերգի ընթացքին Կարէն Արաբկիրլեան իւրաքանչիւր երգի մասին տուաւ հայերէն եւ անգլերէն բացատրութիւններ:
Տեսահոլովակը հայերէնով է, բայց նաեւ ունի անգլերէն թարգմանութիւն, տեղադրուած է Youtube-ի, Դիմատետրի եւ Instagram-ի վրայ- https://youtu.be/1d6O3mevMoU
Facebook: Kousan Chamber Choir
Instagram: KOUSAN_Chamber_Choir
H-pem: https://www.h-pem.com/en/multimedia-guide/2019/06/28/im-chinari-yare/55:
Համերգէն առաջ Համազգայինի «Գուսան» երգչախումբին, իր հիմնադրին, անոր գործունէութեան, եւ համազգայինին մասին հեռատեսիլային MTV, OTV, Télé Lumière-Noursat, Charity TV եւ ձայնասփռային «Վանայ Ձայն», Voice of Charity ներկայացումներ տեղի ունեցան յունիս ամսուան ընթացքին, նաեւ տեսահոլովակը սփռուեցաւ բոլոր կայաններէն:
Նշենք, որ այս առիթով եւ գործակցաբար Համազգայինի «Վահէ Սէթեան» տպարանին, «Գուսան» երգչախումբը հրապարակած է Կոմիտասի տասներկու երգերն ու լուսանկարները ընդգրկող բոլորին հասանելի, փոքրածաւալ յատուկ գրքոյկ մը:
Աւարտին, Համազգայինի Շրջանային վարչութեան անդամ, «Գուսան» երգչախումբի պատասխանատուներէն Կարէն Եօսուլքանեան հայերէնով եւ արաբերէնով անդրադարձաւ նշեալ գրքոյկի հրատարակութեան եւ յատուկ շնորհակալութիւն յայտնեց բոլոր անոնց, որոնք նպաստեցին այս համերգի իրագործման, յատկապէս` «Վ. Սէթեան» հրատարակչատան տնօրէն Յակոբ Հաւաթեանին, Համազգայինի Պէյրութի «Կոմիտաս» մասնաճիւղին եւ օրուան մեկենասներուն` Սարգիս Ճապաղջուրեանին եւ տէր եւ տիկին Հրայր եւ Անահիտ Տանձիկեաններուն:
Համերգին աւարտը իր բարձր խանդավառութեան հասաւ «Ո՛հ, ինչ քաղցր բան» կատակերգով, որմէ ետք ներկաներու ծափողջոյնները ողողեցին ամբողջ եկեղեցին:
«Գուսան» երգչախումբի վարչութիւնը կ’ուզէ այս առթիւ շնորհակալութիւն յայտնել բոլոր անոնց, որոնք կ՛օժանդակեն իր աշխատանքի զարգացման եւ կ՛օգնեն զանազան կերպերով Կոմիտասի առաքելութիւնը շարունակող երգչախումբին:
Անոնց` բիւր յարգանք ու երախտիք, մանաւանդ` օրուան հովանաւոր Համազգայինի Պէյրութի մասնաճիւղի վարչութեան եւ անոնց շարունակական օժանդակութեան: