Լիբանանի նորակազմ կառավարութիւնը փտածութեան դէմ պայքարելու միտումներ կը դրսեւորէ: Խորհրդարանը համընթաց քայլերու կը դիմէ այդ ուղղութեամբ: Զգայացունց յայտարարութիւններ, երկիրը ախտավարակ հիւանդութենէ փրկելու կոչեր, պետական պիւտճէին հարուած հասցուցած մարդոց ամենաթողութեան վերջ տալու պահանջներ` պետաքաղաքական մթնոլորտ ստեղծած են:
Զուգահեռ անշուշտ կայ թերահաւատութիւն: Լիբանանեան փորձառութեան վրայ հիմնուած կասկածանքով մօտեցում` նման առաջադրանքի եւ փտածութեան դէմ պարագայական, ընտրովի սահմանափակ պայքարի փաստը նկատի ունենալով: Աւելի՛ն: Կայ համատարած մօտեցում, որ երկրին մէջ այս երեւոյթը ունի համակարգային դրուածք եւ համատարած է տարբեր ոլորտներու վրայ, տարբեր ուղղութիւններով. հետեւաբար ապարդիւն փորձեր են կատարուածները:
Ներկայ վարչակարգի բաղադրիչ հիմնական ուժի կարգախօսը` «Փոփոխութիւն եւ բարեկարգում», ցարդ յայտարարուած առաջադրանքներուն ուղղութեամբ համոզիչ իրագործումներ չէ արձանագրած, ինչ որ տարակուսանքի մօտեցումի տարածումը խթանած է:
Պետական պիւտճէի պատկերը կը թուի, որ մտահոգիչ սահմաններ հատած է` թէ՛ երկրի պարտքի բազմապատկուող թիւերու եւ թէ՛ եկամուտներու եւ ծախսերու անհաւասարակշիռ թիւերու արձանագրումով: Հետեւող գործազրկութիւնն ու արտահոսքը, ինչպէս նաեւ սուրիական ճգնաժամի բերումով այստեղ ապաստանած տեղահանուածներու տունդարձի գործողութիւններու ձգձգումը ֆինանսատնտեսական գերծանրաբեռնուածութեան մատնած են երկիրը:
Փտածութեան դէմ յայտարարուող պայքարը համալիր ծրագիրներու կը կարօտի: Քաղաքացիականէն մինչեւ վարչակառավարման մեքենականութիւններ` արմատական բարեփոխումներու երկարատեւ գործընծթացի մասին է խօսքը, եթէ անշուշտ կայ վճռակամութիւն իրավիճակ փոխելու:
Նման դժուար պայքար մղեց Լիբանանը եւ կարելի է ըսել, որ պատուով դուրս եկաւ ամբողջ տարածաշրջանին սպառնացող ծայրայեղականներու ահաբեկչութեան դէմ, որոնք սասանած էին արաբական տարբեր երկիրներու պետականութիւնները եւ սպառնացած անոնց տարածքային ամբողջականութեանց նոյնիսկ: Այդ ալիքի Լիբանան ներթափանցման տարատեսակ եւ բազմաթիւ փորձերը ձախողութեան մատնուեցան շնորհիւ լիբանանեան զինեալ ուժերուն, որոնց նեցուկ էին ամբողջ պետաքաղաքական դաշտը բաղկացնող բոլոր ուժերը:
Դժուար պայքարի ազդանշան կու տայ պետութիւնը այս անգամ Օսմանեան պետութենէն ժառանգուած համատարած ախտին դէմ: Նման ազդանշանի հրապարակում սկզբունքով պէտք է ենթադրէ համալիբանանեան համաձայնութիւն` նման ծաւալի ախտահարուած ոլորտները բարեփոխելու համար:
Մասնակի պարագայականութեան սահմաններուն մէջ դատապարտուած կը մնայ որեւէ հակափտածութեան գործողութիւն, եթէ չկայ համալիբանանեան կամքը երկիրը ախտազերծելու:
Քաղաքական տրամաբանութիւնը կը յուշէ, որ այս առաջադրանքներով ազդեցութեան գօտիներու ընդարձակման քայլեր կ՛առնեն գերտէրութիւնները` գործիքակազմեր, մեթոտներ, վարժողական ծրագիրներ տրամադրելով, եւ դիմացը տուեալներու պետական շտեմարանները սեփականաշնորհելով:
Յայտարարուող առաջադրանքի իրականացումը լիբանանեան որոշումի, մեթոտներու, կիրարկման ինքնուրոյնութիւնը պահելու խնդիր կ՛ունենայ անպայման: Մինչեւ այդ սակայն անհրաժեշտ է համալիբանանեան վճռակամութեան կայացում` վիթխարի աւանդ ունեցող այս խնդիրի դիմակայման համար:
«Ա.»