Հայաստանի Հանրապետութեան անկախութեան իւրաքանչիւր տարելից առիթ է գնահատելու եւ արժեւորելու հայ ժողովրդի անցած պատմական եւ քաղաքակրթական ուղին, անդրադառնալու նուաճումներին եւ թերացումներին, նախանշելու ապագայ ուղին:
Բայց, ամէնից առաջ, այս օրը կրկին ու կրկին մեզ բոլորիս ներկայանում է իր առանցքային խորհրդով, իր մնայուն գաղափարով եւ անանցանելի արժէքով: Իւրաքանչիւր ժողովուրդ փայփայել է անկախ պետականութեան երազանքը եւ փափաքել տեսնել դրա իրականացումը:
Մեզ` որպէս հայ ժողովուրդ, վերջին հարիւր տարուայ ընթացքում յաջողուել է երկու անգամ իրականացնել այդ երազանքը:
Առաջին Հանրապետութիւնը շրջադարձային էր այդ առումով եւ մեզ տուեց այն համոզումը, որ անկախութիւնն իրականանալի է եւ հասանելի նոյնիսկ երկար դարերի ընդմիջումից յետոյ: Սակայն, միաժամանակ, մենք դառը, ճշմարիտ ու իրատեսական դասեր քաղեցինք առ այն, որ անկախութեան ձեռք բերումն ու պահպանումը պահանջում են մաքառում, անխոնջ ջանք, անսահման նուիրում, յամառութիւն եւ հետեւողականութիւն` սերնդէ-սերունդ:
Վերջին երկու եւ կէս տասնամեակների ընթացքում եւս մենք բախւում ենք համարեա նոյն մարտահրաւէրներին` ինչ հարիւր տարի առաջ: Սակայն, մենք ազգովին հիմա շատ աւելի ուժեղ ենք, կորովի եւ համախումբ: Այդ իսկ պատճառով պէտք է ներդնենք առաւելագոյն ջանք, որպէսզի չվատնենք պատմութեան կողմից մեզ տրուած այս պատեհութիւնը:
Դա մեզ համար կենսական անհրաժեշտութիւն է` պահպանելու հայ ժողովրդի դիմագիծը, հոգեւոր նկարագիրը, սեփական ինքնութեամբ աշխարհին ներկայանալու, անջնջելի հետք ու իւրայատուկ ժառանգութիւն թողնելու առաքելութիւնը:
Ունե՞նք արդեօք այս գիտակցութիւնը: Վստահաբար ունե՛նք: Միաժամանակ, կարիք ունենք այն դարձնելու հետեւողական գործելաոճ, կենսակերպ:
Անհատական ազատութեան գաղափարն իրօք խիստ գայթակղիչ է: Միեւնոյն է այն չի հակասում եւ խոչընդոտ չէ ազգային ինքնութեան պահպանմանը, պետականութեան շուրջ համախմբուած հաւաքական կերպարով ներկայանալուն: Կասկածից վեր է, որ այդ երկուսի համակցութեամբ նուաճումների հասնելու հաւանականութիւնն առաւել մեծ է եւ գնահատանքի արժանի: Այդ միջոցով է, որ կարելի է ստեղծել պատմութեան համար մնայուն արժէքներ եւ ունենալ դերակատարութիւն:
Շնորհաւորում եմ մեզ բոլորիս Հայաստանի Հանրապետութեան անկախութեան 26-րդ տարելիցի առիթով: Թող այն լինի հայ ժողովրդի բոլոր հատուածների նուաճումների հերթական աստիճանը եւ դէպի ապագան միտուած երկարատեւ ուղու հերթական հանգրուանը: