Պատրաստեց՝ ՄԱՐԻԱ ԱՐԱՊԱԹԼԵԱՆ
Առողջապահութեան համաշխարհային կազմակերպութեան ուսումնասիրութեան արդիւնքներով` աշխարհի վրայ 6 վայրկեանը անգամ մը ծխախոտի մը պատճառով յառաջացած հիւանդութիւններէն մարդ կը մահանայ: 17 նոյեմբերը ծխելէ հրաժարելու միջազգային օր է:
Վերջին տասը տարուան ընթացքին Հայաստանի մէջ տղոց մօտ առկայ է ծխախոտի օգտագործման նուազելու միտում: Կիներուն պարագային ծխելը աւելի տարածուած է մայրաքաղաք Երեւանի, քան մարզերուն կամ գիւղական շրջաններուն մէջ: Դեռահասները կը սկսին ծխել 16-17 տարեկանին, երբ անոնք ծնողքի տիրապետութեան տակէն դուրս կ՛ելլեն եւ կը սկսին ինքնուրոյն կեանք վարել:
Ծխող տղոց վաղաժամ մահուան վտանգը, բաղդատելով չծխողներուն, 2-3 անգամ բարձր է, իսկ կիներունը` 1,3-1,9 անգամ: Վտանգը հետզհետէ կ՛աւելնայ գլանիկներու քանակի յաւելման եւ ծխախոտի օգտագործման տեւողութեան երկարաձգման համաձայն:
Ծխողներուն մօտ թոքի քաղցկեղի վտանգը 12 անգամով աւելցած է, սրտի կաթուածի, ուղեղային եւ երակներու վերաբերող հիւանդութիւններու վտանգը 50 առ հարիւրով: Թոքերու մնայուն խցուած ըլլալու հիւանդութիւններէն մահացողներուն 80 առ հարիւրին պատճառը ծխախոտի գործածութիւնն է:
Ծխախոտի օգտագործման տարածուածութեան եւ անոր զուգահեռ առողջապահական, տնտեսական եւ ընկերային հետեւանքները կանխարգիլելու նպատակով Հայաստանի մէջ տարբեր ձեւեր, օրէնսդրական սահմանափակումներ եւ այլ նախաձեռնութիւններ կը կատարուին:
Հայաստանի մէջ ծխելու դէմ պայքարելու քարոզչութիւնը բնակչութեան տարիքային բոլոր խումբերուն ուղղուած է, անիկա առողջապահութեան նախարարութեան կողմէ մշակուած եւ կատարելու գործուած Առողջ ապրելակերպի ռազմավարութեան կարեւորագոյն բաղադրիչն է: