Զրոյցը վարեց՝ ԱՆՈՒՇ ԹՐՈՒԱՆՑ
Համազգայինի «Լիւսի Թիւթիւնճեան» ցուցասրահում նախատեսուած յառաջիկայ ցուցահանդէսը, Հայաստանից տասնմէկ արուեստագէտների ներկայութեամբ, ոչ միայն հետաքրքրական է լինելու մասնակիցների եւ ցուցադրուող գործերի թուով, այլ նաեւ թերեւս աննախադէպ է այն առումով, որ ցուցահանդէսին մասնակից երիտասարդները նոր Հայաստանի պատկերը կերտող սերնդից են: Ընդամէնը մէկ-երկու ամիս առաջ նրանց կարելի էր տեսնել փողոցներում` ցոյցերի եւ բողոքի գործողութիւնների մասնակցելիս, իսկ այսօր արդէն արուեստի իրենց աշխարհն են վերադարձել` աւելի խաղաղ, բայց նոր մի բան ստեղծելու եւ անպայման փոխելու ամուր հաւատամքով:
Ցուցահանդէսից առաջ նրանք հաւաքուել էին նկարիչներից մէկի արուեստանոցում, որ արուեստի միջավայր էր` Երեւանի կեդրոնական փողոցներից մէկին նայող հնագոյն մի շէնքի մէջ: Հին այդ շինութիւնը երիտասարդ ստեղծագործողներն իրենք իրենցով կենդանացրել, նոր շունչ են հաղորդել, դարձրել մտերմիկ մի միջավայր, ուր յաճախ են հաւաքւում, զրուցում արուեստի հարցերից, իրենց մտածումներն ու ցանկութիւնները կիսում, խօսում նաեւ դժուարութիւններից եւ հոգսերից, փնտռում` դրանք յաղթահարելու միջոցներ: Այս արուեստագէտներից իւրաքանչիւրն ունի իր ոճը, իր ժանրը, ձեռագիրը, եւ մէկը միւսից խիստ տարբերուող արուեստագէտներ են նրանք:
«Ազդակ»-ը ներկայ եղաւ այդ հաւաքին եւ փորձեց նրանց լիբանանեան ցուցահանդէսից առաջ արուեստասէրին ներկայացնել երիտասարդ ստեղծագործողներից իւրաքանչիւրին` իր սպասումներով, մտածումներով: Նրանցից միայն Կայ Ղազանճեանն ու Ժորա Գասպարեանն են եղել Պէյրութում, ցուցահանդէս են ունեցել, Ռոմէօ Մելիքեանի գործերից էլ են ցուցադրուել, իսկ Արա Շահումեանն էլ եղել է իր հօր` Յաղթանակ Շահումեանի` վերջերս «Լիւսի Թիւթիւնճեան» ցուցասրահում բացուած ցուցահանդէսին, բայց միւսների համար թէ՛ Լիբանանը, թէ՛ հայկական համայնքը, ըստ էութեան, անծանօթ են, եւ նրանք անհամբեր էին օր առաջ տեսնելու երկիրն ու շփուելու համայնքի անդամների հետ:
Յակոբ Վարդանեան.- Պէյրութը շատ եմ ուզում տեսնել, յատկապէս ինձ հետաքրքիր է պատերազմից յետոյ նրա վերականգնումը: Իւրաքանչիւր արուեստագէտի էլ հետաքրքիր է, թէ ինչպէ՛ս է քանդուածը, պատերազմի աւերուածը վերականգնուել, նոր տեսքի եկել: Միշտ լսել ենք այդ մասին, գիտենք, որ պատերազմ ունեցած երկիր է, որ տեւական ժամանակ քանդուել է, յետոյ` կառուցուել: Արուեստագէտը չի կարող անտարբեր անցնել նման երեւոյթների կողքով, եւ չի բացառւում, որ կարող է այդ պատկերները` հնի եւ նորի, քանդուածի եւ վերականգնուածի, նաեւ մեր ներաշխարհով անցնեն եւ ստեղծագործական նոր նիւթեր դառնան: Ինքս քանդակագործ եմ, եւ քանդակն էլ իւրայատուկ արտայայտչամիջոց է, որ ունի լայն հնարաւորութիւններ` ասելիքդ տեղ հասցնելու համար:
Ես ցուցադրուել եմ Գերմանիայում, լաւ ընդունելութիւն եմ գտել, Հայաստանում առայժմ խմբակային ցուցահանդէսներ եմ ունեցել, անհատական ցուցահանդէս ինքս դեռ չեմ ուզել, կարծում եմ` դրա ժամանակն էլ կը գայ:
Ռոմէօ Մելիքեան.– Այդ պատկերները ինձ էլ են հետաքրքրում, որովհետեւ ես ինքս նկարում եմ հիմնականում շէնք-շինութիւններ, ամբոխներ, ինչպէս նաեւ նկարում եմ պատերազմական, հակամարտութիւնների տեսարաններ: Ծնունդով սահմանամերձ Տաւուշից եմ, որտեղ մինչեւ հիմա էլ պատերազմը չի դադարել: Փոքր տարիքից ծանօթ եմ, թէ ի՛նչ է պատերազմը, ի՛նչ տեսք ունի, ի՛նչ գոյն ունի:
Նկարներիս մէջ տեղ են գտել այդ թեմաները: Նկարագրում եմ հակամարտութիւնների պատճառած տագնապը, վտանգները, մարդկանց փախուստը, որ երբեմն անորոշ է թւում, բայց դա այն ամէն ինչն է, ինչ իրենց հետ բերում են պատերազմները, հակամարտութիւնները: Մասնագիտութեամբ լինելով գեղանկարիչ` միայն դրանով եմ զբաղւում եւ իմ մասնագիտութեան միջոցով եմ փորձում իմ խօսքն ասել: Եթէ ինչ-որ ժամանակ չեմ նկարում, զգում եմ, որ խօսքս կիսատ է մնում, մի բան տեղ չի հասնում, ուստի նկարելը ինձ համար իսկական ինքնարտայայտման ձեւ է դարձել: Անգլիայում եմ ցուցադրուել, մասնաւոր պատկերասրահներում ցուցահանդէսների եմ մասնակցել, Լոնտոնի «Արթ-Ֆեսթ»-ին եմ մասնակցել, իմ աշխատանքները գտնւում են Հայաստանի, Իտալիայի, Ռուսաստանի եւ Միացեալ Նահանգների մասնաւոր հաւաքածոներում: Լիբանանում էլ են իմ գործերը ցուցադրուել, այնտեղ էլ մասնաւոր հաւաքածոներում կան իմ աշխատանքներից: Երեւանի Ժամանակակից արուեստի թանգարանում իմ անհատական ցուցահանդէսին եմ պատրաստւում, արուեստասէրը աւելի մօտիկից կարող է իմ նկարներին ծանօթանալ այդ ցուցահանդէսով: Չեմ կարող ասել, թէ հեշտ է միայն նկարչութեամբ ապրելը, նկարում ես, հնարաւոր է` մի օր վաճառել, մի օր չվաճառել, բայց, դէ, մի ճանապարհ է, որ ես եմ ընտրել եւ դժգոհ չեմ իմ ընտրածից: Ինքս Ռուսաստանի Նկարիչների միութեան անդամ եմ եւ ասեմ, որ Ռուսաստանում շատ մեծ տեղ են տալիս Նկարիչների միութեան անդամներին, հնարաւորութիւնները նրանց համար աւելի շատ են, քան Հայաստանում` Հայաստանի Նկարիչների միութեան անդամ լինելը: Թէկուզ միայն Ռուսաստանի Նկարիչների միութեան տոմս ունենալը շատ հարցեր կարող է լուծել, մարդիկ յարգում են այդ տոմսն ունեցողին:
Սիլվա Մկրտչեան.- Ես նոյնպէս նկարչական կրթութիւն եմ ստացել եւ շատ երջանիկ եմ, որ հէնց արուեստի ճանապարհն եմ ընտրել, քանի որ իմ անսահման սէրը բարիի, գեղեցիկի եւ ինձ շրջապատող երեւոյթների հանդէպ արուեստի միջոցով եմ դրսեւորում` անչափ սիրելով արուեստը… Կարծում եմ, որ ստեղծագործողը պէտք է լինի շատ անկեղծ: Անկեղծ` նախ ինքն իր առջեւ, յետոյ կտաւի, կամ` այդ երկուսը միասին: Կտաւը ինձ համար հայելի է… Ես անընդհատ բացայայտում ու գտնում եմ ինքս ինձ ամէն անգամ նորովի… Ես պատրաստւում եմ մինչեւ վերջ գնալ եւ կոտրել այն կարծրատիպը, որ իբր թէ չկան պինդ եւ ուժեղ արուեստագէտ կանայք: Դա այդպէս չէ, կինն էլ կարող է հաւասարապէս արուեստի մէջ լինել նոյնքան ամուր եւ ուժեղ, որքան` տղամարդը: Ես քանդակ էլ եմ անում, խեցեգործութեամբ եմ էլ զբաղւում, կրաֆիքա էլ եմ անում: Ի հարկէ քանդակներս չեմ տանում Պէյրութ, խեցեգործական աշխատանքներով եւ կրաֆիքայով պիտի ներկայանամ, բայց կարծում եմ` դա էլ բաւական է, որ կարողանան իմ ոճը եւ իմ ապրումները զգան արուեստասէրները: Ես միշտ հաւատացած եմ եղել, որ զգացումով արուած գործը անպայման կարող է գտնել թէկուզ մէկին, որ զգայ նոյն բաները, ինչ զգացել է արուեստագէտը:
Ինքս կապի ժամանակակից միջոցները շատ չեմ օգտագործում, շատ չեմ սիրում այդ ձեւով հաղորդակցուելը, նախընտրում եմ մարդկային պարզ շփումը: Կարծում եմ, որ արուեստագէտը ստեղծագործելով պիտի զբաղուի, իսկ նրա ցուցահանդէսի կազմակերպչական հարցերով մէկ այլ մարդ պիտի զբաղուի, որպէսզի արուեստագէտի միտքը խանգարուած չլինի կազմակերպչական հարցերով եւ ինքը միշտ ստեղծագործի: Հայաստանում դա ի հարկէ շատ դժուար բան է, մեզ մօտ առայժմ հնարաւոր չէ:
Կայ Ղազանճեան.- Երբ առաջին անգամ ցուցադրուեցի Պէյրութում, տպաւորութիւնները շատ լաւ էին, մինչեւ հիմա յիշում եմ այդ հրաշալի ընդունելութիւնը. այնպէս որ, այս անգամ վստահօրէն եմ գնում եւ համոզուած եմ, որ նոյն ընդունելութիւնը նաեւ իմ արուեստագէտ գործընկերների հանդէպ է լինելու: Շատ տեղերում եմ ցուցադրուել, բոլոր երկրներն էլ իրենց առանձնայատկութիւնն ունեն, բայց Պէյրութի ընդունելութիւնը, յատկապէս` հայերի կողմից, միշտ կը յիշուի: Տասնմէկ օր ենք մնացել, եւ իւրաքանչիւր օրը տպաւորիչ է եղել: Եզակի դէպք էր, որ ես օտար չէի զգում ինձ Պէյրութում:
Այսօրուայ աշխարհը շատ բաց աշխարհ է, համացանցը մեծ հնարաւորութիւններ է տալիս ստեղծագործողներին` կապեր հաստատելու, իրենց գործերը ներկայացնելու առումով, եւ մենք` նկարիչներս էլ, լաւ կը լինի օգտուենք այդ հնարաւորութիւնից:
Լուսինէ Աբրահամեան.– Ես թէ՛ նկարչութեամբ եմ զբաղւում, թէ՛ խեցեգործութեամբ, իմ ընկերների պէս ես էլ մասնագիտական կրթութիւն եմ ստացել, տարբեր երկրներում եմ ցուցադրուել, անցեալ տարի երկու անգամ Ճափոնիայում են ցուցադրուել իմ աշխատանքները: Պէյրութի այս ցուցահանդէսը հրաշալի հնարաւորութիւն է հայ երիտասարդների համար` համատեղ ներկայանալու, ցուցադրուելու: Պէյրութում չեմ եղել եւ շատ ուրախ եմ այս հնարաւորութեան համար: Ինձ համար ճամբորդել` նշանակում է շարունակել ապրել ու սովորել: Հպարտ եմ, որ Հայաստանը ցոյց է տալու իր երիտասարդ արուեստագէտներին: Սա հնարաւորութիւն է քեզ կողքից դիտելու թէ՛ այլ արուեստագէտների կողքին եւ թէ՛ այլ մշակոյթում: Ցուցադրելու եմ իմ վերջին շրջանում ստեղծած աշխատանքները: Դրանք իմ քաղաքի տեսարաններն են:
Մօտ երկու տարի առաջ ինձ սկսեց հետաքրքրել ճարտարապետութիւնը: Սկզբում նկարում էի քաղաքիս նշանաւոր վայրերը, ասենք` Քասքատը կամ Քիեւեան կամուրջը եւ այլն: Յետոյ սկսեցի քաղաքի պարզ ու սովորական վայրերը նկարել` մարդկանց տները, շէնքերը, այդպիսով ուզում էի գտնել քաղաքի միջավայրը եւ իմ վերաբերմունքը` իմ քաղաքի հանդէպ: Մի երկու նկար էլ ունեմ, ուր ծառեր կամ բնութեան տեսարաններ են պատկերուած, ու դրանք էլի մեր ծառերն են, օրինակ` խնձորենին կամ աշնան արեւը: Նոյն ձեւով ես հեռակայ կարգով փորձեցի գտնել նկարիչներ Լիբանանում, ծանօթանալ նրանց գործերին, մի հայ աղջկայ գործեր տեսայ, որ նոյնպէս իր միջավայրի ծնունդ էր, այսինքն երեւում էր, որ ստեղծագործողը, ուր որ ապրում է, այդ միջավայրի հետքն է կրում: Այդ աղջկայ նկարներում, օրինակ, ես աղէտային մի բան տեսայ: Յետոյ, երբ տեղեկանում ես, որ երկրում, ուր ապրում է արուեստագէտը, աղէտներ են եղել, նկարը աւելի հասկանալի է դառնում, սկսում ես ուրիշ ձեւով նայել նկարին:
Ռաֆայէլ Մանուկեան.- Ես քանդակագործ եմ, տարբեր նիւթերով եմ աշխատում, վերջին շրջանում արուած քանդակներս եմ տանելու, կարծում եմ Պէյրութում նաեւ այս ոճի քանդակներով են հետաքրքրուած, չնայած, անկեղծ ասեմ, որ հայերի պատրաստած արձանների նկարներ եմ տեսել Պէյրութում` կաթողիկոսարանում տեղադրուած եւ այնքան էլ տպաւորիչ կամ ոգեւորիչ չեն եղել:
Իմ վերջին գործերից մէկը յեղափոխութեանն է վերաբերւում, արդէն նոյնիսկ այստեղ հասցրել եմ ցուցադրել, բայց իմ քանդակների թեման ընդհանրապէս փղերն են: Առաջին հայեացքից նրանք փղեր են, բայց, ի հարկէ, ասելիքը տարբեր է, շատ բաներ կարելի է ցոյց տալ փղերի միջոցով: Փիղը միակ կենդանին է, որ չի կարողանում ցատկել, բայց ես հենց ցատկող փիղ եմ նկարում, թերեւս երազանք, փափաք եւ նման իղձեր կարելի է տեսնել իմ գործերի մէջ: Օրինակ, լարախաղաց փիղ եմ քանդակել, որ ինքնին արդէն հակասութիւն է, բայց արուեստը ինքը այդ հակասութիւնները իրականութիւն դարձնելու ճանապարհ է ինչ-որ տեղ: «Արթ Մայամի»-ում, «Արթ Տուպայ»-ում են ցուցադրուել իմ գործերը, եւրոպական երկրներում, արուեստաբանների արձագանգները յատկապէս հետաքրքիր են եղել, արձագանգել են, իսկ դա արդէն տպաւորութեան մասին է խօսում: Նոյնը չեմ կարող ասել Հայաստանի մասին, այստեղ դեռ շատ չեն այցելում ցուցահանդէսներ, պատճառը հաւանաբար տնտեսական վիճակով է պայմանաւորուած: Չհաշուած` ցուցահանդէսներ, որ կազմակերպում ենք, հիմնականում մեր ընկերները, արուեստագէտներն են գալիս, աւելի լայն ընդունելութիւն չեն գտնում ցուցահանդէսները, բայց յուսանք` այդ անտարբերութիւնն էլ ժամանակի ընթացքին կը վերանայ: Կ’ուզէինք, որ հասարակութեան բոլոր շերտերը գային, տեսնէին մեր գործերը: Ես դրսում ցուցահանդէս եմ ունեցել, հինգ օրում երեսուն հազարից աւելի այցելու է եկել, ի հարկէ, դրսի պայմաններն էլ ուրիշ են, այդ է պատճառը նաեւ, բայց ընդհանուր առմամբ, մեր հասարակութեան բոլոր շերտերին չէ, որ արուեստը հետաքրքրում է: Մեզ մօտ էքսպօ-ներ չեն լինում, լաւ կը լինէր, որ Հայաստանում էլ արթ-էքսպօ-ներ լինէին, որտեղ աւելի շատ մարդ է այցելում: Մի անգամ եղաւ այս տարի մեծ էքսպօ, բայց քիչ է: Մենք նման մեծ փառատօների, ցուցադրութիւններու կարիք ենք զգում:
Ժորա Գասպարեան.– Ես էլ եմ Կայի հետ ցուցադրուել Պէյրութում, ընդունելութիւնը բացառիկ էր, եւ վստահ եմ, որ այս անգամ էլ նոյնն է լինելու: Ես Հայաստանից դուրս այդպիսի տեղ չէի տեսել, ուր հայութիւնը, հայկականութիւնն այդքան ուժեղ լինէր` սկսած փողոցներում քայլելուց, մինչեւ ինչ-որ վայրեր այցելելը, ամէն տեղ կարելի էր զգալ հայութեան ուժը: Էլ չեմ ասում Այնճարի մասին, որտեղ նոյնպէս եղանք եւ նոյն բաները զգացինք:
Հիմա տարբեր աշխատանքներ են ցուցադրուելու եւ աւելի աշխուժ քննարկումներ կը լինեն, լայն ընդունելութիւն կը լինի: Ես Հայաստանից դուրս նաեւ Ֆլորենսիայում եմ սովորել մէկ տարի, այդ կրթութիւնն էլ, բնականաբար, լրացուցիչ ազդեցութիւն է ունեցել իմ արուեստի վրայ:
Արմինէ Յարութիւնեան.– Գեղարուեստի արհեստավարժ կրթութիւն եմ ստացել, նիւտ-արթով եմ զբաղւում, չմտածուած եմ ընտրել այդ ժանրը, որը անհատական է դարձել ինձ համար:
Նկարում եմ կանանց զգացողութիւնները, նրանց կիրքը, ապրումները, այն ամէնը, ինչ նրանք ստանում են կեանքից, տղամարդկանցից: Մարդիկ արդէն տարբերում են իմ նկարները, երբ նայում են, գիտեն, որ իմ նկարածն է: Ի հարկէ, քննադատութիւններ էլ են եղել, բայց ես գիտեմ, որ նորութիւնը միշտ էլ քննադատաբար է ընդունւում, յետոյ կամաց-կամաց հարթում է իր ճանապարհը: Միշտ ուզեցել եմ յիշուող, տպաւորուող նկարներ նկարել եւ արդէն հասել եմ դրան: Բոլորն էլ, ովքեր այս ցուցահանդէսի առթիւ գնում են Պէյրութ, ցուցադրուած, կայացած նկարիչներ են, բաւականին ճանաչուած, չնայած` երիտասարդ տարիքին:
Արա Շահումեան.– Առհասարակ արուեստագէտը ամէն ինչի կարիք էլ զգում է, մենք զգում ենք իրար կարիք, միասին հաւաքուելու, զրուցելու, ճամբորդելու, ցուցադրուելու կարիք…
Արուեստագէտի առջեւ լայն հնարաւորութիւններ պէտք է լինեն, որ նա միշտ շարժման մէջ լինի:
Հայկ Ղազարեան.- Մենք, ի հարկէ, շարժման մէջ ենք միշտ, չենք լճանում, բայց ինչ որ անում ենք, մեր ուժերով ենք անում, այսինքն մենք մեր «գլխի ճարը» տեսնում ենք, այսպէս ասած:
Ես էլ քանդակագործ եմ, տարբեր նիւթերով եմ աշխատում, տարբեր թեմաներ են ինձ յուզում, որոշակիօրէն հիմա կանանց թեման է, որ հետաքրքրում է ինձ, կինը` ազատ, հանգստի վիճակում: Համամարդկային թեմաներ են, որ բոլորին էլ կարող են յուզել: Ճիշդ է` հայկական միջավայրում եմ ցուցադրուելու, բայց կ՛ուզենայի նաեւ օտարները ներկայ լինէին ցուցահանդէսին, քանի որ այն, ինչ մենք տանում ենք, ազգային շեշտադրումներով սահմանափակուած չէ, ազատ ու անսահման թեմաներ են: Այսօրուայ ստեղծագործողը չի էլ կարող սահմանափակումներ ունենալ, նա ազատ է, ինչպէս ազատ է այսօր աշխարհը:
Պետիկ Պօղոսեան.– Ես էլ եմ շատ քաղաքներում ցուցադրուել, բայց միեւնոյնն է, ամէն նոր քաղաքում ներկայանալը սպասելի է ինձ համար: Ինձ միշտ հետաքրքրում է շարժումը` քաղաքներում, եւ այդ էլ նկարում եմ իմ քաղաքային տեսարաններում: Ես երբեմն լուսանկարների հիման վրայ եմ իմ նկարները նկարում եւ այդ ձեւով նաեւ Պէյրութն եմ նկարել հեռակայ կարգով: Ափսոս, չեմ կարող ներկայ լինել ցուցահանդէսին, զուտ անձնական պատճառներով չեմ մեկնում ընկերներիս հետ, բայց նկարներս այնտեղ կը լինեն, իրենք` նկարներս արդէն կը խօսեն:
Ջրաներկով եմ աշխատում եւ լսել եմ, որ այնտեղ` Պէյրութում, գնահատում են ջրաներկը եւ սիրում են: Հայկական միջավայրերում քիչ եմ ցուցադրուել եւ այս հնարաւորութեան համար ուրախ եմ: Եւ ընդհանրապէս, այսքան շատ աշխատանքներով ցուցահանդէսը հետաքրքիր է լինելու, քանի որ ամէն մէկը մի ոճով է ներկայանալու, աշխատանքները շատ բազմազան են: Կան նաեւ վերջին իրադարձութիւններին նուիրուած թարմ ստեղծագործութիւններ, ես ինքս էլ այդ թեմայով աշխատանք ունեմ:
Կայ Ղազանճեան.- Ուր էլ գնացել ենք, անպայման Հայաստանից են հարց տուել, եւ քանի որ մենք հիմա ապրում ենք նոր երկրում, այս անգամ երջանկութիւն ենք ունենալու պատմել նոր Հայաստանի մասին: Մենք էլ ենք մասնակցել այս նոր Հայաստանի կերտմանը, կը պատմենք, թէ ի՛նչ է փոխուել մեր երկրում, եւ դա լաւ է ոչ միայն մեզ համար, այլեւ` բոլոր հայերի համար: Մեր այցը միայն ցուցահանդէսի նպատակ չունի, կարծում եմ` սա, այսպէս ասած, գաղափարական այց է, քանի որ մենք այնտեղ ենք գնում նոր Հայաստանից, իսկ նոր Հայաստանի թեման բոլորին է հետաքրքրում:
Յակոբ Վարդանեան.- Գնում ենք, որ նոր Հայաստանում ապրելու մեր երջանկութիւնը կիսենք մեր սփիւռքահայ հայրենակիցների հետ ու նրանց ոգեւորենք, որ աւելի յաճախ գան Հայաստան:
Լուսինէ Աբրահամեան.– Երբ հարցնում են կեանքիս երջանիկ օրուայ մասին, պատկերացրէք, որ ծննդեան օր կամ նման մի անձնական օր միտքս չի գալիս, այլ անմիջապէս յիշում եմ այս յեղափոխութեան երջանիկ օրերը, երբ բոլորս ուրախ էինք, փողոցում միմեանց գրկում էինք, շնորհաւորում էինք, յուզւում էինք անընդհատ: Մենք ոչ թէ քաղաքականութեան մէջ չէինք մտել, այլ մեր քաղաքացիական պարտքն էինք կատարում, չէինք կարող նստել մեր արուեստանոցների մէջ եւ սպասել, թէ ի՛նչ կը լինի, մենք մեր քայլը արել ենք:
Յակոբ Վարդանեան.- Ամէն արուեստագէտ էլ, այսպէս թէ այնպէս, իր արուեստում շօշափում է քաղաքական թեմաները, քանի որ չի կարող անտարբեր անցնել ժամանակի կողքով: Արուեստագէտը ժամանակի շունչն է, դեռ մի բան էլ առաջ է ժամանակից: Մենք տեսանք նաեւ մեր ազգի համախմբուածութիւնը: Պատերազմի ժամանակ բոլորս համախմբուել էինք, բայց յեղափոխութեան ժամանակ շատ աւելին էր այդ համախմբուածութիւնը:
Կայ Ղազանճեան.- Երբ որ իրավիճակը լճացած էր երկրում, մարդիկ դժգոհ էին, դա մեզ` իբրեւ ստեղծագործողների շատ էր խանգարում: Երբ քո կողքը դժգոհ մարդիկ ես տեսնում, չես կարող հանգիստ լինել, միշտ աւելի լաւն ես ուզում տեսնել: Հիմա մարդիկ աւելի գոհ են:
Արա Շահումեան.- Մենք հիմա աւելի ազատ ժամանակներում ենք ապրում, մեր հայրերը նախորդ հասարակարգում էին ստեղծագործում, մենք` այս հասարակարգում, չնայած, ասեմ, որ որոշակիօրէն մեր ընտանիքում ստեղծագործական խնդիր չկայ իմ ու իմ հօր միջեւ: Իր ստեղծագործական լուծումներից ես էլ օգտւում, ինքն էլ կարող է իմ փնտռումներից օգտուել: Ես չեմ էլ ընդունում սերունդներ հասկացութիւնը արուեստում:
Ինչ վերաբերւում է պէյրութեան այս այցին, ասեմ, որ նոր եմ վերադարձել այնտեղից, եւ տպաւորութիւնս վառ է, յատկապէս ինձ զարմացրել է համայնքի համախմբուածութիւնը, հարցերը իրենք իրենց ներսում լուծելու համակարգը: Այն յարգանքը միմեանց հանդէպ, որ իրենք ունեն, եզակի է, եւ լաւ կը լինի, որ շատերը ընդօրինակեն այդ միջոցը: Այն, ինչ որ իրենք որպէս հայ այնտեղ ունեն, մենք երազում ենք այստեղ ստեղծել: Իրենք կուռ են մնացել օտար երկրում եւ շատ հրաշալի պահել են հարիւր տարի առաջուայ մշակութային ժառանգութիւնը, որ ոչ միայն մշակոյթն է, այլ` հաւատքը մէկը միւսի նկատմամբ, մաքրութիւնը, ազնւութիւնը: Եւ ինձ զարմացրեց նաեւ այն, որ այնտեղ ունենալով ամէն ինչ` իրենք երազում են Հայաստան գալ, իսկ մենք ի՞նչ ենք երազում այստեղ` գնալ Քանատա… Սրանք հարցեր են, որ մեզ մտածելու տեղիք են տալիս, եւ արուեստի հարցերից բացի մենք` արուեստագէտներս նաեւ այսպիսի մտահոգութիւններ պիտի ունենանք: Կարծում եմ` վերադարձից յետոյ աւելի շատ պատմելու բան կ՛ունենանք: