ԱՀԱՐՈՆ ՇԽՐՏԸՄԵԱՆ
Հակասութիւններու խառնարան մըն է մեր աշխարհը: Մինչ սուրիական բանակը եւ ռուսական ուժերը կը մօտենան Սուրիոյ հնգամեայ պատերազմին տխուր էջերը փակելու փուլին, արեւմտեան լսատեսողական աղբիւրներ անգիտակ կը ձեւանան գետնի զարգացումներու ընթացքէն:
Արեւմտեան ոսպնեակները աւելի տեղ կը տրամադրեն Հիլըրի Քլինթընի ընտրարշաւին, Տոնալտ Թրամփի կնոջ կիսամերկ նկարներուն, Թրամփ-Քլինթըն ցեխարձակումներուն: «Սի.Էն.Էն.»-ը, յաջորդական քննարկում-լսարաններ կազմակերպելով, «չափաւորական ահաբեկիչներ» կը փնտռէ Սուրիոյ մէջ:
Տակաւին, ի՜նչ հեգնանք, նոյնինքն Հիլըրի Քլինթըն, նախագահ ընտրուելու պարագային, կը խոստանայ արմատէն չէզոքացնել ՏԱՀԵՇ-ը… երբ սուրիական բանակը եւ անոր դաշնակիցները աւելի ազդու ու գործնական քայլերով կ՛ազատագրեն Սուրիան Քլինթընի եւ անոր դաշնակիցներու վարձկաններէն:
Այս միեւնոյն Հիլըրի Քլինթընը, Կեդրոնական հետախուզութեան վարչութեան (Սի.Այ.Էյ.) լծակներով, 2009-2013 տարիներուն պետական քարտուղարի պաշտօնը վարած ժամանակաշրջանին կանաչ լոյս տուաւ արաբական աշխարհը արիւնաքամ դարձնելու ծրագիրին` ահաբեկչական խառնարանի վերածելով Լիպիան, Եգիպտոսը, Իրաքը, Թունուզը, Եմէնը, Լիբանանը, Սուրիան եւ այլ երկիրներ: Նոյնինքն տիկին Քլինթընն էր, որ իր «Hard Choices» գիրքին մէջ (2014-ի հրատարակութիւն), Միացեալ Նահանգներու միջինարեւելեան քաղաքականութեան հեռանկարները բացատրելու միջոցին, սեւով սպիտակի վրայ Ուաշինկթընին կը վերագրէր ՏԱՀԵՇ-ի ծննդոցը:
Այս բոլորէն ետք համեստ քաղաքացին իրաւունք չունի՞ արդեօք հարց տալու` ինչպիսի՞ ապիկարութիւններով ժամավաճառ կ՛ըլլայ Միջազգային ատեանը, երբ Ճորճ Պուշի, Հիլըրի Քլինթընի, Տոնալտ Ռամսֆելտի, Թոնի Պլերի նման դահիճներ ժողովրդավարութեան դասեր տակաւին կու տան մարդկային ընկերութեան: Ովքե՞ր կը կրեն Եւրոպայի, Միացեալ Նահանգներու` աշխարհի տարբեր ափերու վրայ ահաբեկչական ողբերգութիւններու պատասխանատուութիւնը, եթէ ոչ` Ուաշինկթընը, Լոնտոնը, Փարիզը եւ արաբական աշխարհի անոնց աւազային պետութիւնները:
Վերադառնանք Սուրիոյ զարգացումներուն: Այսօրուան դրութեամբ, քսան եւ երեք միլիոն բնակչութիւն հաշուող պետութեան մը կէսը տարագրուած է իր երկրէն: Առնուազն հինգ հարիւր հազար զոհ, տնտեսական, ենթակառուցային ահաւոր վնասներ, մարդկային, ընկերային ողբերգութիւններ…
Սուրիոյ երկրորդ մեծագոյն քաղաքը մօտակայ օրերուն պիտի ազատագրուի ահաբեկչական որջերու սարսափէն: Սուրիական բանակը եւ Ռուսիա մարդասիրական անցքեր ստեղծած են` բռնագրաւեալ շրջաններէն խաղաղ բնակիչներու ելքը ապահովելու նկատառումներով:
Արեւմտեան մամուլը եւ անոնց հովանաւորները հաշտ աչքով չեն դիտեր Հալէպի զարգացումները: Անոնք պահ չեն կորսնցներ խեղաթիւրելու ճշմարտութիւնը: Անոնք կը խուսափին արժեւորելէ Հալէպի ազատագրութեան նշանակութիւնը` «ապստամբները բռնատիրութեան դէմ կը պայքարին յանուն ժողովրդավարութեան»… Այս է անոնց հաւատոյ հանգանակը: Միտումնաւոր` «Հալէպը պաշարուած է», կը յայտարարեն, մինչդեռ մօտեցած է քաղաքը ահաբեկիչներէն ազատագրելու պահը: Արաբական ծոցի սեւ գումարներով սնանող լսատեսողական աղբիւրներ «ապստամբ» կ՛անուանեն ութսուն եւ աւելի երկիրներէ թափանցող մարդասպանները: Ի դէպ, այդ «ժողովրդավարական» կազմակերպութիւններէն մէկն էր, որ լուսարձակներու առջեւ օր ցերեկով գլխատեց տասնամեայ պատանին: «Չափաւոր ապստամբներ»-ն են սուրիական բանակին եւ խաղաղ բնակչութեան դէմ թունաւոր կազ օգտագործող հոսանքները: Արեւմուտքը խոր ցաւ կ՛արտայայտէ Սուրիոյ մէջ Ռուսիոյ միջամտութեան համար: Կասկած կրնա՞յ ըլլալ` ապացուցելու ահաբեկիչներուն դաշնակիցները:
Միացեալ Նահանգներ, Բրիտանիա, Ֆրանսա, Սէուտական Արաբիա երկար ժամանակ Հալէպը փորձեցին իշխանափոխութեան համար միջնաբերդ օգտագործել Սուրիոյ պետութեան դէմ:
Հալէպի բնակչութիւնը շատ աւելի վաղ կրնար ազատագրուիլ ահաբեկչական խմբաւորումներէն: Մ. Նահանգներ մնայուն խոչընդոտներ, արհեստական պատճառաբանութիւններ կը ստեղծէր Ռուսիոյ քայլերուն առջեւ:
Հալէպ կը ներկայանայ Սուրիոյ տնտեսական եւ առեւտուրի մայրաքաղաքը: Արտաշխարհի հետ Սուրիոյ առեւտրական գործառնութեանց խաչմերուկը: Աշխարհաքաղաքական առումով, Հալէպ կը մնայ հիւսիսային Սուրիոյ բանալին: Ազատագրել Հալէպը` կը նշանակէ հսկողութեան տակ վերցնել թուրք-սուրիական եւ հիւսիսային Իրաքի սահմանագիծերը, քրտական շրջանները: Վերջապէս, Հալէպի ազատագրութիւնը կը խորհրդանշէ երկրի տարբեր շրջաններու մէջ Դամասկոսի հեղինակութեան վերականգնումը: Եզրակացութեան համար. Հալէպի ազատագրութիւնը, ռազմագէտներու կարծիքով, կը խորհրդանշէ Սուրիոյ ազատագրութիւնը` ահաբեկչական որջերէն եւ պատերազմին վերջակէտը:
Սուրիական բանակը եւ ռուսական ուժեր կը գտնուին պատմական յաղթանակի մը մատոյցներուն: Հալէպի ազատագրութիւնը ինքնաբերաբար աշխարհաքաղաքական, ռազմավարական անկիւնադարձային հետեւանքներ պիտի ունենայ Միջին Արեւելքի քաղաքականութեան վրայ:
Պատմութիւնը ոսկիէ տառերով պիտի արձանագրէ Հալէպի ազատագրութիւնը, Սուրիոյ դէմ միջազգային խաչակրութեան պատմական պարտութիւնը, ինչպէս նաեւ` Սուրիոյ պետութեան, բանակին եւ ժողովուրդին հերոսական դիմադրութիւնը:
Դժբախտաբար գաղութատիրութիւնը պիտի չհրաժարի Միջին Արեւելքի ժողովուրդներու դէմ արշաւներէն: Սուրիոյ ժողովուրդը սուղ կը վճարէ իր ինքնութիւնը պահպանելու գինը: Յաղթանակը սուղ արժեց նաեւ սուրիահայ համայնքին: Այս մասին հաւանաբար գրենք մէկ այլ առիթով:
Մենք` Ցեղասպանութենէն վերապրողներու ժառանգորդներս, բռնատիրութիւններու դէմ, հողի եւ ազգային ազատագրութեան համար պայքարող ժողովուրդի զաւակներս, քաջ գիտենք, որ ժողովրդավարութեան կեղծ կարգախօսներով պճնուած միջազգային եւ արաբական դաւադրութիւններու հետեւանք էր Սուրիոյ քաղաքացիական պատերազմը:
Պատմութիւնը վստահաբար իր գնահատականը պիտի տայ քանի մը դահեկանի համար արաբ ժողովուրդին իրաւունքներէն հրաժարող «եղբայր» պետութիւններուն, քաղաքական կազմակերպութիւններուն: Երանի միայն արաբ պետութիւններ եւ հոսանքներ ըլլային անոնք…
ԱՀԱՐՈՆ ՇԽՐՏԸՄԵԱՆ
Հայ Երիտասարդական Ընկերակցութեան
Մամլոյ Եւ Քարոզչութեան Պատասխանատու Եւ
Yerepouni-News.Com Լրատուական Կայքէջի Խմբագիր