ԱՐԱՐԱՏ ԿՈՍՏԱՆԵԱՆ
Վերջերս շատ է խօսւում` Հայաստանը պէտք է ունենայ զարգացած տնտեսութիւն, միւս կողմից նշւում է մեր երկրի շրջափակման մէջ գտնուելու փաստի մասին: Յայտնի է, որ մեր առեւտրաշրջանառութեան մեծ մասը տեղի է ունենում ԵԱՏՄ անդամ պետութիւնների, մի մասն էլ ԵՄ անդամ պետութիւնների հետ: Առեւտրաշրջանառութիւն ունենք նաեւ Չինաստանի հետ, վերջինս կարող է լինել այլընտրանք մեզ համար` զարգացնելու տնտեսութիւնը: Առկայ 8,2% առեւտրաշրջանառութիւնը (հիմնականում` ներկրում) հնարաւոր է աւելացնել: Այս հետաքրքիր պետութեան մասին «Ազդակ»-ը իր ընթերցողին է ներկայացնում յօդուածաշար, որով նախ ներկայացնելու ենք նրա արդի պատմութիւնը, ապա յստակեցնելու ենք, թէ ինչպէ՛ս կարող է մեր երկիրը եւս, էլ աւելի սերտ յարաբերութիւններ հաստատելով այս երկրի հետ, տնտեսապէս զարգանայ:
Չինաստանի տնտեսական զարգացման ուղենիշը դրուեց 1970-ական թուականներից, նախագահ Տինկ Սէաոփինկի հեռատես ծրագրով, երբ Չինաստանին անհրաժեշտ էր տնտեսութեան ուժը ներդնել գիւղատնտեսականից դէպի արդիւնաբերական ոլորտ: Այդ ժամանակից Չինաստանի կառավարութիւնը որդեգրեց մի գործնապաշտ քաղաքականութիւն, պատմութեան մէջ մտաւ հարմոնիայի քաղաքականութիւնը, այսինքն` Չինաստանին անհրաժեշտ էր խաղաղութիւն` ներքին եւ արտաքին քաղաքականութեան մէջ, երկխօսութիւն բոլոր երկրների հետ` բացառելով առճակատումները եւ կարեւորելով երկկողմանի շահերը:
Այս քաղաքականութիւնը շարունակուեց մինչ ներկայ Չինաստանի նախագահ Սի Ճինփինկի իշխանութեան գալը: Եթէ նախկինում Չինաստանը ունէր լուրջ խնդիր` ստեղծելու միջին խաւ, ապա այժմ միջին խաւը Չինաստանում արդէն կազմում է մեծամասնութիւն, հակառակ նրա` Չինաստանը դեռ ունի լուրջ խնդիրներ առերեսուելու 70 մլն աղքատութեան մէջ գտնուող բնակչութեան խնդիրները լուծելու հարցում: Սակայն այս երկրի ներկայ ղեկավարութիւնը, համարելով նախկին նախագահների ծրագրերը իրականացուած, առաջ քաշեց նոր ուսմունք, որը կոչուեց «չինական երազ». այն առաջ քաշեց եւ ղեկավարեց Սի Ճինփինկը:
Հարկ է նշել, որ վերոնշեալ քաղաքական գործիչը արդէն իսկ կուսակցութիւնում (ՉԺԿ) վայելում էր մեծ համբաւ` որպէս թերզարգացած շրջանները, մասնաւորապէս Նինկտէ քաղաքը (1990 թ.), աղքատութիւնից դուրս հանող փորձառու մասնագէտ: Այդ աշխատանքն իրականացնելու համար նրա առաջ քաշած գաղափարներն էին` աղքատութիւնը յաղթահարելու համար պէտք է երկկողմանի աշխատանք ղեկավարութեան եւ ժողովրդի միջեւ, ղեկավարը պէտք է ունակութիւն ունենայ հասկանալու եւ ըմբռնելու խնդրի խորութիւնը եւ ծառայի ժողովրդին ամբողջ սրտով: Դեռ այդ ժամանակներից նա կարեւորել է փտածութեան դէմ պայքարը: Նրա կարծիքով, Չինաստանի նպատակը ոչ թէ պէտք էր լինէր միայն տնտեսութեան զարգացումը, այլ` ունենալ թափանցիկ կառավարութիւն. բոլորը պէտք է պայքարեն փտածութեան դէմ, ոչ թէ միայն կառավարութիւնը: Նա նաեւ կարեւորում էր պաշտօնեաների վարքը:
2013 թուականին, նախագահ ընտրուելուց յետոյ, ՍԻ Ճինփինկը առաջ քաշեց «Չինական երազ» ուսմունքը: Այն կրում էր հետեւեալ գաղափարը. հայրենասիրութիւնը միշտ եղել է ներքին ուժերը համախմբող խթան, չիները դարերի ընթացքում խաղաղութիւն սիրող ժողովուրդ են եւ միշտ եղել են բաց համագործակցութեան եւ երկկողմանի շահ ապահովելու համար: Ըստ այդ ուսմունքի, Չինաստանը պէտք է լինի զարգացած, ուժեղ, ներկայանալի մշակոյթով եւ կարողանայ աշխարհին ճիշդ բացատրել ներկայ Չինաստանի զարգացման տեսլականը: Չինաստանի պաշտօնեաներն այս արագ զարգացող ժամանակներում պէտք է աշխատեն խստագոյնս արագ եւ վարպետօրէն եւ դա անելու համար պէտք է բաւարար գիտելիքներ ունենան տնտեսութեան, քաղաքականութեան, պատմութեան, փիլիսոփայութեան ոլորտներում: Տնտեսութեամբ լինելով աշխարհի երկրորդ գերզարգացած երկիրը` մենք դեռ պէտք է զարգացնենք տիեզերագնացութիւնը, կենսաբժշկութիւնը եւ ռոպոթաշինութիւնը:
Այն նաեւ սահմանում էր` արտասահման մեկնող չին ուսանողները պէտք է լինեն որպէս ոչ պաշտօնական դեսպաններ` հիմնելով ընկերութիւն, բացատրելով չինական մշակոյթը, պատմութիւնը եւ մեր աշխարհընկալումը:
«Չինական երազ»-ի յաջորդ կարեւոր կէտը ազգային անվտանգութիւնն է: Հարուստ երկիրը պէտք է ստեղծի ուժեղ բանակ, եւ պէտք է ուշադրութիւն դարձնել աշխարհի խաղաղութիւնը խարխլող ահաբեկչութեանը: Խաղաղութեան պայմաններում պէտք է պատրաստ լինել քաոսին, ստեղծել միջազգային հակահաբեկչական ցանց: Պէտք է պատրաստել առողջ կրօնական մասնագէտներ, ովքեր կրօնը ճիշդ կը բացատրեն հասարակութեանը եւ նրանց չեն մղի մոլեռանդութեան: Ոչ մի օտար երկիր իրաւունք չունի Չինաստանին օտարելու իր խոր համոզմունքներից եւ խաթարելու Չինաստանի ամբողջականութիւնը, անվտանգութիւնը եւ զարգացման ուղին:
Վերոշարադրեալից կարելի է յանգել հետեւեալ եզրակացութեանը.
- Կոնֆուցիական Չինաստանը դարեր ի վեր մեծ ուշադրութիւն է դարձրել այդ փիլիսոփայութեանը, որը ուսուցանել է հօր կարեւոր դերն ընտանիքում եւ զաւակների հնազանդութիւնը նրան, այս ըմբռնումը կիրառւում է բոլոր բնագաւառներում: Այսինքն` հնազանդուել ուսուցչին, ղեկավարին, գործարանի տնօրէնին եւ այլն: Ըստ իս, նշուած փաստը Չինաստանի զարգացման ամենակարեւոր հիմքերից է: Այսպիսով, հեշտ է ընկալւում, թէ ինչպէ՛ս Չինաստանը կարողացաւ ունենալ աշխարհի խոշորագոյն գործարանները, կամ` ունենալ միակ կուսակցութիւնում 87 մլն անդամ: Յիրաւի, իւրաքանչիւր չին մարդու բնոյթի մէջ գոյութիւն ունի յարգանք ղեկավարի նկատմամբ: Յաճախ նրանք կատարում են հրամաններն առանց վարանելու կամ բողոքելու: Սա չեն կարողանում ըմբռնել այն օտար մարդիկ, որոնք քննադատում են Չինաստանը` մտածելով, որ այդտեղ գոյութիւն չունեն մարդու իրաւունքներ:
- Յօդուածի սկզբում ներկայացրել ենք, որ Չինաստանը երկար ժամանակ զերծ էր մնում արտաքին քաղաքականութիւնում կոշտ դիրքորոշում ունենալուց որեւէ այլ պետութեան հանդէպ, եւ միջազգային յարաբերութիւններում միշտ խօսում են երկկողմանի շահի մասին` անտեսելով տագնապները: Այժմ, Սի Ճինփինկի նախագահութեան օրօք հարկ է ուշադրութիւն դարձնել նրա նոր քաղաքականութեանը, որը մասնաւորապէս արտաքին քաղաքականութեան ասպարէզում հանդէս է գալիս աւելի ինքնավստահ եւ կարեւորում Չինաստանի մշակոյթի տարածումը աշխարհում եւ յաճախ է խօսում Չինաստանի ինքնուրոյն եւ ինքնավստահ ուժ լինելու մասին: Այս քաղաքականութիւնը փոխեց Չինաստանի ղեկավարութեան եւ հասարակութեան յարմարուողական քաղաքականութիւնը միջազգային ասպարէզում: Այսօր Չինաստանը, թէպէտ` հաշուարկուած քայլերով, բայց հետեւողական ներկայութիւն ունի աշխարհի բոլոր կարեւորագոյն կէտերում: Արդէն Չինաստանը ներկայանում է ոչ միայն որպէս տնտեսական ուժ, այլ նաեւ յստակ ի ցոյց է դնում իր քաղաքական կեցուածքը` կարեւոր խնդիրներում, ինչպիսին է Սիրիայի պատերազմը վեթօ դնելով ՄԱԿ-ում Սիրիայի իշխանութեան օգտին. կարեւորագոյն խնդիր է հակաահաբեկչական պայքարը, որն այսօր դիտւում է որպէս Չինաստանի ազգային անվտանգութեան թիւ մէկ խնդիր: (Սին Ճիյանկ նահանգը, որի բնակչութեան կէսը թուրքալեզու ցեղեր` ույղուրներ են եւ ծայրայեղ իսլամի գործօնով սպառնալիք են հանդիսանում Չինաստանի ներքին համերաշխութեանը, քանի որ, ըստ սիրիական պաշտօնական տեղեկատուութեան, Սիրիայում գտնւում են 5000 ույղուր ահաբեկիչներ Իտլիպի կազմում, որոնք արդէն վարժ լինելով ահաբեկչական գործողութիւններ իրականացնելուն` Չինաստան վերադարձի դէպքում կարող են մեծ վտանգ հանդիսանալ` կազմակերպելով ահաբեկչական գործողութիւններ):
- Միջազգային քաղաքականութեան մէջ Միացեալ Նահանգներն հանդիսանում են Չինաստանի ամենաթէժ քննադատողը, պատճառաբանելով, թէ կառավարական համակարգում գոյութիւն չունի ժողովրդավարութիւն եւ մարդու իրաւունքներ, սակայն այդ երկրի բարձրաստիճան ղեկավարութեան ու մտաւորականութեան այդ հատուածը անկարող է ըմբռնել հարցի բուն էութիւնը, եւ ճիշդ չէ միակողմանի գնահատականներ տալ տարբեր երկրների եւ մշակոյթների սկզբունքներին` յենուելով արեւմտեան քաղաքակրթութեան չափորոշիչների վրայ: Միացեալ Նահանգներն իրենց արտաքին քաղաքականութիւնը վարելիս ուղորդւում են երկակի չափանշերով` սատարելով բռնապետական վարչակարգերին, ինչպէս, օրինակ, Եգիպտոսի նախկին նախագահ Մուպարաքի 40-ամեայ միահեծան բռնապետութեանը, կամ օժանդակելով Իրաքի նախկին նախագահ Սատամ Հուսէյնին` Իրանի Իսլամական Հանրապետութեան դէմ պատերազմում: Միեւնոյն ժամանակ Միացեալ Նահանգներն, ժողովրդավարութիւն տարածելու մոլուցքով տարուած, խթանում են երկրների քայքայմանը եւ պատճառ դառնում քաղաքացիական պատերազմների: Գալով Չինաստանի խնդրին` նոյն այդ ժողովրդավարութեան խաբկանքով միշտ ցանկանալու է ներսից քանդել Չինաստանը, որովհետեւ Չինաստանի հզօրացումը պայմանաւորուած է նրա միասնութեամբ: