Բրիտանական հեղինակաւոր «Տը Կարտիըն» պարբերականը անդրադարձած է Ազրպէյճանի մէջ 21-րդ դարուն տեղի ունեցող «մշակութային եղեռնին»: Ըստ «Արմէնփրես»-ի, պարբերականը գրած է, որ այսօր մշակութային ամենամեծ աղէտը, հաւանաբար, ոչ թէ տեղի կ՛ունենայ Սուրիոյ մէջ, այլ Կովկասի մէջ` նկատի ունենալով Ազրպէյճանի մէջ հայկական խաչքարերու ոչնչացման փաստը:
«Համաձայն «Հայփըրալերժիք» գեղարուեստական ամսագիրի փետրուարի թիւին մէջ զետեղուած հաշուետուութեան, Ազրպէյճանի կառավարութիւնը վերջին 30 տարիներու ընթացքին պարբերաբար կը ջնջէ երկրէն հայկական պատմական ժառանգութիւնը: Զեկոյցի հեղինակներ Սիմոն Մաղաքեանի եւ Սառա Փիքմանի կարծիքով, այս պաշտօնական, սակայն եւ` քողարկուած, մշակութային եւ կրօնական արժէքներու ոչնչացումը կը գերազանցէ անգամ Փալմիրի մէջ ՏԱՀԵՇ-ի «ինքնագովազդին», կը գրէ «Տը Կարտիըն»-ը:
Պարբերականը կը յիշեցնէ, որ 2005 դեկտեմբեր 15-ին հիւսիսային Իրանի Հայ առաքելական եկեղեցւոյ թեմի առաջնորդ Նշան եպս. Թոփուզեանը նկարահանած էր, թէ ինչպէ՛ս ազերի զինուորականները կ՛ոչնչացնեն այն ամէնը, ինչ մնացած էր Ջուղայի մէջ առկայ շուրջ 10.000 խաչքարերէն:
«Զինուորականներն աւերուած կտորները բեռնած էին բեռնատարի մէջ, ապա նետած` Արաքս գետը: Այդ նկարները կարելի է գտնել 2006 «Արաքսի նոր արցունքները» ժապաւէնի մէջ, որ հրապարակուած է «ԵՈՒ ԹԻՈՒՊ»-ով: Ազրպէյճանի կառավարութիւնը մէկ անգամ չէ, որ մերժած է միջազգային փորձագէտներուն մուտք գործել այդ տարածք, նաեւ չէ տուած որեւէ մեկնաբանութիւն: Անոնք մերժած են նաեւ հայերուն, որոնք երբեւէ ապրած են Նախիջեւանի մէջ», կ՛աւելցնէ պարբերականը` ընդգծելով, որ նման հակազդեցութիւնը կը բարդացնէ անկախ հետազօտութիւնը, սակայն Մաղաքեանն ու Փիքմանը, իրենց ներկայացուցած մեծ քանակութեամբ փաստերով, արդէն ահռելի աշխատանք կը կատարեն: