ՍԻՐԱՆՈՒՇ ԵՂԻԱԶԱՐԵԱՆ
Մարտական հերթափոխի երդումը տալուց յետոյ Հայաստանի հիւսիսային դարպասի զինծառայողները շտապում են սահման` խօսքը գործ դարձնելու: Հայաստանի պաշտպանութեան նախարարութեան կողմից կազմակերպուած երկօրեայ դասընթացի շրջանակներում հաւատարմագրուած լրագրողները եւս սահմանում են: Առաջին հարցը, որի մասին դիրք հասնողին զեկուցում են զինծառայողները, սահմանի հանգստութիւնն ու իրենց կողմից ապահովուող անվտանգութիւնն է:
Զօրամասի հրամանատար գնդապետ Սողոմոն Խաչատրեանը ներկայացնում է դիրքի կառուցապատման եւ սարքերի կահաւորուածութիւնը` վստահեցնելով, որ իւրաքանչիւր պահի բոլոր դիրքերը պատրաստ են մարտի:
«Առաջնահերթ անհրաժեշտութեան զինատեսակները` հիմնականում խոշոր տրամաչափի գնդացիրները, մշտապէս գտնւում են իրենց կրակային դիրքերում, զէնքի հերթափոխ չի լինում, այն միշտ պատրաստ է կրակի: Կարեւոր է նաեւ կառոյցների պատրաստուածութիւնը. ելնելով այս կամ այն հանգամանքից` խրամուղիների մի մասը փայտով, մի մասն էլ քարով ենք ամրացրել», ասում է գնդապետն ու վստահեցնում, որ այստեղ ամէն մի մանրուք իր նշանակութիւնն ու կարեւորութիւնն ունի: Խաչատրեանը նշում է, որ նմանատիպ կառուցուածք ու մարտական պատրաստուածութիւն ունեն նաեւ շղթայի միւս դիրքերը:
Մայոր Գրիգոր Ներսիսեանը լրացնում է գնդապետին` ցանկացած դիրք ապահովուած է գիշերային տեսանելիութեան սարքերով, ինչն առաւել հեշտացնում է գիշերային ժամերի հերթապահութիւնը` զինծառայողի կողմից վերահսկելի դարձնելով տարածքը.
«Սահմանում իրավիճակը հանդարտ ու հանգիստ է, գրեթէ 20 օր հրադադարը մեր ուղղութեամբ չի խախտուել: Խախտման դէպքում ամէն պահի տղաները պատրաստ են պատուով ու անխոչընդոտ կատարելու իրենց առջեւ դրուած մարտական խնդիրը: Ընդհանրապէս, մեր դիրքերի ուղղութեամբ հակառակորդը միշտ զգուշաւորութիւն է ցուցաբերում` չփորձելով աւելորդ խնդիրներ ստեղծել իր համար»:
Անդրադառնալով դիրքապահ տղաներին` մայոր Ներսիսեանը նկատում է. «Տղաները գիտակցաբար են բարձրանում դիրքեր, սահմանապահի գործն անում են բարձր պատասխանատուութեամբ ու պահի լրջութեան գիտակցմամբ: Շատերն այս տարածաշրջանից են, այստեղ կանգնելով` պաշտպանում են ոչ միայն հայրենիքի սահմանը, այլեւ` իրենց տունը: Ժողովուրդը թող հանգիստ լինի ու զբաղուի իր առօրեայով. սահմանը պահելն ու դրանով մտահոգուելը մեր խնդիրն է»:
Հայաստանի պաշտպանութեան նախարարութեան 3-րդ բանակային զօրամիաւորման հրամանատարի անձնակազմի հետ տարուող աշխատանքների գծով տեղակալ, գնդապետ Հայկ Պետրոսեանն ասում է, որ 2016-ին, ի տարբերութիւն նախորդ երկու տարիների, այս զօրամիաւորման պահպանութեան տեղամասերում չի արձանագրուել հակառակորդի կողմից կիրառուած ականանետային կրակոց: Կրակոցների ընդհանուր թիւը եւս այս տարածքում նուազել է:
Գնդապետ Պետրոսեանը նշում է, որ հակառակորդը ծանր զէնքի կիրառմամբ հիմնականում թիրախաւորում է սահմանամերձ բնակավայրերը` նպատակ ունենալով խոչընդոտել գիւղացիների գարնանային կամ աշնանային գիւղատնտեսական աշխատանքները, այդ կերպ ահաբեկելով խաղաղ բնակչութեանը:
«Հայկական կողմը հակառակորդի կրակոցներին արձագանգում է բացառիկ դէպքերում, երբ դրանք ուղղուած են լինում մեր խաղաղ բնակավայրերին», ասում է նա:
Տաւուշի մարզի շուրջ 24 համայնք գտնւում է հակառակորդի անմիջական նշանառութեան տակ եւ Հայաստանի կառավարութեան 2015թ. որոշմամբ ազատուած է հարկերից:
Դիրքում շրջելուց յետոյ լինում ենք գետնատնակում ու խոհանոցում, ծանօթանում զինուորի բաժին սննդի հետ: Մայոր Ներսիսեանը նշում է, որ սննդամթերքի քանակն ու բազմազանութիւնը գնալով աւելանում է, իսկ որակական խնդիրներ չեն ունենում, ինչը հաստատում են զինծառայողները:
Հրաժեշտի պահին զինուորներից մէկը նկատում է. «Մի քանի օրից գայիք, մեր տօնածառն էլ կը նկարէիք»: Յետոյ յաւելում, որ դեկտեմբերի 20-ից յետոյ սկսում են զարդարել տարածքը` չշեղուելով ծառայութիւնից:
«Էդպէս մեզ լրիւ տանն ենք զգում, չնայած` տօնական ու բարձր տրամադրութիւնը դիրքում միշտ առկայ է», ասում է նա:
Ամանորի շեմին հակառակորդի հնարաւոր աշխուժացման վերաբերեալ հարցը ստանում է կարճ ու յստակ պատասխան. «Ստիպելու ենք չաշխուժանան: