Համադրեց` ՅԱՐՈՒԹ ՉԷՔԻՃԵԱՆ
Սիմոն Վրացեանի յուշագրութեան այս վերջին մասը կը ներկայացնէ, մասամբ` անկարող հրամանատարութեան մը պատճառով ստեղծուած, նաեւ` որեւէ պատերազմական վիճակի մէջ անխուսափելի, սրտաճմլիկ պատահարներ, զորս ան բնա՛ւ չէ կրցած մոռնալ:
«Դիւրին է պատմուճանները չարատաւորել` կանաչ սեղանին շուրջ նստած, Գոլովինսկիի Տէր Մարգարեանի շքեղ դահլիճին մէջ: Դժուար չէ «մաքուր» պահել խիղճը եւ սուրբի կերպարանքով ամբոխին ներկայանալ, ուրիշներուն վրայ ձգելով «աղտոտ» գործերը: Սեփական պատմուճանին եւ սեփական խիղճին մասին հոգացող ազնիւ մարդը պարտաւոր է նոյն ձեւով մտածել նաեւ ուրիշին պատմուճանին ու խիղճին մաքրութեան մասին…
Թիֆլիսի Գոլովինսկի փողոցի Հայոց ազգային խորհուրդի հաւանական նստավայրը
Բայց նման նուրբ խորհրդածութիւններով զբաղելու ժամանակ չկար. մեր առջեւ կանգնած էին ապացուցուած ծանր յանցաւորներ, որոնց համար դատախազը մահապատիժ կը պահանջէր: Եւ ամէնուն հայեացքը ուղղուած էր մեր կողմը. անպարտ արձակել` պիտի նշանակէր քաջալերել դասալքութիւնը` հիմնապէս քայքայելով ռազմաճակատը: Դատարանը միաձայնութեամբ որոշեց երեքն ալ գնդակահարել անմիջապէս, առանց վերաքննութեան իրաւունք տալու…
Երկուքը լուռ լսեցին դատավճիռը` համարեա անտարբեր, բայց անտառապահին վրայ շշմեցնող տպաւորութիւն ձգեց: Ան պահ մը կարծես չըմբռնեց կարդացուածին իմաստը, ապա ցնցուեցաւ, սուր ճիչ արձակեց, սկսաւ պոռալ… Անհասկնալի խօսքեր կ՛արտասանէր: Կու լար: Երեւոյթը եղկելի էր, այդքան մեծ մարմնին մէջ, այդպիսի՜ փոքր հոգի…
Մի քանի ժամ ժամանակ տրուեցաւ ձեւականութիւնները լրացնելու եւ ամբաստանուածներուն պատրաստութեան համար. կրնային նամակ գրել իրենց ազգականներուն: Երեկոյեան դէմ մահավճիռը գործադրուեցաւ:
Զօրանոցէն քիչ անդին, վարը, փոքրիկ հարթավայրին վրայ կանգնած էր հրացանաւոր ջոկատ մը: Փոքրիկ սեղանին շուրջ կեցած էին դատարանին անդամները` նախագահ, Դրօ, դատախազ: Պետեա Բէգզատեանը, հազիւ 20 տարեկան, աղաչեց, որ իրեն ազատենք մահապատիժի գործադրութեան ներկայ գտնուելու պարտականութենէն: Անդին` բարձունքին վրայ խռնուած էին դիտողները, որոնց մէջ, անշուշտ, «մաքուր խիղճով» մարդիկ ալ…
Զինուորական մահապատիժ ձիւնին վրայ
Արեւը մայրամուտին կը մօտենար: Ցո՛ւրտ: Սարիղամիշը ծածկուած էր ձիւնի հաստ շերտով, որ կը սռթսռթար կօշիկներուն տակ:
Սուինաւոր զինուորներով շրջապատուած երեք դատապարտեալները յամր քայլերով մօտեցան ու կանգ առին հրապարակին մէջտեղ` գլուխները կախ:
Սարիղամիշը կարծես շնչելէ դադրած էր. քա՛ր լռութիւն կը տիրէր:
Ակնթարթ մը, եւ նախագահը կը կարդայ դատավճիռը… Գերմարդկային աղաղակ մը, ապա, կարծես, վիրաւոր ոռնոց` անտառապահը գետին կը տապալի ու գլուխը կտրուած հաւու նման կը ցնցուի, անիմաստ բացագանչութիւններով կը ճանկռտէ սառած հողը… Պահակները ոտքի կը հանեն: Միւս երկուքը անտարբեր կանգնած են, կարծես իրենց չէր վերաբերեր մահավճիռը…
Ու վայրկեանի մը մէջ կը կապեն աչքերն ու ձեռքերը` շարքի կանգնեցնելով… Մէկ, երկու, երեք. կ՛որոտան հրացանները… Հեռախօսը կը շտապէ հաղորդել առաջաւոր դիրքերուն:
– Երեք հայրենիքի դաւաճան խռովարարներ զինուորական ատեանին կողմէ մահուան դատապարտուած են: Մահավճիռը գործադրուած է…
Նոյն երեկոյեան ուղիղ հեռագրաթելը կը հաղորդէ Թիֆլիս.
– Զինուորական ատեանը Սարիղամիշի մէջ գնդակահարութեան դատապարտեց երեք չարամիտ դասալիքներ: Մահապատիժը գործադրուած է անմիջապէս:
Վաղը առաւօտ, Գոլովինսկիի Տէր Մարգարեանի դահլիճին մէջ,կանաչ սեղանին շուրջ, անուշ թէյ խմելու ընթացքին, Հայոց ազգային խորհուրդի անդամները գլուխները օրօրելով` հեռագիրը պիտի կարդան…
Եւ օրեր ետք, Շորագեալի գիւղերէն մէկուն մէջ, լացով ու վայնասունով պիտի կարդացուի այն նամակը, որ «հայրենիքի դաւաճան, դասալիք» անտառապահը մահէն առաջ գրած էր իր կնոջ ու զաւակներուն:
Ա՛հ այդ նամակը… Մինչեւ այսօր ալ, երբ գիշերը աչքերէս քունը կը փախչի, անտառապահին վիթխարի հասակը կը ցցուի առջեւս եւ մեծ, թափանցող աչքերը կը ծակեն սիրտս: Եւ տեսողութեանս կը պատկերանայ արցունքով թրջուած թուղթի կտորը, որուն վրայ մահապարտը իր կոպիտ ձեռքով շարած էր սրտի այնպիսի՛ քնքուշ զեղումներ, այնպիսի՛ սրտառուչ խօսքեր…
Ալեքսանդրապոլի` Գիւմրիի ռուսական բոլորակաձեւ «Սեւ բերդը» 1834-էն ցարդ
Նամակը ուղղուած էր կնոջ եւ երեք մատաղ զաւակներուն, որոնք անհամբեր կը սպասէին հօր վերադարձին: Կը սկսէր աղաչանքով, որ ներեն իրեն, ինքը Աստուծոյ առջեւ ինքզինք մեղաւոր կը զգար: Իր կամքէն անկախ` վախի ազդեցութեան տակ յանցանք գործած էր: Չէր ուզեր մեռնիլ թշնամիին գնդակէն, բայց ահա քիչ ետք պիտի մեռնէր` իբրեւ դաւաճան, հայու գնդակէն…
Ներողութի՛ւն, հազա՛ր ներողութիւն: Աստուած այսպէս կամեցած է եւ կը ներէ իրեն: Ինքը այդ համոզումով ալ կը մեռնի: Ե՛ւ իրեն հետ կը տանի կնոջ եւ զաւակներուն հանդէպ սրտի անհուն սէրը… Ապա` թախանձագին յորդոր կնոջ, որ պատուով պահէ զաւակները. Թող անոնք յարգեն դժբախտ հայրը, որ այնքան կը սիրէ զիրենք: Եւ փաղաքշական անպաճոյճ խօսքեր, կարօտ ու գուրգուրանք զաւակներուն` ամէն մէկուն առանձին-առանձին… Եւ անէծքի կամ թշնամական ո՛չ մէկ խօսք իշխանութեան կամ դատաւորներուն հասցէին: Միայն արցունք եւ անհուն սէր` հարազատներուն…
Թղթատարին յանձնելէն առաջ կարդացի մէկ, մի քանի անգամ: Եւ կարծես ձեռք մը ամուր կը սեղմէր սիրտս: Սիրտս կը ճմլուի նաեւ այսօր, երբ անքուն գիշերին աչքերուս կը պատկերանայ անտառապահին մահուան սարսափէն սառած հայեացքը… Եւ կ՛երեւակայեմ անտառապահին կնոջ եւ զաւակներուն վիշտը հօր նամակը կարդալու ատեն` իրենց որբացած խրճիթին մէջ…
Դատավարութենէն ետք, զօրավար Արէշեանի թախանձանքին վրայ, Դրոն ճակատ մեկնեցաւ թշնամիին դէմ կռիւները վարելու համար: Ճակատը Սարիղամիշի մօտերը Խոնդրէի ձորին մէջ էր: Թնդանօթներուն որոտը մեր ականջներուն կը հասնէր…
Գիւմրի-գրաւեալ Կարս երկաթուղին, 1899-ին սկսած եւ 1993-ին Թուրքիոյ կողմէ փակուած
Քիչ ժամանակ անց Փափազեանը զինուորական տիկնոջ հետ Թիֆլիս մեկնեցան: Այլեւս գաղթական չէր մնացած: Սարիղամիշէն հեռացան նաեւ բժշկա-առողջապահական ու խնամատարական խումբերը: Զօրավար Արէշեանին հետ սուր անհամաձայնութեան պատճառով, ռազմաճակատէն հեռացան նաեւ Մուրատն ու Սեպուհը` իրենց մարտիկներով: Մենք մինակ մնացինք, համարեա դուրսի աշխարհէն կտրուած. Դրոն Խոնդրէի առաջաւոր դիրքերուն էր, ուրկէ թնդանօթներուն որոտը աւելի եւ աւելի սպառնական` կը մօտենար մեզի. Վահան Նաւասարդեանը` զօրավար Արէշեանին քով դայեակի դերով եւ ես` ամայացած Սարիղամիշի «զինուորական հրամանատար»…
… Բայց մենք դատապարտուած էինք: Բախտը մեզ լքած էր: Մեր միակ կապը դուրսի աշխարհին հետ հեռագրաթելն էր: Լուրեր կը ստանայինք Ալեքսանդրապոլէն եւ Թիֆլիսէն, իսկ Հայոց Ազգային Խորհուրդը ժողովներ կը գումարէր Գոլովինսկի փողոցին վրայ, Տէր Մարգարեանի դահլիճին մէջ եւ զինուորական գործավարին օգնականը քաջալերական խօսքեր կ՛ուղղէր… մեզի:
Թիֆլիսի հիմնարկութիւններն ու սրճարանները կը վխտային զինուորական հագուստ հագած դասալիքներով, իսկ մենք օրերը կը հաշուէինք, թէ մեր անխօս չարչարանքին վախճանը ե՛րբ պիտի հասնի: Եւ վախճանը չուշացաւ:
… Որոշուեցաւ. մարտ 28-ին (1918) զօրքը քաղաքէն կը հեռանայ: Զօրավար Արէշեանին հետ կը մեկնի նաեւ Նաւասարդեանը: Վիրաւորները, հիւանդանոցներու ու պահեստներու ծառայողները, քաղաքացիներու մնացորդները իմ հետս կը հեռանան երկաթուղիով: Քաղաքին պահեստներն ու ռազմական արժէք ներկայացնող շէնքերը կը պայթեցուին: Պայթեցնող ջոկատը, գործը լրացնելէն ետք, կը միանայ մեկնողներուն:
Արդէն մութը ինկած էր: Վերջին անգամ աչք նետելէ եւ քաղաքին զանազան մասերը քննելէ ետք կայարան հասայ, ուր խաւարին մէջ արդէն պատրաստ կը սպասէր գնացքը` բեռնաւորուած ստուեր դարձած մարդոցմով եւ ապրանքով: Քաղաքին մէջ մարդ չէր մնացած (Կարսէն 53 քմ հարաւ-արեւմուտք, ՅՉ):
Սարիղամիշի երկաթուղին քաղաքէն դուրս` բլուրին վրայ
Գնացքը դանդաղ դուրս եկաւ կայարանէն եւ կանգ առաւ քաղաքէն դուրս, բարձունքին վրայ: Ամէնքը ականջ կտրած` կը սպասէին: Մէկ ալ` թրա՛խկ, պո՛ւմ, պո՛ւմ. քաղաքի բոլոր կողմերէն որոտացին պայթող ռումբերը: Պայթիւնին յաջորդեց հրդեհը: Հետզհետէ քաղաքը լուսաւորուեցաւ բոցավառ ջահերով: Լոյսերու խաղն ու ռումբերուն որոտը հեռուէն տօնական հրավառութեան տպաւորութիւն կը ձգէին: Գնացքի ճամբորդները դուրս թափուած` հիացումով կը դիտէին…
Կէս գիշերը մօտ էր, երբ ռումբերուն որոտը դադրեցաւ: Գնացքը պարտաւոր էր յառաջանալու: Ես տեղ գտայ մինչեւ բերան զինուորներով լեցուած բեռնակիր սայլին մէջ: Հազիւ ծալապատիկ տեղաւորուած էի, մեծ դժուարութեամբ ներս մտցուցին ծանր վիրաւոր երիտասարդ զինուոր մը: Չէր կարողանար նստիլ: Տեղ բացինք ու պառկեցուցինք մօտս: Գլուխը դրաւ ծունկիս վրայ: Դժուարութեամբ կը շնչէր: Տաքութեան մէջ կը զառանցէր: Շարունակ կը ցնցուէր եւ անկապ խօսքեր կ՛արտասանէր: Ջուր կը խնդրէր.
– Ջո՜ւր… ջո՜ւր… – բայց ջուր չկար:
Շարունակ կը կրկնէր.
– Մամա՜… մամա ջա՜ն… ջո՜ւր…
Ամուր կպաւ ձախ թեւիս եւ չէր ձգեր: Գլուխը անհանգիստ կը շարժէր ծունկիս վրայ: Ամբողջ մարմինը կարծես կ՛այրէր:
– Ջո՜ւր, – կը կանչէր մոլեգնօրէն:
Ո՞վ էր այս տղան: Ոչ ոք ծանօթ էր անոր: Վերջին պահուն, պատահաբար, հիւանդանոցէն հանած ու բերած էին: Կրնար մնալ եւ թուրքերուն ձեռքը իյնալ:
Երեւոյթէն ալ անհնար էր իր ինքնութիւնը գուշակել: Վրան ունէր սովորական զինուորական հագուստ եւ վերարկու: Վրան ոչ մէկ կտոր թուղթ գտնուեցաւ: Մեր հարցումներուն չէր պատասխաներ: Կը հասկնա՞ր, թէ արդէն գիտակցութիւնը կորսնցուցած էր:
– Ջո՜ւր, մամա ջա՜ն… ջո՜ւր,- յուսահատ կը ճչար…
Գնացքը դանդաղ կը սողար բիրտ ցնցումներով: Սայլին մէջ խոր լռութիւն կը տիրէր: Ոմանք նստած կը մրափէին: Ոմանք անշշուկ կը ծխէին: Իւրաքանչիւրը` իր մութ խոհերուն մէջ ամփոփուած:
– Մամա ջա՜ն… ջա՜ն…
Ու դառն հեծկլտանք… Խռկոց, կարծես կը խեղդէին: Ջղային գալարումներ…
Այս տղան քաղաքացի պէտք էր ըլլար: Գիւղացին «մամա ջան» չէր ըսեր… Այլեւս չէր ճչար: Գլուխը ծանր ինկած էր ծունկիս…
Կ՛երեւի մրափած էի: Անթափանց խաւարը մէկէն ցնցեց զիս: Տղան խաղաղ պառկած էր` գլուխը ծանր դրած ծունկիս: Ձեռքը ամուր փակած էր թեւիս: Շոյեցի ճակատը. պա՜ղ…
Ոչ ոք զգացած էր` ինչպէ՛ս վերջին շունչը փչած էր: Մեծ դժուարութեամբ տեղ բացինք. դիակը դրան մօտ տեղաւորեցինք: Անկիւնէն մէկը ըսաւ.
– Հոգւոյն հանգուցելոցն արա հանգիստ եւ ողորմութիւն… Դասաւորեայ ընդ արդարոց…
Լուսաբացը հեռու չէր: Գնացքը ծանր հեւոցով կանգ առաւ բաց դաշտին մէջ: Մօտակայ բլրակին գագաթը բահով փոս մը փորեցինք: Դիակը մէջը դրինք եւ հողով ու չոր ձիւնով ծածկեցինք: Գլխուն վերը` ծառի ճիւղերով խաչ մը տնկեցինք: Եւ նոյն զինուորը, որ հոգւոց կարդաց, դամբանական խօսեցաւ:
– Ո՛չ փող զարկինք, ո՛չ արձագանգ լեռնասոյզ… Ընկե՛ր ջան, անծանօ՛թ երիտասարդ ընկեր, ննջէ հանգիստ քու նոր օթեւանիդ մէջ: Եւ ներէ մեզի, որ դեռ կ՛ապրինք…
Գնացքը դանդաղ շարժեցաւ: Կարսին կը մօտենայինք: Արեւը դեռ ծագած չէր, բայց շրջակայ բարձունքները գորշ մանիշակագոյն` կը պատրաստուէին լուսատուին երեւումը ողջունելու:
Սայլին մէջ ոչ ոք կը խօսէր: Ամէն ոք իր միտքերուն անձնատուր էր: Եւ ականջիս շարունակ կը լսուէր.
– Մամա՜… Մամա ջան, ջո՜ւր…»
16 մայիս 2018
(Շար. 3 եւ վերջ)
——————————-
(1) «Կեանքի ուղիներով. դէպքեր, դէմքեր, ապրումներ», Սիմոն Վրացեան, Ա. հատոր, Գ. տպագրութիւն, Համազգայինի «Վահէ Սէթեան» տպարան, Պէյրութ, 2007, էջ 187-201:
Տեսանիւթ`10 Օր տանը – Սարիղամիշ, Իգդիր, Բայազետ, Բերկրի (երկրորդ մաս) «Երկիր Մետիա» https://www.youtube.com/watch?v=kd9BRk5rXwM
Դրօ կը պատմէ 1918-ի մայիսեան հերոսամարտերը` ձայնագրութիւն:
https://soundcloud.com/mindrkisdq2w/generaldrastamatkanayan/s-X0E6T