Գարեգին Բ. Ամենայն Հայոց Կաթողիկոսին Խօսքը` «Հայաստան –Սփիւռք» Վեցերորդ Համաժողովի Բացման

Ողջունում ենք ձեզ համաժողովի գումարման առիթով եւ հայրապետական Մեր սէրն ու Մայր Աթոռ Սուրբ Էջմիածնի օրհնութիւնը բերում ամէնքիդ: Ուրախ ենք, որ ազգային համախմբման միասնական տեսիլքով մեր ժողովրդի աշխարհասփիւռ զաւակները այսօր կրկին մէկտեղուել են մայր հայրենիքում, հայոց պետութեան հովանու ներքոյ` քննարկելու ազգային մեր կեանքը յուզող հարցեր ու խնդիրներ:

Հայաստան-սփիւռք համաժողովները կարեւոր հարթակ են դարձել  Հայաստանի, Արցախի եւ սփիւռքի միասնութեան զօրացման, գործակցութեան խթանման եւ մեր ժողովրդի տարբեր հատուածների փոխճանաչման եւ առնչութիւնների ընդլայնման համար: Այսօր մեզ հայրենիքում համախմբել է մեր ընդհանուր պատասխանատուութիւնն ու մտահոգութիւնը` մեր ժողովրդի ներկայի եւ ապագայի նկատմամբ: Աշխարհաքաղաքական զարգացումները եւ այդ պարունակում մեր ազգային ինքնութեան առջեւ ծառացած մարտահրաւէրները, ընկերային-տնտեսական կեանքի դժուարութիւնները, մեր հայրենիքի հզօրացումն ու ապահովութիւնը  ներկայ մեր սերնդին վիճակուած առաջնահերթ մտահոգութիւններն են:

Հայրենիք-սփիւռք գործակցութեան շրջանակներում, իրաւ է, զգալի ձեռքբերումներ ենք արձանագրել` զօրացնելով Հայաստանն ու Արցախը եւ սփիւռքում ազգային կեանքը: Նշանակալի է եղել սփիւռքահայերի մասնակցութիւնը հայրենական կեանքին` սկսած արցախեան ազատամարտին անմիջական ու անձնուէր մասնակցութիւնից ու նորաստեղծ մեր երկրի կեանքում ներդրուած միջոցներից մինչեւ այլ երկրներում ի նպաստ Հայաստանի ու Արցախի ծաւալած քարոզչական աշխատանքները: Միաժամանակ հայրենի պետութեան կողմից ջանքեր են ներդրուել` ամրապնդելու հայրենիքի եւ սփիւռքի կապերն ու համագործակցութիւնը, աջակցելու սփիւռքում գործող ազգային կազմակերպութիւններին եւ սփիւռքի տարբեր հատուածների համախմբմանն ու առկայ հնարաւորութիւնները առաւել նպատակային օգտագործմանը, սատարելու պատերազմական իրավիճակում յայտնուած մեր ժողովրդի զաւակներին, ինչպէս` Սիրիայում եւ Իրաքում:

Այսուհանդերձ, կատարուած աշխատանքները չեն սպառել ծառացած մարտահրաւէրները: Մեզ շարունակում են մտահոգել Արցախի հիմնախնդիրը, Հայոց ցեղասպանութեան արդար պահանջատիրութեան հանդէպ շարունակուող ժխտողականութիւնը, արտագաղթը, ընկերային-տնտեսական դժուարութիւնները հայրենիքում, խաղաղութեան ապահովումը մեր սահմաններում:

Մեր պետութիւնը, թէեւ` բազում դժուարութիւնների առջեւ, համայն հայութեան պատուարն է եւ մեր ժողովրդի գոյատեւման  երաշխաւորը: Այսօր ժամանակն է, որ դառը փորձութիւնների ծանրութիւնը կրած մեր երկիրն ու ժողովուրդը կարողանան ամուր քայլերով ընթանալ վերելքի ուղիով, որը պահանջում է ուժերի ու կարողութիւնների ամբողջական կենտրոնացում ու համախմբում: Ազգային համախմբման հարցում ամէնքս միակարծիք ենք ու հաստատակամ: Համախմբումը, սակայն, զերծ պիտի լինի հատուածական հետաքրքրութիւններից ու ժամանակաւոր նպատակայարմարութիւններից: Պաշտօնը, հասարակական դիրքը, նիւթական ու մտաւոր կարողութիւնները, որոնցով օժտուած են մեր ժողովրդի զաւակները, պիտի ծառայեցուեն մեր երկրի պայծառացմանը եւ ամէնուր` մեր ժողովրդի առաջընթացին ու ազգային կեանքի զարթօնքին: Հայրենաբնակ թէ սփիւռքահայ` հայրենիքի եւ ազգի հանդէպ կրում ենք նոյն պատասխանատուութիւնը: Հայրենիքից չի կարելի երես դարձնել ձախողած գործի եւ կամ տեղ գտած անարդարութեան պատճառով: Հայրենիքից չի կարելի երես դարձնել, եթէ այն նեղութիւնների, փորձութիւնների ու մարտահրաւէրների առջեւ է կամ նուազ հարուստ ու յարմարաւէտ է: Զինուորն ու ծառան ենք հայրենիքի: Այս պիտի լինի մեր նշանաբանը: Հայրենիքը մենք պիտի սիրենք այն պարզ պատճառով, որ մերն է` մեր հայրերի արեամբ ու քրտինքով նուիրագործուած եւ մեզ աւանդուած: Հայրենիքով է զօրեղ իւրաքանչիւրը` իբրեւ ազգի զաւակ, իբրեւ կրողն ու շարունակողը հայրենեաց ժառանգութեան, իսկ զօրութիւնը հայրենիքի մեր ժողովուրդն է` ի հայրենիս եւ ի սփիւռս միասնաբար:

Եկող տարի նշելու ենք Հայաստանի Ա. Հանրապետութեան 100-ամեայ տարեդարձը, որը կոչ ու խրախոյս է ազգային համախմբման: Մէկ դար առաջ այդ օրինակը բերեց մեր ժողովուրդը` միահամուռ կամքով պաշտպանելով հայրենիքը եւ վերակերտելով պետականութիւնը: Այսօր մեր երկրի պաշտպանունակութեան ամրապնդումը պահանջում է միասնական առաւել ջանքեր, ինչպէս եւ` պատերազմի վտանգի ներքոյ գտնուող ժողովրդի զգօն ու սթափ գիտակցութիւն եւ առաւել պատասխանատուութիւն: Մեր երկիրը հեռու պիտի պահենք ցնցումներից եւ ամէն ջանք պիտի գործադրենք` խաղաղութիւնը ամրագրելու եւ հասնելու Արցախի ճանաչման յաղթանակին:

Այս տեսլականով Մեր աղօթքն ենք բարձրացնում առ Աստուած, որ օրհնի մեր այս համաժողովը, արդիւնաւորի ջանքերը համաժողովի կազմակերպիչների ու մասնակիցների եւ լուսաւորի մեր մտքերը` գտնելու լաւագոյն ուղին մեր հայրենիքի ու ժողովրդի զօրացման եւ առաջընթացի:

Թող Աստուած խաղաղ պահի աշխարհը, մեր երկիրն ու համայն ժողովրդին:

Մեր Տիրոջ շնորհները, սէրն ու ողորմութիւնը թող լինեն մեզ հետ եւ` բոլորի, այսօր եւ միշտ: Ամէն: