Մ. Ն.
Կիրակի գիշեր Անթիլիասի մայրավանքին մէջ, «սիրուն հրեշտակներ» թեւածեցին, երբ, հակառակ աննպաստ եղանակին` յորդ բազմութիւն մը լեցուցած էր մայր տաճարը, ուր հոգելոյս Զարեհ արք. Ազնաւորեանի երաժշտական ժառանգութենէն քաղուած փունջ մը երգեր «Նարեկացի» եւ «Շնորհալի» երգչախումբերուն կողմէ հրամցուեցան մեզի` Զարեհ սրբազանին յիշատակով օծուն սրբաբոյր մթնոլորտին մէջ:
«Աստուծոյ զաւակներ»-ս Երուսաղէմէն Դամասկոս, Էջմիածնէն Օշական, Աւարայրէն Վան, Հռոմկլայէն Սիս եւ Անթիլիաս փոխադրուեցանք սրբազանին հետ` Պօղոս սուրբին, Լուսաւորիչ սուրբին, Մեսրոպ Մաշտոց սուրբին, Քաջն Վարդան սուրբին, Նարեկացի սուրբին եւ Շնորհալի սուրբին բարեխօսութեամբ…
Դանիէլ Վարուժանի «Ձօն»-ով Զարեհ սրբազան փառքի, կարօտի, արիւնի եւ պայքարի թելերով մեզ հիւսեց մեր հայրենիքին, պանդուխտներուն, հարսերուն, սուրի ու կրակի զոհերուն, որբ տունին, ալեհեր հօր, կարեվէր մօր եւ հայ մարտիկներուն…
Մեզի հետ էր Զարեհ սրբազան, ինչպէս միշտ եղած է եւ պիտի ըլլայ` մեր բոլոր սուրբերուն եւ հերոսներուն նման, որպէսզի լոյսի, ողբի, սիրտի, ծուխի եւ բոցի «մաքուր, ճերմակ թեւերով» մեզ թռցնէ երկինքէն վեր` իր մօտ, ուր`
«Անմեղ, անբիծ հոգիներ
կ՛օրհնեն Տէրը ցերեկ-գիշեր,
հըլու, ազնիւ, անվեհեր»: