ՎԱՀՐԱՄ ԷՄՄԻԵԱՆ
Պահրէյնի արտաքին գործոց նախարարը Վարշաւայի մէջ Միջին Արեւելքին նուիրուած խորհրդաժողովի նիստի ընթացքին յայտնեց. «Հասակ առինք` ըսելով, որ պաղեստինեւիսրայէլեան տագնապը կարեւորագոյն դատն է, եւ զայն պէտք է այս կամ այն ճամբով լուծել, սակայն վերջին փուլին տեսանք աւելի մեծ մարտահրաւէր մը, որ արդի պատմութեան մէջ ամէնէն վտանգաւորն է` Իրանի հանրապետութեան ներկայացուցած վտանգը»: Արաբական Միացեալ Էմիրութիւններու արտաքին գործոց նախարարն ալ նոյն նիստի ընթացքին արդարացուց Սուրիոյ մէջ իրանեան դիրքերուն դէմ իսրայէլեան յարձակումները` նշելով. «Իսրայէլ Իրանի վտանգէն ինքզինք պաշտպանելու իրաւունք ունի»: Խօսքեր, որոնք ընդգծուած նշանակութիւն կը ստանան Իսրայէլի վարչապետին հետ ժողովի ընթացքին արտասանուած ըլլալնուն համար:
Իրանեան «վտանգը» Պաղեստինեան դատէն աւելի կարեւոր ու անմիջական նկատող այդ կեցուածքները նորութիւն չէին. նորութիւնը խորհրդաժողովի ընթացքին արաբական աշխարհի մէջ կշիռ ունեցող երկիրներու` Սէուտական Արաբիոյ, Արաբական Միացեալ Էմիրութիւններու, Պահրէյնի, ինչպէս նաեւ Եմէնի բարձրաստիճան պաշտօնատարներու Իսրայէլի վարչապետին հետ նոյն սեղանին վրայ նստիլն էր, ինչ որ վերջինիս կողմէ նկատուեցաւ «պատմական շրջադարձ մը», իսկ Միացեալ Նահանգներու արտաքին գործոց նախարարին կողմէ` «պատմական օր մը»: Օման այդ երկիրներէն առաջ արդէն դիմած էր նոյն «պատմական» քայլին, իսկ Եգիպտոսն ու Յորդանանը արդէն իսկ շատոնց իրենց յարաբերութիւնները բնականոնացուցած են Թել Աւիւի հետ:
Իրանի «վտանգ»-ին Պաղեստինեան դատէն կարեւոր դառնալը պաղեստինցիներուն համար ո՛չ միայն խիստ ցաւալի է, այլ նաեւ` վտանգաւոր: Արաբական երկիրներու «տերեւաթափին» լոյսին տակ` Պաղեստինեան դատի արդար լուծման հեռանկարը հետզհետէ կը մթագնի եւ ատոր զուգահեռ կը սկսի ուրուագծուիլ պաղեստինցիներու բնակեցման հեռանկարը, որ չի կրնար չմտահոգել պաղեստինեան գաղթակայաններ հիւրընկալող երկիրները: Ահա այս է Վարշաւայի խորհրդաժողովին անմիջական արդիւնքը: