ԿԱՐՕ ԹԱՇՃԵԱՆ
Իր բոլոր երեսներով ահաւոր է պատերազմը, աւելի ահաւոր է խաղաղութիւնը, երբ կը վխտան խաչագողները:
Բարոյականութիւնն ու չափի զգացողութիւնը երբ լքեն ժողովուրդ մը, երբ ընչաքաղցութիւնը քարոզուի իբրեւ գաղափարաբանութիւն, երբ փայլուն ինքնաշարժներն ու շքեղ դղեակները դառնան կրօն, սէրը սուտ հռչակուի եւ վերածուի փոխշահարկման միջոցի, երբ ժողովուրդին ծոցէն ծնածները մոռնալով համեստ անցեալը, յղփանալով, կը դառնան դահիճ` ծախելով իրենց հոգին, ոռնան իբրեւ գազան, հայրենիքը կը դառնայ դժոխք, եւ ազգը կը դառնայ զիրար բզկտող առնէտներու վոհմակ:
Սարսափելի են քինախնդրութիւնն ու ոխը, ոխը` հարազատ եղբօր նկատմամբ, նոյն արգանդէն ծնունդ, ընկերոջ նկատմամբ` նոյն բաժակէն խմած: Արդարութիւնն ու խղճամտութիւնը լոյսն են այս աշխարհին եւ գրաւականը` ամէն ազգի հզօրութեան:
Ազգի իւրաքանչիւր անհատ կարեւոր եւ անհրաժեշտ մասնիկն է ազգին` անկախ հոգեմտաւոր, նիւթական կամ ֆիզիքական տուեալներէն: Այնպէս, ինչպէս ընտանիքի մը խելացի ու թերաճ մանուկները իրենց ծնողներուն սէրը կը վայելեն, նոյնպէս ազգի իւրաքանչիւր անհատ, օժտուած, գեղեցիկ, յաղթանդամ կամ տկար ու ոչ փայլուն, սոսկական թիւ մը, մասնիկ մը կամ քուէ մը չէ ազգի վիճակագրական տախտակներուն վրայ:
Չկայ մասնակի արդարութիւն. արդարութիւնը կա՛մ բացարձակ է, կա՛մ անարդարութիւնն է տիրողը. ազգի խոցուած, տկար ու խեղճ անդամները աւելի հոգածութեան պէտք է արժանանան, քան` հզօրներն ու ընտրանին: Եւ այս բոլորը` առանց տրտունջքի կամ դժկամութեան:
Հերոս ազգ է մեր ազգը, մարտնչող, վիշապաքաղ, ժայթքող հրաբուխ է մեր ազգը: Հերոսածին են մեր մայրերը, տոկուն ենք, ամրակուռ` Նեմրութեան կրանիթի պէս:
Եռաբլուր, բլուր մը նահատակներու արեամբ շնչող… Եւ մեր հայրենիքի ո՞ր անկիւնը Եռաբլուր չէ:
Այնպիսի ազգ ենք, որ ամէն տուն նահատակ ունի` պատմութեան այս կամ այն փուլին, յաղթեր ենք բազում մարտեր` շատ յաճախ կռուելով օտար կայսրերու բանակներուն մէջ…
Իսկ հիմա մե՛ր բանակն է յաղթողը, անկախ Հայաստանն է յաղթողը եւ… ի՜նչ զոհողութիւններու գնով հասեր ենք այս յաղթանակին:
Մեր բոլորին յաղթանակն է, մեր արիւնաքա՜մ, մեր ցիրուցան ազգին յաղթանակն է: ՄԻԱՍՆԱԲԱՐ կերտեցինք այդ, գրիչով, զէնքով, տքնաջան աշխատանքով…
Մէկդի դնենք մեր վիրաւորուած եսերն ու քէնցած սրտերը, խոնարհինք մեր հերոս տղոց թափած արեան առջեւ, պարտուողներ չկա՛ն մեր մէջ, պարտուած է թշնամի՛ն:
Զարթի՛ր, լաօ՜, մռնեմ քեզի՜:
27 փետրուար 2019
Արագած, Պէյրութ