Լիբանանի առողջապահութեան նախարարին հնչեցուցած ահազանգը` թմրեցուցիչի համատարած երեւոյթին մասին, հատած է հասարակութեան սպառնացող վտանգի բոլոր սահմանները:
Լիբանանը յարձակման տակ է ներմուծողներու, արտադրողներու, վաճառականներու եւ օգտագործողներու կողմէ: Արգելափակեալներու ընդհանուր ցանկերուն մէջ թմրեցուցիչի պատճառով բանտարկուածներու համեմատութիւնը սարսափազդու պատկերներ կը յառաջացնէ եւ ենթադրել կու տայ, որ հասարակութիւն մը ամբողջ ախտահարուած է համաշխարհային տարողութիւն ունեցող այս վարակէն:
Թմրագործարարութիւնը հովանաւորութիւն ունեցող, ստուերային, միաժամանակ նաեւ քրէական ծանրագոյն հետեւանքներ ունեցող արարք է, որ փոխանակ չէզոքացուելու կամ վերացման միտող միջոցներու ենթարկուելու, սրընթաց մագլցողականութեամբ նոր շուկաներ կը նուաճէ, հասարակութիւններ կը հարուածէ, ուղեղներ կը թմրեցնէ եւ երիտասարդութիւն կը քայքայէ:
Թմրարտադրութիւնը կը քաջալերուի, երբ թմրեցուցիչի որոշ տեսականի կ՛օրինականացուի այս կամ այն պետութեան կամ նահանգային կառավարութեան կողմէ, մինչ բժշկական խորհուրդներ առողջապահական որոշ հարցեր դարմանելու համար կը յանձնարարեն թմրեցուցիչի օգտագործումը: Երէկուան արգիլուածը այսօր հետզհետէ կը դառնայ արտօնեալ, յանձնարարելի նոյնիսկ, եւ տարբեր երկիրներու խորհրդարաններ` ետ չմնալու համար ընկերաբանական այս նորաձեւութենէն, կը սկսին քննարկել նման օրինագիծեր պատճէնահանելու կարելիութիւնները: Այստեղ պէտք է արձանագրել, որ Հայկական երեսփոխանական պլոքը առաջինն էր, որ կտրուկ դիրքորոշում ունեցաւ Լիբանանի մէջ թմրեցուցիչի որոշ տեսականին օրինականացնելու նախաձեռնութեան դէմ` զգուշացնելով անոր հետագայ վտանգներէն: Լիբանանցին պէտք է գիտակցի, որ նման փորձեր կաթիլային ներմուծումներով հաւաքական ենթագիտակցութիւններու վրայ կ՛ազդեն` թմրեցուցիչին հանդէպ հանդուրժողականութիւն դրսեւորելու առումով: Այս պատճառով ալ Հայկական երեսփոխանական պլոքի դիրքորոշումը պէտք է ստանայ համալիբանանեան տարողութիւն:
Թմրեցուցիչի արտադրութեան, վաճառականական համաշխարհային ուղիներուն, թափանցման գործողութիւններուն մասին ընդհանուր պատկերացում մը միայն անպայման կը համոզէ հետեւողը այդ գործարքներուն վերաբերեալ որոշ ստուերային խումբերու եւ կարգ մը պետական մարմիններու սերտաճման կամ չյայտարարուած գործակցութեան մասին:
Այլապէս ինչպէ՞ս կը բացատրուին այս ոլորտի արտադրողականութեան ծաւալները, առեւտուրի հսկայական գումարներու շրջանառութիւնները եւ այդ բոլորին պատճառով զոհերու անվերջ աճող թիւերը:
Լիբանանի պարագային պաշտօնական պետական մարդու հնչեցուցած ահազանգին եւ անոր ներառած թիւերուն աննախընթաց աճը կը յուշեն, որ հակաթմրեցուցիչ արշաւները հեռու են վնասազերծման նպատակով կազմակերպուող հակակշիռ գործողութիւններ դասուելէն:
Ախտահարուած են դպրոցները, ընկերային վայրերը, համախմբումի միջավայրերը, հասարակութիւնը: Ձերբակալութիւնները, արգելափակումները չեն կրնար դանդաղեցնել վարակուածութեան կշռոյթները:
Երբ լիբանանեան հասարակութիւնը կ՛ախտահարուի, այդ ախտահարումը նախ եւ առաջ բաժին կը հասնի երիտասարդութեան, որ ընկերաբանական տարբեր հանգամանքներէ մեկնած ամէնէն թիրախային խաւն է: Երիտասարդութիւն ներքաշելու, ախտահարելու եւ այդ ճամբով գումար վաստակելու դաւադրական քաղաքականութիւնը բոլոր ուղղութիւններով պիտի շարունակէ միակողմանի զոհեր խլող այս յարձակումը:
Անիրատեսական չէր նախարարին այն յայտարարութիւնը, որ թմրամոլութեան դէմ պայքարը շատ աւելի վտանգաւոր է, քան զինուորական ու քաղաքական պայքարները: Աւելի վտանգաւոր է եւ աւելի դժուար, որովհետեւ թշնամիին դէմ պատերազմիլը կը խտացնէ շարքերը, կ՛ամրակայէ ազգային գիտակցութիւնը, կ՛արմատացնէ ծառայելու գաղափարը: Միւսը կ՛որոնէ ներքին թշնամին, չի յաջողիր հասնիլ արտադրողին, մեծ գործարարին, կ՛իյնայ բուն պատասխանատուին հասնիլ փորձող ճամբուն ոլորապտոյտին մէջ եւ կը գտնէ զոհը, քաղաքացին, երիտասարդը, որուն բուժումը բարդ է եւ կը պահանջէ բացարձակ հետեւողականութիւն, կամք, ինքնասրբագրութիւն:
Լիբանանը պէտք ունի իր հասարակական անվտանգութեան սպառնացող եւ զայն արդէն հարուածած համատարած վարակին դէմ պայքարի ծրագիրի շտապ մշակման եւ կիրարկման: Կրթականէն քաղաքացիական եւ տուգանայինէն իրաւական ու քրէականացման միջոցներու անյետաձգելի կիրարկումներ` առնուազն դանդաղեցնելու համար այս սանձարձակ աճը, որ անխնայ կը հարուածէ հասարակութիւնը:
Այս պատերազմին դէմ գործնական պայքար մղելու կամք պէտք է դրսեւորէ լիբանանեան պետութիւնը:
«Ա.»