ՄԻՔԱՅԷԼ ՀԱՃԵԱՆ
Քաղաքական վերլուծաբան
Այո՛, ճիշդ կռահեցիք. խօսքս վերաբերում է յայտնի լրագրող Տիլեանա Կայթանճիեւայի ճակատագրին: Նրա, ով վերջերս, յուլիսի սկզբներին, պուլկարական ամենամեծ տպաքանակ ունեցող «Թրուտ» թերթի էջերում հանդէս է եկել աղմկայարոյց յօդուածներով` բացայայտելով արեւմտեան մի շարք երկրների, ինչպէս նաեւ Ազրպէյճանի, Թուրքիայի երկերեսանի քաղաքականութիւնը «Իսլամական պետութիւն» եւ կամ, այլ կերպ` ՏԱՀԵՇ կոչեցեալ ահաբեկչական խմբաւորման դէմ պայքարում: Լրագրողական հետաքննութեան արդիւնքում, հիմք ընդունելով անժխտելի փաստերը, Կայթանճիեւան յանգել է այն եզրակացութեան, որ Արեւմուտքը, Միացեալ Նահանգների գլխաւորութեամբ, ոչ այնքան պայքար է մղում Մերձաւոր Արեւելքի տարածաշրջանում ծայր աստիճան աղէտալի դարձած այդ մահագոյժ չարիքի դէմ, որքան սկզբունքային պայքարի երեւութականութիւն է ստեղծում` նպաստելով նրա գոյութեանը եւ այն ի սպաս դնելով իր ինչպէս տարածաշրջանային, նոյնպէս եւ աշխարհաքաղաքական շահերին:
Թէ ինչո՛ւ, երեւի դժուար չէ կռահել` Արեւմուտքի մոգոնած «Արաբական գարուն»-ը, աննկարագրելի աւերածութիւններ գործելով հիւսիսափրիկեան եւ մերձաւորարեւելեան մի շարք երկրներում, տակաւին արեւմտեան քաղաքական օրակարգի առանցքային հարց է մնում եւ ներկայումս` արդէն քանի տարի է, ինչ փլատակների է վերածում Սիրիայի Արաբական Հանրապետութիւնը, փորձելով երբեմնի ծաղկուն այդ երկրում իբր թէ արեւմտեան ժողովրդավարութեան ներդրման պատրուակով, բայց իրականում միջհամայնքային կրօնական խառնակչութեան եւ արիւնահեղ խառնաշփոթի միջոցով տապալել իր քմահաճ քիմքի համար անդուր դարձած նախագահ Պաշշար Ասատի իշխանութիւնը եւ փոխարինել նրան զուտ իր տնտեսական ու ռազմաքաղաքական շահերին անհամեմատ համապատասխանող մէկ այլ անձով: Սակայն դատելով երկրում ծաւալուած երկարամեայ քաղաքացիական պատերազմի ներկայ զարգացումներից` արեւմտեան արտադրութեան խոփը Սիրիայում քարին է դէմ ընկել: Բանն այն է, որ սիրիական ժողովրդի ողջախոհ մեծամասնութիւնը, համախմբուած լինելով գործող նախագահի շուրջը եւ իր թիկունքում ունենալով Ռուսաստանի համակողմանի աջակցութիւնը, երկիրը հետզհետէ մաքրում է ծայրայեղական, ինչպէս նաեւ, արեւմտեան բնորոշմամբ ասած, «չափաւոր ընդդիմութիւն» կոչուող, մինչդեռ ըստ էութեան` նոյնպէս ահաբեկչական բնոյթի խմբաւորումներից:
Պուլկարացի լրագրողի հրապարակումներից պարզւում է, որ արմատական, ինչպէս նաեւ կարծեցեալ «չափաւոր» իսլամականները զէնք են ստանում արեւմտեան տասնհինգ յատուկ ծառայութիւններից: Գործում է սպառազինութեան մատակարարման մի ծաւալուն ու կուռ միջազգային համակարգ, որի մէջ ներգրաւուած են` Միացեալ Նահանգները, Մեծն Բրիտանիան, Ֆրանսան, Պուլկարիան, Թուրքիան, Անդրկովկասում` Ազրպէյճանը, հարաւ-արեւելքում` Աֆղանստանը եւ Փաքիստանը, Ծոցում` Սէուտական Արաբիան, Յորդանանը, Քաթարը, ափրիկեան մի շարք երկրներ: Ստեղծուած է բազմազգ մի յանցաւոր համադաշնակցութիւն, որն արեւմտեան երկրների զինապահեստներից ու գործարաններից մահաբեր բեռը գրեթէ ամէնօրեայ պարբերականութեամբ փոխադրում է «Արաբական գարուն»-ի հերթական զոհ դարձած այդ երկիր` Սիրիա, սպառազինելով հիմնականում այն նոյն ահաբեկչական խմբաւորմանը` ՏԱՀԵՇ-ին, որի դէմ իբր թէ կենաց ու մահու կռիւ են մղում արեւմտեան դաշնակից պետութիւնների միացեալ ուժերը: Յատկանշական է, որ եթէ զուտ թուաբանական մեթոտով հաշուարկելու լինենք, այսպէս կոչուած, «Իսլամական պետութեան» զինուած խմբաւորումների նիւթական, սարքաւորումների եւ մանաւանդ մարդկային կորուստները, որ դրանք կրում են արեւմտեան քոալիսիոնի զօրքերի, ինչպէս նաեւ ռուսական ռազմական օդուժի հարուածներից, եւ որոնց մասին ամէնօրեայ ամփոփագրեր են հրապարակւում մեզ համար արդէն սովորական դարձած քարոզչական ծնծղաների ներքոյ, ապա կարելի է այն պատկերացումն ունենալ, թէ արդէն գլխովին, ի սպառ ոչնչացուել են ՏԱՀԵՇ-ին անդամակցող ոչ միայն ներկայիս ահաբեկիչները, այլեւ նրանց դեռեւս չծնուած ժառանգները` մի քանի սերունդ շարունակ: Աւա՜ղ, Մերձաւոր Արեւելքի երկրներում եւ աշխարհում ամէնուրեք այդ դահիճների թուաքանակն օրաւուր աճում է` անձրեւից յետոյ համատարած գլուխ հանող սնկերի պէս: Արդեօք անզէն աչքով իսկ տեսանելի՞ չէ, որ եթէ Արեւմուտքը մի ձեռքով կարծես թէ «մահացու» խոցում է այդ խմբաւորումներին, ապա միւս ձեռքով, նախապէս զգուշացնելով, հեռացնում է նրանց իր իսկ հարուածների թիրախ դարձած ռազմական հաւաքակայաններից ու կրակակէտերից, գումարած դրան` իր զինապահեստներից մատակարարում է նոր, գերարդիական զինատեսակներ: Անձամբ ես դժուարանում եմ կասկածել, որ անգամ ռուսական ռազմական օդուժի շուրջ երկամեայ տեւողութեան հարուածների պարագայում ահաբեկիչներն ամէն անգամ էլ նախազգուշացւում են արեւմտեան յատուկ ծառայութիւնների կողմից, որոնք, անկասկած, քաջատեղեակ են այդ հարուածների թիրախների ու ժամկէտների տուեալներին, ինչի շնորհիւ եւ արմատական իսլամականներին մշտապէս յաջողւում է խուսափել քիչ թէ շատ շօշափելի կորուստներից:
Ու փոխանակ, այսպէս կոչուած «արդարամիտ, արդարադատ ու ժողովրդավար» Արեւմուտքը դատապարտի իր պետական եւ ոչ պետական կառոյցներին այդ, մեղմ ասած, օրինախախտ գործունէութեան համար, դատաստան է տեսնում մարդկութեան դէմ ուղղուած այդ յանցագործութիւնների սարդոստայնը բացայայտած շարքային լրագրողի հանդէպ` զրկելով նրան իր մասնագիտական աշխատանքից: Ու ստացւում է, ինչպէս հայ մեծագոյն երգիծաբան Յակոբ Պարոնեանը կ՛ասէր. սուլթանը ինչ-ինչ թերացման համար յոխորտում է իր կառավարութեան ղեկավար նազիր-վեզիրի վրայ, նազիր-վեզիրն իր հերթին դատափետում է կառավարութեան անդամ վեզիրին, իսկ վերջում նոյն այդ, այսպէս ասած, «մահացու մեղքի» համար գլխատւում է, կարող էք հարցնել` ո՞վ… Ի հարկէ, կարաւանի վերջին ուղտապանը: Եւ այդպիսով փակւում է կնճռոտ հանգոյցը եւ կամ, շախմատային եզրոյթով ասած, խաղն աւարտւում է պատային վիճակով:
Եւ, ահաւասիկ, ողբերգական հանգուցալուծմամբ այդ զաւեշտը նոյնութեամբ կրկնւում է մեր օրերում, գրեթէ մէկուկէս դար անց` օսմանեան Թուրքիայից շա՜տ ու շա՛տ աւելի քաղաքակիրթ ժամանակներում, 21-րդ դարի երկրորդ տասնամեակում. կարաւանի վերջին ուղտապանի ճակատագիրը բաժին է հասնում ընդամէնը շարքային լրագրողին, ով, ի տարբերութիւն իր բազմաթիւ գործընկերների, խիզախել է ժամանակից շուտ բացել բեմի վարագոյրը եւ առաջինը բացագանչել` «Այո՛, թագաւորը մերկ է»:
Եւ որ թագաւորն իրօք մերկ է, գիտեն կարծես թէ բոլորը, այդ թւում նաեւ հէնց ինքը` թագաւորը: Բայց պարզւում է` մեղսանքը ոչ այնքան նրա մերկ վիճակի մէջ է, որքան այդ մերկութիւնը կողքից բացայայտելու խիզախման մէջ, ինչի համար էլ հէնց պատժուել է Տիլեանա Կայթանճիեւան: Նրա` հետաքննող լրագրողի բացայայտմամբ, միայն «Մարիանն Տանիկա» բեռնափոխադրող նաւը, բեռնաւորուած լինելով զէնք ու զինամթերքով, ամսական երկու ուղերթ է կատարում պուլկարական Պուրկաս նաւահանգստից Սէուտական Արաբիայի Ճետտա նաւահանգիստ: Մասնաւորապէս, յայտնում է նա, այս տարուայ մարտի 28-ին «Մարիանն Տանիկա»-ն, բեռնուած լինելով տասնեակ թոների հասնող զէնք ու զինամթերքով, դանիական դրօշի ներքոյ դուրս է եկել Պուրկասից եւ ապրիլի 6-ին հասել Սէուտական թագաւորութեան ամենախոշոր նաւահանգիստ` Ճետտա: Նաւը բեռնաթափւում է 8 ժամուայ ընթացքում, եւ «Մարիանն Տանիկա»-ն իսկոյն եւեթ հակառակ ուղղութիւն է վերցնում` նաւարկելով դէպի Պուրկաս նաւահանգիստ: Ուշագրաւ է, որ զէնքի այդ վիթխարի խմբաքանակներն ամենեւին էլ նախատեսուած չեն Սէուտական Արաբիայի համար, քանզի այդ երկրի զինուած ուժերը չեն կարող օգտագործել տուեալ զինատեսակները: Բանն այն է, որ թագաւորական բանակը զինուած է միայն արեւմտեան արտադրութեան սպառազինութեամբ:
Իսկ ահա անցեալ տարուայ դեկտեմբերին «Թրուտ» թերթի նոյն լրագրողն անձամբ պուլկարական Վազովի մեքենաշինական «Սոփոթ» գործարանում թողարկուած զէնք է յայտնաբերել Սիրիայում` Հալէպ քաղաքի արեւելեան հատուածում տեղակայուած «Նուսրա» կոչուող ժիհատական ճակատի զինապահեստներում: Ինչպէս յայտնի է, «Նուսրա»-ն ՄԱԿ-ի կողմից բնութագրուել է որպէս ահաբեկչական խմբաւորում` հանրայայտ Քայիտայի հետ ունեցած սերտ կապերի պատճառով: Եւ ինչպէս ցոյց է տուել լրագրողական հետաքննութիւնը, չնայած այն հանգամանքին, որ Սիրիայում տեղի ունեցող քաղաքացիական պատերազմի պատճառով արգելանք է դրուած դէպի այդ երկիր սպառազինութեան արտահանման վրայ, այնուամենայնիւ, Պուլկարիայից առաքուած երկու միլիոն արկ եւ «Կրատ» կայանքի 4000 հրթիռ ընկել են Հալէպում գտնուող ժիհատականների ձեռքը:
Սիրիայի գործող իշխանութիւնների դէմ Միացեալ Նահանգների հովանու ներքոյ գործող, այսպէս կոչուած, Ազատ բանակի սպայ Մալիք Քարտիի հաղորդմամբ, որ նա կատարել է Տիանա Կայթանճիեւայի հետ հարցազրոյցում, անգամ Ազատ բանակը գրեթէ զրկուած է այդ մատակարարումներից եւ անչափ քիչ զէնք է
ստանում, քանզի այն մատակարարւում է առաւելապէս արմատական գաղափարախօսութեան ՏԱՀԵՇ ահաբեկչական խմբաւորմանը:
Տիլեանա Կայթանճիեւան յիշեցնում է, որ 2016թ. արձանագրուել է օդային ուղիով 150 թոն «սպիտակ ֆոսֆորի» առաքում Սերպիայից եւ Պուլկարիայից Աֆղանստան: Վերալիցքաւորման համար բեռնափոխադրող օդանաւը 4 ժամ կանգ է առել Պաքուի օդակայանում, ինչը, պուլկարացի լրագրողի խօսքով, միանգամայն հասկանալի կասկածանք է յարուցում: Բանն այն է, որ հէնց այդ ժամանակ Ազրպէյճանը Հայաստանին մեղադրում էր Լեռնային Ղարաբաղում ընթացող մարտերի ժամանակ իբր թէ «սպիտակ ֆոսֆոր» կիրառելու մէջ:
Կարելի է համանման շատ այլ փաստեր բերել «Թրուտ» թերթի այդ հրապարակումներից, բայց, կարծում եմ, այդքանն էլ բաւական է յստակ պատկերացնելու համար իրերի իսկական վիճակը: Ինչ վերաբերում է այդ յօդուածների հեղինակին մասնագիտական աշխատանքից ազատման խնդրին, ապա Տիլեանա Կայթանճիեւան հաւաստիացնում է, որ իրեն աշխատանքից հեռացնելու որոշման յետեւում կանգնած են Ազրպէյճանը եւ Իլհամ Ալիեւի վարչախումբը:
Կատարուածի մասին յայտնի դարձաւ օգոստոսի 24-ին` Դիմատետրի իր էջում նրա գրառումից: Ահա այն. «Այսօր` Սիրիայի ահաբեկիչներին մատակարարուող զէնքի վերաբերեալ իմ հետաքննած գաղտնի փաստաթղթերի առնչութեամբ Պուլկարիայի ազգային անվտանգութեան գործակալութիւնում հարցաքննութիւնից յետոյ, «Թրուտ Տէյլի» օրաթերթը` Սիրիա մեկնելուց եւ իմ աշխատանքը շարունակելուց ընդամէնը մի քանի օր առաջ ինձ հեռացրեց աշխատանքից»: Գրառմանը նա կցել էր նաեւ իր հետաքննական նիւթը` կասկած յայտնելով, որ այն կարող է հեռացուել «Թրուտ Տէյլի» օրաթերթի կայքից:
Ի լրումն Դիմատետրի այդ գրառման, «Արմէնփրես» լրատուական գործակալութեանը տուած իր բացառիկ հարցազրոյցում նա յայտնել է, որ Ազրպէյճանի կողմից ահաբեկիչներին դիւանագիտական չուերթների միջոցով զէնքի մատակարարման դէպքերը ներկայացնող յօդուածից յետոյ խնդիրներ է ունեցել: Ինչպէս յայտնի է, պուլկարացի լրագրողը «Թրուտ» թերթի յուլիսի 2-ի համարում հրապարակել է յօդուած` «350 դիւանագիտական չուերթներ` ահաբեկիչների համար զէնքով» վերնագրով: Պարբերականի այդ հրապարակումը խօսուն փաստեր եւ գաղտնազերծուած փաստաթղթերով յագեցած մի աղմկայարոյց հետաքննութիւն է, որը բացայայտում է ազրպէյճանական պետական մարմինների, անձամբ նախագահի ընտանիքի ուղղակի ներգրաւուածութիւնն «իսլամական պետութիւն» ահաբեկչական խմբաւորման եւ աշխարհի տարբեր ծայրերում գործող նրա խմբերի զինման գործում: Յօդուածում անդրադարձ է կատարուած հիմնականում Ազրպէյճանի «Սիլք ուէյ էրլայնզ» պետական օդանաւային ընկերութեան կողմից դիւանագիտական բեռների քողի տակ Սիրիա, Իրաք, Աֆղանստան, Փաքիստան, Քոնկօ, Պուրքինա Ֆասօ, այլ երկրներ զէնք ու զինամթերքի անօրինական արտահանմանն ու վաճառքին: Յօդուածագիրը նշել էր, որ վերջին երեք տարուայ ընթացքում ազրպէյճանական ընկերութիւնը քողարկուել է դիւանագիտական ծխածածկոյթով` աշխարհի տարբեր թէժ կէտեր տասնեակ թոներ զէնք եւ զինամթերք ուղարկելու համար: Այդ զինատեսակների մեծ մասն օգտագործուել է ահաբեկչական կազմակերպութիւնների կողմից: Նա նշել է նաեւ, որ Ազրպէյճանի տեղափոխած զէնքի մի մասը կարող է օգտագործուած լինել Լեռնային Ղարաբաղում:
Իր այդ հարցազրոյցում լրագրողը պատմում է Պուլկարիայի ազգային անվտանգութեան ծառայութիւն իրեն կանչելու եւ այնտեղ հարցաքննելու, մի քանի ժամ անց թերթի խմբագրութիւնում աշխատանքից առանց որեւէ բացատրութեան ազատելու հանգամանքների մասին: Նրա համոզմամբ, «Այս ամէնի յետեւում կանգնած են ազդեցիկ դէմքեր, եւ` ոչ միայն Պուլկարիայում: Այս հարցը անձնական չէ, այլ վերաբերում է Ազրպէյճանին, որն իր պետական օդանաւային ընկերութեան միջոցով զէնք է մատակարարում ահաբեկիչներին եւ այն երկրներին, որոնք ներգրաւուած են մատակարարման շղթայի մէջ»: Պարզւում է, որ Պուլկարիայում Ազրպէյճանի դեսպանատան կողմից ազրպէյճանական «Սիլք ուէյ էրլայնզ» օդանաւային ընկերութեան միջոցով ահաբեկիչներին զէնքի մատակարարման փաստը մերկացնող նիւթից յետոյ, դեսպանատունը խնդրել էր հետաքննել դէպքի հանգամանքները: Այդ նիւթի հրապարակումից յետոյ Ազրպէյճանի դեսպանատունը բողոք ներկայացրեց` նշելով, որ յօդուածն ուղղուած է իր երկրի դէմ: Այո՛, ասում է Կայթանճիեւան, դա ուղղուած է, ինչպէս իրենց, այնպէս էլ դրանում ներգրաւուած միւսների դէմ:
Սակայն, ինչպէս հաւաստիացնում է Տիլեանա Կայթանճիեւան, ոչ ոք եւ ոչինչ չի կարող կանգնեցնել իրեն, քանզի ինքն այլեւս ոչինչ չունի կորցնելու, ուստի եւ շարունակելու է անել այն, ինչ անում էր մինչ այդ, այսինքն` նոր բացայայտումներ հանել ջրի երես: Այդ թւում` ՏԱՀԵՇ ահաբեկչական խմբաւորմանը Պաքուից կատարուող զէնք ու զինամթերքի մատակարարումների մասին: Հաւաստիացնում եմ, ասում է նա, որ Ազրպէյճանը միջամտում է Պուլկարիայի ներքին գործերին: Այն, ինչ պատահեց ինձ հետ, առաջին դէպքը չէր. ես ո՛չ առաջինն եմ, ո՛չ էլ վերջինը:
Կայթանճիեւան համոզուած է, որ Ազրպէյճանի կողմից իրականացուող միջազգային յանցագործութիւնները պէտք է հետաքննուեն ՄԱԿ-ի կողմից: Նրա խօսքով. «Ազրպէյճանական իշխանութիւնները պէտք է միջազգային իրաւունքով պատասխանատուութեան ենթարկուեն: Ես ունեմ բազմաթիւ տեսանիւթեր եւ ապացոյցներ, որ ազրպէյճանական պետական օդանաւային ընկերութեան կողմից մատակարարուած զէնքով Սիրիայում սպաննւում են անմեղ քաղաքացիներ»: Հետաքննող լրագրողը միեւնոյն ժամանակ նշում է, որ բացի զանազան ճնշումներից, որոնք Ազրպէյճանը կիրառում է խօսքի ազատութիւնը սահմանափակելու նպատակով, լայնօրէն կիրառւում է նաեւ կաշառքը: Այդ ճանապարհով նրանք պուլկարական մի շարք զանգուածային լրատուամիջոցներում պատուիրում են իրենց դրական լոյսի ներքոյ ներկայացնող յօդուածներ եւ լռեցնում անցանկալի ձայները:
Հարկ է նշել, որ, ինչպէս տեղեկացնում է «Արմէնփրես»-ը, ի լրումն այդ հետաքննութեան, լրատուական գործակալութիւնը նոյնպէս համացանցում բաց հասանելիութեան փաստաթղթերի ուսումնասիրութեան շնորհիւ աղմկայարոյց փաստեր է բացայայտել Պուլկարիայում Ազրպէյճանի դեսպանութեան գործունէութեան առնչութեամբ: Արձանագրուել են ճնշումներ անգամ իրենց մասնագիտական գործունէութիւնը ծաւալող` Պուլկարիայի այլ քաղաքացիների նկատմամբ: Ազրպէյճանի դեսպանը նոյնիսկ Պուլկարիայի Լրագրողների միութիւնից պահանջել է սառեցնել հանրայայտ լրագրող Ցվեթանա Փասքալեւայի անդամակցութիւնը, ինչպէս նաեւ` խոչընդոտել այդ երկրում օրինականօրէն գործունէութիւն ծաւալող ՀԲԸՄ Պուլկարիայի մասնաճիւղի միջոցառումներին: Իսկ ահա դրանից շաբաթներ առաջ պարզ էր դարձել, որ մասնաճիւղի երիտասարդական միութեան նախագահ Հայկ Կարապետեանը, դեռեւս չբացայայտուած հանգամանքներում, ստիպած է եղել թողնել Փլովտիվի ազգային եւ համարկման հարցերով զբաղուող խորհրդի անդամի պաշտօնը: Պաշտօնաթողութեան պատճառը, ըստ «Արմէնփրես»-ի տեղեկութիւնների, եղել է ազրպէյճանական կողմի միջամտութիւնը եւ այն, որ Պուլկարիայի պատկան մարմինները, երկրի քաղաքացու իրաւունքները պաշտպանելու փոխարէն, տեղի են տուել տարատեսակ ճնշումների:
Պաքուի միջամտութեամբ, այո՛, պուլկարական իշխանութիւններն աշխատանքից ազատեցին ազատախոհ ու խիզախ լրագրողուհուն` Տիլեանա Կայթանճիեւային: Բայց, արդեօք, դա նշանակո՞ւմ է, թէ, այսպէս ասած, մախաթն ի վերջոյ թաքցուեց պարկի մէջ: Հազիւ թէ: Պուլկարացի մեր խիզախ գործընկերուհու բացայայտումները, ի հեճուկս ՏԱՀԵՇ-ի առնչութեամբ երկերեսանի քաղաքականութիւն վարող արեւմտեան տէրութիւնների, այնուամենայնիւ, կատարել են իրենց առաքելութիւնը` լայն արձագանգ գտնելով միջազգային լրատուամիջոցներում:
Յատուկ «Ազդակ»-ի համար
Արցախ